នៅក្នុងអំឡុងនៃកិច្ចប្រជុំផ្លូវថ្នល់ពិភពលោកលើកទី២៦ ពីថ្ងៃទី៦ ដល់ទី១០ ខែតុលាឆ្នាំ២០១៩ នៅរាជធានីអាប៊ូដាប៊ី នៃសហរដ្ឋអារ៉ាប់អ៊ីមមីរេត ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចូលរួមកិច្ចប្រជុំ និងជួបពិភាក្សា ជាមួយព្រះរាជបុត្រា ថ្នាក់ដឹកនាំ និងឥស្សរជនសំខាន់ៗ របស់ពិភពលោក រួមមាន៖ - ចូលរួមជាមួយរដ្ឋមន្រ្តីហេដ្ឋារចនាសម្ព័ន្ធ និងដឹកជញ្ជូននៃប្រទេសសមាជិកសមាគមផ្លូវថ្នល់ពិភពលោក ចូលគាល់សម្តែងការគោរពគួរសមចំពោះព្រះបុត្រាស្នងរាជ (Crown Prince of Abu Dhabi) អាប៊ូដាប៊ី និងជាអគ្គមេបញ្ជាការរងកងកម្លាំងប្រដាប់អាវុធសហរដ្ឋអារ៉ាប់អ៊ីមមីរេត Sheikh Mohamed Bin Zayed Al Nahyan នៅព្រះរាជវាំង Al Nahyan ។ - ជួបពិភាក្សាជាមួយឯកឧត្តម Claude Van Tooten ប្រធានសមាគមផ្លូវថ្នល់ពិភពលោក និងលោក Patrick Mallejacq លោក Robin Sébille អគ្គលេខាធិការ និងអគ្គលេខាធិការរង នៃសមាគមផ្លូវថ្នល់ពិភពលោក។ ភាគីទាំងពីរបានទទួលស្គាល់អំពីសារៈសំខាន់នៃកិច្ចប្រជុំផ្លូវថ្នល់ ពិភពលោកដែលត្រូវបានកំណត់ធ្វើឡើងរាល់៤ឆ្នាំម្តង គឺជាព្រឹត្តការណ៍ដ៏សំខាន់សម្រាប់ពិភាក្សា ផ្លាស់ប្តូរយោបល់ អំពីបទពិសោធន៍ បច្ចេកទេស បច្ចេកវិទ្យា និងការរកឃើញថ្មីៗ នៃការអនុវត្ត និងការអភិវឌ្ឍវិស័យហេដ្ឋារចនាសម្ព័ន្ធដឹកជញ្ជូន ផ្លូវ ថ្នល់ ស្ពាន លូទឹក និងឧបសគ្គនានារបស់ប្រទេសសមាជិកទាំងអស់ ឆ្ពោះទៅការអភិវឌ្ឍសេដ្ឋកិច្ច-សង្គមរបស់ប្រទេសនីមួយៗ របស់តំបន់ និងពិភពលោកទាំងមូល។ ឯកឧត្តម Claude Van Tooten បានសម្តែងអំណរគុណចំពោះរាជរដ្ឋាភិបាលកម្ពុជា ដែលបានបញ្ជូនគណៈប្រតិភូមកចូលរួមកិច្ចប្រជុំដ៏សំខាន់នេះ និងបានពិភាក្សាអំពីកិច្ចសហប្រតិបត្តិការរវាងសមាគម និងកម្ពុជាសម្រាប់ពេលអនាគត ជាពិសេស លើគម្រោងសិក្ខាសាលា និងការកសាងសមត្ថភាពលើវិស័យហេដ្ឋារចនាសម្ព័ន្ធដឹកជញ្ជូន និងសុវត្ថិភាពចរាចរណ៍។ ឯកឧត្តមទេសរដ្ឋមន្ត្រីបានស្វាគមន៍ចំពោះគម្រោងខាងលើ និងបានស្នើសមាគមផ្លូវថ្នល់ពិភពលោកពិភាក្សាបន្ថែមជាមួយមន្ត្រីជំនាញក្រសួងសាធារណការនិងដឹកជញ្ជូន។ ឯកឧត្តមទេសរដ្ឋមន្ត្រីបានអញ្ជើញឯកឧត្តមប្រធានសមាគមផ្លូវថ្នល់ពិភពលោកមកធ្វើទស្សនកិច្ចនៅកម្ពុជា និងចូលរួមធ្វើជាវាគ្មិនក្នុងសិក្ខាសាស្តីពីការចល័តការដឹកជញ្ជូនរៀបចំដោយក្រសួងសាធារណការ និងដឹកជញ្ជូន សហការជាមួយអង្គការ UNDP នៅរាជធានីភ្នំនាពេលខាងមុខ។ - ជួបពិភាក្សាជាមួយលោកបណ្ឌិត Young Tae Kim អគ្គលេខាធិការនៃវេទិកាដឹកជញ្ជូនអន្តរជាតិដែលមានលេខាធិការដ្ឋាននៅក្នុងប្រទេសអាឡឺម៉ង់ ។ ឯកឧត្តមទេសរដ្ឋមន្ត្រីបានជម្រាបអំពីស្ថានភាពនយោបាយ សង្គម និងភាពរីកលូតលាស់សេដ្ឋកិច្ចនៅកម្ពុជា ក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ជាការឆ្លើយតប លោកបណ្ឌិតអគ្គលេខាធិការបានសម្តែងនូវការកោតសរសើរ ចំពោះភាពរីកចំរើនរបស់ប្រទេសកម្ពុជា ដែលមានភាពខុសគ្នាឆ្ងាយពីពេលដែលលោកបណ្ឌិតបានមកធ្វើទស្សនកិច្ចនៅកម្ពុជាកាលពី១០ឆ្នាំមុន។ ជាមួយនឹងភាពរីកចម្រើននេះ លោកបណ្ឌិតបានផ្តល់យោបល់ថា កម្ពុជា គួរខិតខំអភិវឌ្ឍបន្ថែមទៀតលើវិស័យហេដ្ឋារចនាសម្ព័ន្ធ និងដឹកជញ្ជូន ដែលវិស័យជាវិស័យស្នូលនៃ សេដ្ឋកិច្ចជាតិ។ ជាមួយគ្នានេះ លោកបណ្ឌិតបានណែនាំគណៈប្រតិភូកម្ពុជាអំពីវេទិកាដឹកជញ្ជូនអន្តរជាតិ ដែលជាអង្គការអន្តររដ្ឋាភិបាលមួយ ដែលមានប្រទេសសមាជិកចំនួន ៦០ និងជាមេគំនិត សម្រាប់គោលនយោបាយដឹកជញ្ជូន ហើយជាអង្គការតែមួយគត់សម្រាប់ពិភាក្សាគោលនយោបាយដឹកជញ្ជូនគ្រប់ប្រភេទ ដើម្បីជំរុញកំណើនសេដ្ឋកិច្ច ចីរភាពបរិស្ថាន និងសុខដុមនីយកម្មសង្គម។ ស្ថាប័ននេះគឺជាអ្នកសម្របសម្រួល និងរៀបចំកិច្ចប្រជុំថ្នាក់រដ្ឋមន្ត្រីដឹកជញ្ជូនជារៀងរាល់ឆ្នាំ។ ដូចនេះ លោកបណ្ឌិត សូមអញ្ជើញកម្ពុជាចូលជាសមាជិកនៃវេទិកាដឹកជញ្ជូនអន្តរជាតិ ដើម្បីជួយជំរុញវិស័យដឹកជញ្ជូន ក៏ដូចជាសេដ្ឋកិច្ចកម្ពុជា។ ភាគីទាំងពីរក៏បានពិភាក្សាលើកិច្ចសហប្រតិបត្តិការរវាងវេទិកាដឹកជញ្ជូនអន្តរជាតិ និងកម្ពុជានៅពេលអនាគតផងដែរ។ - ចូលរួមកិច្ចប្រជុំថ្នាក់រដ្ឋមន្ត្រីស្តីពីភាពវៃឆ្លាតសិប្បនិម្មិតសម្រាប់ហេដ្ឋារចនាសម្ព័ន្ធផ្លូវថ្នល់ កិច្ចប្រជុំស្តីពីការធ្វើផែនការប្រើប្រាស់ដីសម្រាប់ហេដ្ឋារចនាសម្ព័ន្ធផ្លូវថ្នល់ កិច្ចប្រជុំគណៈកម្មាធិការស្តីពីភាពធន់របស់ហេដ្ឋារចនាសម្ព័ន្ធផ្លូវថ្នល់ កិច្ចប្រជុំគណៈកម្មការស្តីពីនិរន្តរភាពនៃការក្រាលថ្ម កិច្ចប្រជុំគណៈកម្មាធិការស្តីពីសុវត្ថភាពចរាចរណ៍ និងកិច្ចប្រជុំគណៈកម្មាធិការស្តីពីដំណោះស្រាយការដឹកជញ្ជូនប្រកបដោយគំនិតច្នៃប្រឌិត។ - ចូលរួមការទស្សនាពិព័រណ៍ហេដ្ឋារចនាសម្ព័ន្ធផ្លូវថ្នល់អាប៊ូដាប៊ី ២០១៩ ដែលមានការចូលរួមតាំងផលិតផលហេដ្ឋារចនាសម្ព័ន្ធផ្លូវថ្នល់២០០ស្តង់ពីប្រទេសសមាជិកនៃសមាគមផ្លូវថ្នល់ពិភពលោក។ - កិច្ចប្រជុំបានឯកភាពលើរបាយការណ៍របស់ក្រុមប្រឹក្សាផ្លូវថ្នល់ពិភពលោក និងបានអនុម័តលើផែនការយុទ្ធសាស្ត្រ ២០២០-២០២៣ របស់សមាគមផ្លូវថ្នល់ពិភពលោក ព្រមទាំងបានឯកភាពបន្តសុពលភាពឯកឧត្តម Patrick Mallejacq ជាអគ្គលេខាធិការ នៃសមាគមផ្លូវថ្នល់ពិភពលោក សម្រាប់អាណត្តិ២០២០-២០២៣ ៕