ថ្ងៃចន្ទ ៩កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៧ ខែតុលា ឆ្នាំ២០១៩ លោកជំទាវ ម៉ម រមនា រដ្ឋលេខាធិការ នៃក្រសួងសាធារណការ និងដឹកជញ្ជូន បានអញ្ជើញបើកសិក្ខាសាលាពិគ្រោះយោបល់ស្ដីពីការអនុវត្តថវិកាតាមកម្មវិធីផ្សារភ្ជាប់ទៅនឹងការប្រែប្រួលអាកាសធាតុ នៅសណ្ឋាគារហ៊ីម៉ាវារី ដោយមានការចូលរួមពីក្រសួងស្ថាប័នពាក់ព័ន្ធផងដែរ។ សិក្ខាសាលានេះធ្វើឡើងដើម្បីចែករំលែកបទពិសោធន៍ ចំណេះដឹង និងពង្រឹងការអនុវត្តការងារប្រែប្រួលអាកាសធាតុទៅក្នុងថវិកាតាមកម្មវិធីលើវិស័យហេដ្ឋារចនាសម្ព័ន្ធដឹកជញ្ជូន។ ថ្លែងនៅក្នុងពិធីបើកសិក្ខាសាលានេះ លោកជំទាវ បានមានប្រសាសន៍ថា ការរៀបចំផែនការថវិកាតាមកម្មវិធីផ្សារភ្ជាប់ទៅនឹងបម្រែបម្រួលអាកាសធាតុ គឺជាបរិបទថ្មីមួយទៀត ដែលតម្រូវឱ្យអ្នករៀបចំផែនការមានការគិតគូរវែងឆ្ងាយគ្រប់ជ្រុងជ្រោយ គណនេយ្យភាព និងប្រកបដោយការទទួលខុសត្រូវខ្ពស់ ព្រមទាំងធានាបាននូវគុណភាព និងប្រសិទ្ធភាពគម្រោងនីមួយៗ។ ដូចនេះ សិក្ខាសាលានេះ គឺជាវេទិកាមួយសម្រាប់ការបញ្ចេញយោបល់ក្នុងន័យស្ថាបនា ដើម្បីប្រសិទ្ធភាព និងសុក្រិត្យភាពក្នុងការរៀបចំផែនកាថវិកាដែលផ្ដោតទៅលើការប្រែប្រួលអាកាសធាតុ ក្នុងអង្គភាពរស់ខ្លួន។ លើសពីនេះទៅទៀត លោកជំទាវរដ្ឋលេខាធិការ បានគូសបញ្ជាក់ថា ការអភិវឌ្ឍហេដ្ឋារចនាសម្ព័ន្ធដឹកជញ្ជូន បានរួមចំណែកយ៉ាងសកម្ម និងមានប្រសិទ្ធភាពក្នុងការអភិវឌ្ឍសេដ្ឋកិច្ចជាតិ និងកាត់បន្ថយអត្រាភាពក្រីក្រឱ្យតិចបំផុត ស្របតាមផែនការយុទ្ធសាស្ត្រចតុកោណដំណាក់កាលទី៤របស់រាជរដ្ឋាភិបាល។ ជាមួយគ្នានោះផងដែរ ថ្លែងក្នុងឱកាសបិទសិក្ខាសាលា ឯកឧត្ដម សឿន ប៊ុនលី អគ្គនាយក នៃអគ្គនាយកដ្ឋានផែនការ និងគោលនយោបាយនៃក្រសួងសាធារណការ និងដឹកជញ្ជូន បានមានប្រសាសន៍ថា លទ្ធផលនៃសិក្ខាសាលានេះ គឺពិតជាផ្ដល់នូវចំណេះដឹង និងជាមួលដ្ឋានក្នុងការរៀបចំផែនការថវិកាតាមកម្មវិធីប្រចាំឆ្នាំ ដែលមានបញ្ចូលនូវផែនការសកម្មភាព និងចង្កោមសកម្មភាព ដោយផ្សារភ្ជាប់នឹងការប្រែប្រួលអាកាសធាតុដែលជាបរិបទថ្មីក្នុងយុគ្គសម័យភាពជាអ្នកដឹកនាំនៃបដិវត្តន៍ឧស្សាហកម្មជំនាន់ ៤.០ និងការឈានទៅដល់ភាពជោគជ័យនៃសកលភាវូបនីយកម្ម។ ឯកឧត្ដមអគ្គនាយក បានថ្លែងអំណគុណយ៉ាងជ្រាលជ្រៅចំពោះសិក្ខាកាមមកពីក្រសួងស្ថាប័នពាក់ព័ន្ធដែលបានយកចិត្តទុកដាក់ត្រងត្រាប់ស្ដាប់បទបង្ហាញ និងបានចូលរួមជាមតិយោបល់ ព្រមទាំងសួរដេញដោលយ៉ាងផុសផុល សំដៅឱ្យការរៀបចំ និងការអនុវត្តគម្រោងនេះ មានប្រសិទ្ធភាព និងប្រសិទ្ធផលខ្ពស់៕