ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំគណៈប្រតិភូថ្នាក់ដឹកនាំ និងមន្ដ្រីរាជការក្រសួងសាធារណការ និងដឹកជញ្ជូន ចូលរួមគោរពវិញ្ញាណក្ខន្ធក្នុងពិធីបុណ្យសពគម្រប់៧ថ្ងៃរបស់ឧបាសិកា គិន ហែ ត្រូវជាម្តាយបង្កើត ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ --- ថ្ងៃអង្គារ ១៤រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី៣០ ខែកក្កដា ឆ្នាំ២០១៩ ឯកឧត្តមទេសរដ្ឋមន្ត្រី ស៊ុន ចាន់ថុល បានអញ្ជើញដឹកនាំគណៈប្រតិភូថ្នាក់ដឹកនាំ និងមន្ដ្រីរាជការក្រសួងសាធារណការ និងដឹកជញ្ជូន ចូលរួមគោរពវិញ្ញាណក្ខន្ធ ឧបាសិកា គិន ហែ ដែលបានទទួលមរណភាព កាលពីថ្ងៃព្រហស្បតិ៍ ៩រោច ខែអាសាឍ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី២៥ ខែកក្កដា ឆ្នាំ២០១៩ វេលាម៉ោង ១២:០០នាទីថ្ងៃត្រង់ ក្នុងជន្មាយុ ៩៨ឆ្នាំ ដោយរោគាពាធ។ មរណភាពរបស់ឧបាសិកា គិន ហែ គឺជាការបាត់បង់នូវម្តាយបង្កើត ម្តាយក្មេក និងជីដូនជាទីគោរព ស្រឡាញ់ដ៏ជ្រាលជ្រៅរបស់ក្រុមគ្រួសារ ដែលប្រកបដោយព្រហ្មវិហារធម៌ និងសណ្តោសប្រោសប្រណីចំពោះកូនចៅទាំងអស់។ សូមឧទ្ទិសបួងសួងដល់វត្ថុស័ក្តិសិទ្ធក្នុងលោក ជួយលើកស្ទួយដួងវិញ្ញាណក្ខន្ធរបស់ឧបាសិកា គិន ហែ បានសោយសុខក្នុងសុគតិភពជានិច្ចនិរន្តន៍ ហើយយើងទំាងអស់គ្នាត្រូវខិតខំប្រព្រឹត្តិនូវអំពើល្អ ធ្វើបុណ្យ ដាក់ទាន រួមកម្លំាងគ្នារក្សានូវសុខសន្តិភាព ស្ថិរភាពនយោបាយ ដើម្បីធ្វើការអភិវឌ្ឍប្រទេសជាតិរបស់ យើងឱ្យមានការរីកចម្រើនគ្រប់វិស័យទាំងអាណាចក្រ និងពុទ្ធចក្រ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕