[Kampuchea Thmey] - លោក ស៊ុន ចាន់ថុល ជួបពិភាក្សាការងារជាមួយគណៈប្រតិភូមកពីធនាគារអភិវឌ្ឍន៍ចិន (CDB)
2019-10-26
Go to the website published Kampuchea Thmey
ភ្នំពេញ ៖ កាលពីថ្ងៃព្រហស្បតិ៍ ១១រោច ខែអស្សុជ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៤ ខែតុលា ឆ្នាំ២០១៩ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ជួបពិភាក្សាការងារជាមួយគណៈប្រតិភូមកពីធនាគារអភិវឌ្ឍន៍ចិន ដឹកនាំដោយលោក Mei Shiwen នាយកចាត់ការទូទៅរបស់ CDB សាខាខេត្តក្វាងស៊ី។
ជាកិច្ចចាប់ផ្តើម លោក Mei Shiwen បានជម្រាបជូនលោកទេសរដ្ឋមន្ត្រី អំពីសមិទ្ធផលសម្រេចបាន គួរឲ្យកត់សម្គាល់នៅក្នុងកិច្ចសហប្រតិបត្តិការរយៈពេលកន្លងមក រវាងក្រសួងសាធារណការ និងដឹកជញ្ជូន និងធនាគារអភិវឌ្ឍន៍ចិន (CDB) ក្នុងការចូលរួមចំណែកដល់ការអភិវឌ្ឍន៍ហេដ្ឋារចនាសម្ព័ន្ធកម្ពុជាឲ្យមាន ការរីកចម្រើន។
លោកទេសរដ្ឋមន្ត្រី ស៊ុន ចាន់ថុល បានសម្តែងនូវអំណរគុណចំពោះធនាគារអភិវឌ្ឍន៍ចិន (CDB) ដែល បានផ្តល់ហិរញ្ញប្បទានដល់គម្រោងសាងសង់ផ្លូវល្បឿនលឿនពីភ្នំពេញទៅខេត្តព្រះសីហនុ និងគម្រោងដទៃទៀតនៅកម្ពុជាឲ្យដំណើរការបានដោយរលូន។
ជាមួយគ្នានេះផងដែរ លោកទេសរដ្ឋមន្ត្រី បានស្នើឲ្យធនាគារ CDB ពិនិត្យមើលកិច្ចសហប្រតិបត្តិការ បន្ថែមទៀតលើគម្រោងវិនិយោគចិននៅកម្ពុជាដែលទាក់ទងនឹងហេដ្ឋារចនាសម្ព័ន្ធផ្លូវ ថ្នល់ ផ្លូវល្បឿនលឿន ការអភិវឌ្ឍន៍កំពង់ផែ ការដឹកជញ្ជូនផ្លូវដែក និងប្រព័ន្ធដឹកជញ្ជូនក្នុងទីក្រុង ជាពិសេសការដឹកជញ្ជូនតាមផ្លូវទឹក។
លោកទេសរដ្ឋមន្ត្រី ស៊ុន ចាន់ថុល បានស្នើឲ្យធនាគារ CDB ពិនិត្យលទ្ធភាពផ្តល់ការគាំទ្រផ្នែក ហិរញ្ញវត្ថុលើយុទ្ធនាការផ្សព្វផ្សាយសាធារណៈអំពីគ្រោះថ្នាក់ចរាចរណ៍ ការផ្សព្វផ្សាយតាមទូរទស្សន៍ពី ផលលំបាក និងការខាតបង់ដោយសារគ្រោះថ្នាក់ចរាចរណ៍ យុទ្ធនាការចែកមួកសុវត្ថិភាពចរាចរណ៍ និងយុទ្ធនាការផ្សេងៗថែមទៀត ដើម្បីកាត់បន្ថយគ្រោះថ្នាក់ចរាចរណ៍ ស្របតាមប្រសាសន៍ដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា “ថ្ងៃនេះ ថ្ងៃស្អែក កុំឲ្យមានគ្រោះថ្នាក់ចរាចរណ៍”។
សូមជម្រាបជូនថា ធនាគារអភិវឌ្ឍន៍ចិន (CDB) ជាធនាគារឯកជនរបស់រដ្ឋក្រោមការដឹកនាំផ្ទាល់ពី ក្រុមប្រឹក្សារដ្ឋចិន បច្ចុប្បន្នធនាគារ CDB បានផ្តល់ហិរញ្ញប្បទានដល់គម្រោងធំៗចំនួនពីរនៅកម្ពុជា គឺ គម្រោងផ្លូវល្បឿនលឿនភ្នំពេញ-ក្រុងព្រះសីហនុ និងគម្រោងព្រលានយន្តហោះសៀមរាបថ្មី លើសពីនេះទៀត CDB ចាប់អារម្មណ៍ក្នុងការវិនិយោគលើអាកាសយានដ្ឋានភ្នំពេញថ្មី និងការអភិវឌ្ឍមជ្ឈមណ្ឌលភស្តុភារកម្ម និងកំពង់ផែក្រុងព្រះសីហនុផងដែរ៕
