ថ្ងៃព្រហស្បតិ៍ ៥កើត ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី០៣ ខែតុលា ឆ្នាំ២០១៩ នៅទីស្ដីការក្រសួងសាធារណការ និងដឹកជញ្ជូន ឯកឧត្តមទេសរដ្ឋមន្ត្រី ស៊ុន ចាន់ថុល បានទទួលជួបសម្តែងការគួរសមពីសំណាក់ប្រតិភូសមាគមនាវាយុវជនអាស៊ីអាគ្នេយ៍ ដោយមានការចូលរួមពីថ្នាក់ដឹកនាំជាន់ខ្ពស់ក្រសួងផងដែរ។ ជំនួបនេះធ្វើឡើងដើម្បី ទទួលបានពុទ្ធិ និងអនុសាសន៍ល្អៗ ពីឯកឧត្ដមទេសរដ្ឋមន្ត្រី មុននឹងធ្វើដំណើរទៅចូលរួមក្នុងកម្មវិធីនាវាយុវជនអាស៊ីអាគ្នេយ៍ និងជប៉ុន (SSEAYP) លើកទី៤៦ ឆ្នាំ២០១៩។ ដើម្បីជាពុទ្ធិសម្រាប់យុវជនទាំងនោះ ឯកឧត្ដមទេសរដ្ឋមន្ត្រី បានជម្រាបជូនយុវជនអាស៊ីអាគ្នេយ៍ និងជប៉ុន អំពីវិស័យសាធារណការ និងដឹកជញ្ជូន ដែលរួមមានដំណើរនៃការសាងសង់ផ្លូវទៅតាមធនធានថវិកា ភាពចំបាច់ និងតាមចក្ខុវិស័យរបស់រាជរដ្ឋាភិបាល ដូចជាដំបូងយើងត្រូវសាងសង់ផ្លូវជាប្រភេទ DBST ដើម្បីសម្រួលដល់ការធ្វើពាណិជ្ជកម្ម និងការធ្វើដំណើរ ជាពិសេសត្រូវតភ្ជាប់តំបន់ទាំងអស់នៅទូទាំងប្រទេស បន្ទាប់មក យើងត្រូវលើកកម្ពស់ទៅជាផ្លូវបេតុងកៅស៊ូ (AC) និងពង្រីកផ្លូវទៅតាមប្រភេទផ្លូវសេដ្ឋកិច្ចជាដើម។ ជាមួយគ្នានោះដែរ ឯកឧត្ដមទេសរដ្ឋមន្ត្រីក៏បានជម្រាបជូននាវាយុវជនអាស៊ីអាគ្នេយ៍ និងជប៉ុន អំពីការសាងសង់ផ្លូវល្បឿនលឿនភ្នំពេញ-ខេត្តព្រះសីហនុ ការលើកកម្ពស់ផ្លូវពី DBST ទៅជា AC និងពង្រីកពី ២គន្លង ទៅ៤គន្លង ដូចជាផ្លូវជាតិលេខ ១, ២, ៣, ៤, ៥, ៧, ៨ និងផ្លូវអាទិភាពផ្សេងៗទៀតជាច្រើន។ ខណៈផ្លូវដែកទាំងពីរខ្សែត្រូវបានតភ្ជាប់ ជាពិសេសត្រូវបានតភ្ជាប់ជាមួយផ្លូវដែកថៃ និងការដឹកជញ្ជូនតាមផ្លូវទឹក។ ឯកឧត្ដមទេសរដ្ឋមន្ត្រី បានជំរុញឱ្យបងប្អូនប្រជាពលរដ្ឋប្រើប្រាស់សេវាដឹកជញ្ជូនតាមផ្លូវទឹកព្រោះមិនស្ទះចរាចរណ៍ មានច្រើនគន្លង ជាពិសេសគឺមិនមានជង្ហុកសំបុកមាន់ឡើយ។ លើសពីនេះទៅទៀត ឯកឧត្ដមទេសរដ្ឋមន្ត្រីក៏បានបង្ហាញពីគម្រោងអភិវឌ្ឍកំពង់ផែទឹកជ្រៅនៅក្រុងព្រះសីហនុ ដែលមានជម្រៅទឹករហូតដល់១៤,៥ម៉ែត្រ ដែលអាចឱ្យកប៉ាល់ធំប្រមាណ៩៣% ក្នុងពិភពលោកអាចចូលចតបាន។ ទន្ទឹមនឹងការសាងសង់ហេដ្ឋារចនាសម្ព័ន្ធដឹកជញ្ជូន ក្រសួងនឹងរកគ្រប់មធ្យោបាយ និងនីតិវិធីក្នុងការផ្ដល់សេវាសាធារណៈឱ្យស្របតាមប្រសាសន៍របស់សម្ដេចតេជោនាយករដ្ឋមន្ត្រី គឺធ្វើឱ្យបានលឿន ធ្វើឱ្យមានប្រសិទ្ធភាព និងធ្វើឱ្យមានតម្លាភាព។ ជាក់ស្ដែងក្រសួងបានប្រើប្រព័ន្ធស្វ័យប្រវត្តិកម្ម កម្មវិធីសិក្សាទ្រឹស្ដីនៃការបើកបរតាមទូរសព្ទ កម្មវិធីថែទាំផ្លូវ ឈៀកចល័ត និងបើកមណ្ឌលផ្ដល់សេវាសាធារណៈនៅតាមផ្សារទំនើបអ៊ីអនទាំងពីរសាខា ជាដើម។ ឆ្លើយតបទៅនឹងសំណួររបស់យុវជនអាស៊ីអាគ្នេយ៍ និងជប៉ុន ទាក់ទងនឹងមហិច្ឆិតាក្នុងការកសាងសមិទ្ធផលនានាដើម្បីប្រយោជន៍ជាតិនាពេលបន្តបន្ទាប់ ឯកឧត្តមទេសរដ្ឋមន្ត្រី បានមានប្រសាសន៍ថា ឯកឧត្ដមចង់ កសាងប្រព័ន្ធដឹកជញ្ជូនសាធារណៈដូចជា រថភ្លើងលើអាកាស ឬក្រោមដី រថភ្លើងពីភ្នំពេញ-ហូជីមិញ រថភ្លើងពីភ្នំពេញ-សៀមរាប-ប៉ោយប៉ែត និងហេដ្ឋារចនាសម្ព័ន្ធផ្សេងៗទៀត។ ឯកឧត្ដមទេសរដ្ឋមន្ត្រីបានផ្ដាំផ្ញើឱ្យយុវជនអាស៊ីអាគ្នេយ៍ និងជប៉ុន ដោយលើកយកសុភាសិតមួយចំនួនដូចជា នៅផ្ទះម្ដាយទីទៃ នៅព្រៃម្ដាយតែមួយ និងសំដីឥតប្រយោជន៍នាំឱ្យគ្រោះថ្នាក់ដល់ជាតិជាដើម ជាពិសេសបានណែនាំឱ្យយុវជនអាស៊ីអាគ្នេយ៍ និងជប៉ុនប្រកាន់នូវឥរិយាបថថ្លៃថ្នូរក្នុងនាមជាអ្នកតំណាងប្រទេសជាតិ ទំនាក់ទំនងល្អដើម្បីបង្កើនកិច្ចសហការ និងទាក់ទាញវិនិយោគិនដើម្បីអភិវឌ្ឍខ្លួនឯង គ្រួសារ និងប្រទេសជាតិ ៕