នាថ្ងៃពុធ ១៣រោច ខែស្រាពណ៍ ឆ្នាំកុរ ឯកសក ព.ស.២៥៦៣ ត្រូវនឹងថ្ងៃទី២៨ ខែសីហា ឆ្នាំ២០១៩ នៅទីស្ដីការក្រសួង ឯកឧត្តម ពៅ ម៉ាលី រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងកិច្ចប្រជុំផ្សព្វផ្សាយអំពីការប្រើប្រាស់យានយន្តនៅក្នុងព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំ មន្ត្រីរាជការពាកព័ន្ធ ក្រុមហ៊ុនលក់យានយន្ត និងក្រុមហ៊ុនផ្ដល់សេវាត្រួតពិនិត្យលក្ខណៈបច្ចេកទេសយានជំនិះ។ កិច្ចប្រជុំនេះរៀបចំឡើង ដើម្បីផ្សព្វផ្សាយខ្លឹមសារអនុក្រឹត្យ និងប្រកាសស្តីពីបែបបទ និងនីតិវិធីនៃការចុះបញ្ជីយានជំនិះ ការផ្តល់ផ្លាកលេខសម្គាល់យានជំនិះ និងការលុបយានជំនិះចេញពីបញ្ជីយានជំនិះដល់បណ្តាក្រុមហ៊ុនលក់យានយន្ត និងអ្នកពាក់ព័ន្ធ។ ឯកឧត្ដមរដ្ឋលេខាធិការក៏បានស្នើឱ្យក្រុមហ៊ុនត្រួតពិនិត្យលក្ខណៈបច្ចេកទេស ឃាត់នូវរាល់រថយន្ដទាំងឡាយដែលកែច្នៃខុសលក្ខណៈបច្ចេកទេសទុក ដើម្បីជៀសវាងការបង្កគ្រោះថ្នាក់ចរាចរណ៍។ លើសពីនេះទៅទៀត ក្នុងកិច្ចប្រជុំនេះក៏បានពិភាក្សាទៅលើការមិនអនុញ្ញាតចុះបញ្ជីយានយន្តចង្កូតស្តាំ ចំពោះយានយន្ដដែលចុះបញ្ជីជាសហកម្មសិទ្ធិអាចធ្វើការលក់បានលុះត្រាតែបង់រំលោះអស់ ផ្លាកលេខយានយន្ដអាចធ្វើការស្នើសុំរក្សាលេខទុកបាន និងបញ្ហានាំចូលគ្រឿងបន្លាស់យានយន្តដែលត្រូវមានការអនុញ្ញាតិពីក្រសួង។ ជាមួយគ្នានេះផងដែរ ឯកឧត្ដមរដ្ឋលេខាធិការ បានស្នើសុំឱ្យវិស័យឯកជន ដូចជាហាងលក់យានយន្ដទាំងអស់សហការជាមួយក្រសួងក្នុងការចុះបញ្ជីយានយន្ដ សូមកុំឱ្យមានការកែច្នៃយានយន្ដខុសលក្ខណៈបច្ចេកទេសយានយន្ដ និងក្នុងករណីមានការនាំចូលគ្រឿងបន្លាស់ សូមធ្វើការស្នើសុំមកក្រសួង ៕