កំពង់ឆ្នាំងៈ អនុគណៈកម្មការសុវត្ថិភាពចរាចរណ៍ខេត្តកំពង់ឆ្នាំង ដឹកនាំដោយ អភិបាលខេត្តកំពង់ឆ្នាំង លោក ឈួ ចន្ទ័ឌឿន និងអនុរដ្ឋលេខាធិការក្រសួងសាធារណការ និងដឹកជញ្ជូនលោក ប៉ាល់ ចន្ទ័តារា នៅថ្ងៃទី២២ ខែកញ្ញា ឆ្នាំ២០១៩ បានចុះធ្វើការផ្សព្វផ្សាយពីសុវត្ថិភាពចរាចរណ៍ដល់ប្រជាពលរដ្ឋនៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង។ អភិបាលខេត្តកំពង់ឆ្នាំងលោក ឈួចន្ទ័ឌឿន មានប្រសាសន៍ឲ្យដឹងថា ក្នុងឱកាសបុណ្យកាន់បិណ្ឌ និង ភ្ជុំបិណ្ឌនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចុះធ្វើយុទ្ធនាការផ្សព្វផ្សាយ និងអប់រំណែនាំស្តីអំពីសុវត្ថិភាពចរាចរណ៍នៅតាមចំណតរថយន្ត ផ្លូវជាតិសំខាន់ៗដូចជា ផ្លូវជាតិ ទីប្រជុំជន ស្តីពីការអប់រំច្បាប់ ចរាចរណ៍ផ្លូវគោក និង ចុះរឹតបន្តឹងអនុវត្តច្បាប់ចរាចរណ៍ផ្លូវគោកគ្នុងភូមិសាស្រ្តខេត្តកំពង់ឆ្នាំង ដើម្បីធានាអោយអត្រាគ្រោះថ្នាក់ចរាចរណ៍នៅកម្រិតទាបបំផុត ។ ក្នុងឱកាសនោះ លោក ប៉ាល់ ច័ន្ទតារ៉ា រដ្ឋលេខាធិការក្រសួងសាធារណការ និងដឹកជញ្ជូន បានគូសបញ្ជាក់ថា ករណីគ្រោះករណីគ្រោះថ្នាក់ចរាចរណ៍អាចនឹងកើនឡើងខ្ពស់ក្នុងឱកាសនៃពិធីបុណ្យជាតិធំៗ ដោយសារក្នុងពេលនេះ កំណើននៃការប្រើប្រាស់ផ្លូវមានកាន់តែច្រើន។ ដូច្នេះបងប្អូនប្រជាពលរដ្ឋទាំងអស់ត្រូវចូលរួមគោរពច្បាប់ចរាចរណ៍អោយបានទាំងអស់គ្នា ដើម្បីឈានទៅកាត់បន្ថយអត្រាគ្រោះថ្នាក់ចរាចរណ៍ឲ្យនៅកម្រិតទាប និងទប់ស្កាត់ការបាត់បង់អាយុជីវិតរបស់ប្រជាពរដ្ឋដែលបង្កឡើងដោយកត្តាហានិភ័យនេះ។ រដ្ឋលេខាធិការកនរសួងសាធារណះការ និងដឹកជញ្ជូនបានបញ្ជាក់ទៀតថា មុននឹងបើកបរត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វ្រាំង ភ្លើងបំភ្លឺ ជាដើម។ ជាមួយគ្នានេះ ក៏កុំផ្ទុកអ្នកដំណើរឬទំនិញលើសច្បាប់កំណត់ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្ត, ត្រូវពាក់ខ្សែក្រវាត់សុវត្ថិភាពជានិច្ចក្នុងពេលធ្វើដំណើរតាមរថយន្ត, ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច ។ នៅក្នុងឱកាសនោះ គណអធិបតីបានចែកមួកសុវត្ថិភាពដល់ប្រជាពលរដ្ឋចំនួន១៥០មួកផងដែរ ៕