ភ្នំពេញ ៖ លោក ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន បានថ្លែងថា ការបង់ប្រាក់ តាមប្រព័ន្ធឌីជីថល និងនៅតាមគ្រឹះស្ថាន ដើម្បីបង្ខិតសេវា ឲ្យទៅជិតប្រជាពលរដ្ឋ និងកាត់បន្ថយនីតិវិធី ស្មុគស្មាញ ជាពិសេសកាត់ បន្ថយពេលវេលា ព្រមទាំងលុបបំបាត់ ចំណាយក្រៅផ្លូវការផងដែរ ។ ក្នុងជំនួបពិភាក្សាការងារជាមួយ គណៈប្រតិភូមកពីក្រុមប្រឹក្សាធុរកិច្ច អាមេរិក-អាស៊ាន នៅថ្ងៃទី៨ ខែកក្កដា ឆ្នាំ២០១៩ លោក ស៊ុន ចាន់ថុល មានប្រសាសន៍ថា “ការរៀបចំនីតិវិធី និង ប្រព័ន្ធចុះបញ្ជី លក់លេខពិសេសផ្ទាល់ខ្លួន ដែលមាន៨ខ្ទង់ និងការដេញថ្លៃជាសាធារណៈ ដោយប្រើប្រាស់បច្ចេកវិទ្យា នាយុគសម័យបដិវត្តឧស្សាហកម្មជំនាន់ ៤.០ ជាមួយការបង់ប្រាក់ តាមប្រព័ន្ធឌីជីថល ជាមួយគ្រឹះស្ថានជាដៃគូផងដែរ ក្នុងគោលបំណង បង្ខិតសេវាឲ្យទៅជិតប្រជាពលរដ្ឋ កាត់បន្ថយនីតិវិធីស្មុគស្មាញ កាត់បន្ថយពេលវេលា លុបបំបាត់ចំណាយ ក្រៅផ្លូវការ” ។ ឆ្លៀតឱកាសនោះដែរ រដ្ឋមន្ដ្រីសាធារណការ ជម្រាបជូនគណៈប្រតិភូ អាមេរិក-អាស៊ាន អំពី គម្រោងសិក្សាផ្លូវល្បឿនលឿន ភ្នំពេញ-បាវិត ការសិក្សាគម្រោង Monorail ផ្លូវរថភ្លើងក្រោមដី និង គម្រោង AGT ជាដើម ។ រដ្ឋមន្ដ្រី បន្ដថា គម្រោងទាំងនេះកំពុងបន្ត ក្នុងកិច្ចការងារពង្រឹង សុវត្ថិភាពចរាចរណ៍ ការសិក្សាដើម្បីរៀបចំបទដ្ឋាន សម្រាប់កំណត់អាយុកាល នៃការប្រើប្រាស់យានយន្តបទដ្ឋាន បច្ចេកទេស សម្រាប់យានយន្តត្រូវប្រើប្រាស់ នៅកម្ពុជា ការជំរុញការប្រើប្រាស់យាន យន្តប្រើថាមពលអគ្គិសនី និងការគាំពារបរិស្ថាន ក្រោមកិច្ចសហការជាពី UNDP។ បន្ថែមពីនេះលោកទេសរដ្ឋមន្រ្តី សម្តែងការស្វាគមន៍ចំពោះ បណ្តាក្រុមហ៊ុនសហគ្រាស របស់សហរដ្ឋអាមេរិកទាំងនេះ បង្កើតនិងបន្តកិច្ច សហប្រតិបត្តិការល្អជាមួយសេនាធិការ ក្រសួង ដើម្បីចូលរួមអភិវឌ្ឍកម្ពុជា ឲ្យកាន់តែមានការរីកចម្រើន មួយកម្រិតទៀត ។ ចំណែក លោក Alexander Feldman ប្រធាននៃក្រុមប្រឹក្សាធុរកិច្ច អមដោយគណៈប្រតិភូមកពីក្រុមហ៊ុនអាមេរិកអះអាងថា ដំណើរទស្សនកិច្ចមកកាន់កម្ពុជា នាពេលនេះ មានគោលបំណងពង្រឹងទំនាក់ទំនងរវាងកម្ពុជា (ដៃគូអាស៊ាន) និងសហរដ្ឋអាមេរិក និងដើម្បីជំរុញការ វិនិយោគអាមេរិក បន្ថែមទៀតមកកម្ពុជា ។ ជាងនេះទៅទៀត សមាជិកគណៈប្រតិភូ បានធ្វើបទបង្ហាញពីការចូលរួម និងផែនការសកម្មភាពរបស់ខ្លួន ក្នុងវិស័យហេដ្ឋារចនាសម្ព័ន្ធដឹកជញ្ជូន សុវត្ថិភាពចរាចរណ៍ និងបច្ចេកវិទ្យាព័ត៌មាន ដែលមានការពាក់ព័ន្ធនឹងវិស័យ សាធារណការនិងដឹកជញ្ជូនព្រមទាំងបានបង្ហាញ ពីការស្ម័គ្រចិត្ត ក្នុងការចូលរួមសកម្មភាព ទំនួលខុសត្រូវសង្គម ដែលអាចកើត ចេញពីការធ្វើវិនិយោគ (CSR) ផងដែរ ៕