ថ្ងៃពុធ ៨កើត ខែស្រាពណ៍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី០៨ ខែសីហា ឆ្នាំ២០១៩ លោកជំទាវ កុយ សុដានី រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំកិច្ចប្រជុំស្តីអំពីការសិក្សាបុរេសមិទ្ធិលទ្ធភាពលើគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ជាមួយក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោក ដោយមានការចូលរួមពី តំណាងកំពង់ផែស្វយ័តក្រុងព្រះសីហនុ តំណាងកំពង់ផែស្វយ័តភ្នំពេញ មន្ត្រីជាន់ខ្ពស់ក្រសួង និងភាគីពាក់ព័ន្ធផងដែរ។ ជាកិច្ចចាប់ផ្តើម ក្រុមទីប្រឹក្សារបស់ស្ថាប័នសាជីវកម្មហិរញ្ញវត្ថុ (IFC) របស់ធនាគារពិភពលោកបានធ្វើបទបង្ហាញអំពីបច្ចុប្បន្នភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុងព្រះសីហនុ ដោយផ្តោតជាសំខាន់លើការវិភាគស្ថានភាពច្បាប់ និងស្ថាប័នដែលគាំទ្រដល់រចនាសម្ព័ន្ធភាពជាដៃគូរដ្ឋ និងឯកជន (Public-Private Partnership) ទិដ្ឋ ភាពច្បាប់ទាក់ទងនឹងប្រតិបត្តិការកំពង់ផែ និងតំបន់សេដ្ឋកិច្ចពិសេស និងទិដ្ឋភាពបច្ចេកទេសផងដែរ ។ គម្រោងនេះមានគោលបំណងអភិវឌ្ឍក្រុងព្រះសីហនុជាមជ្ឈមណ្ឌលភស្តុភារកម្មដ៏ធំមួយនៅកម្ពុជា ធានាដល់ការអភិវឌ្ឍសេដ្ឋកិច្ច សង្គម និងបរិស្ថានប្រកបដោយចីរភាព ធានាឱ្យមានការគាំទ្រផ្នែកហេដ្ឋារចនាសម្ព័ន្ធចាំបាច់ដើម្បីជំរុញការប្រកួតប្រជែងក្នុងការដឹកជញ្ជូន ដែលនឹងត្រូវអនុវត្តតាមរយៈភាពជាដៃគូរដ្ឋ និងឯកជន (PPP)ផងដែរ។ លោកជំទាវរដ្ឋលេខាធិការ បានជំរុញឱ្យសមាជិកសមាជិកានៃគណៈកម្មាធិការជាតិភស្តុភារកម្ម និងភាគីពាក់ព័ន្ធផ្តល់ធាតុចូលសំខាន់ៗដើម្បីឱ្យគម្រោងសិក្សានេះទទួលបានលទ្ធផលល្អ និងដាក់ជូនថ្នាក់ដឹកនាំក្រសួងធ្វើការពិនិត្យ ឈានទៅបង្កើតមជ្ឈមណ្ឌលភស្តុភារកម្មក្រុងព្រះសីហនុប្រកបដោយជោគជ័យ។ សូមជម្រាបជូនថា៖ រាជរដ្ឋាភិបាលកម្ពុជាកំពុងពិនិត្យលទ្ធភាពអភិវឌ្ឍមជ្ឈមណ្ឌលភស្តុភារកម្មចំនួនបួន ដែលក្នុងនោះរួមមាន៖ មជ្ឈមណ្ឌលភស្តុភារកម្មភ្នំពេញ មជ្ឈមណ្ឌលភស្តុភារកម្មក្រុងព្រះសីហនុ មជ្ឈមណ្ឌលភស្តុភារកម្មប៉ោយប៉ែត និងមជ្ឈមណ្ឌលភស្តុភារកម្មបាវិត ដើម្បីជំរុញការប្រកួតប្រជែង និងកាត់បន្ថយថ្លៃដើមដឹកជញ្ជូន៕