[Bayon TV] - ឯកឧត្តម ប្រាក់ សុវណ្ណ ណែនាំដល់ក្រុមបច្ចេកទេស កសាងសំណង់ស្ពាន ត្រូវប្រកប ដោយគុណភាព ប្រើប្រាស់ឲ្យបានយូរអង្វែង
2019-07-05
Go to the website published Bayon TV
ព្រះវិហារ ៖ ឱកាស ចុះពិនិត្យមើលការកសាងសមិទ្ធផលនានា ស្រុកឆែប នៅព្រឹកមិញ ឯកឧត្តម ប្រាក់ សុវណ្ណ អភិបាលខេត្តព្រះវិហារ បានណែនាំឲ្យក្រុមការងារបច្ចេកទេស កសាងសំណង់ស្ពាន ឲ្យបានរឹងមាំ ប្រកបដោយគុណភាព ដើម្បីប្រយោជន៍ការប្រើប្រាស់ឲ្យបានយូរអង្វែង។
ការចុះពិនិត្យ កាលពីព្រឹកថ្ងៃទី០៥ ខែកក្កដា ឆ្នាំ២០១៩ អមដំណើរដោយ លោក គោ ស៊ុប៊ុនសឿត អភិបាលរងខេត្ត និងនាំមន្ត្រីរាជការ កងកម្លាំងប្រដាប់អាវុធ និងអាជ្ញាធរដែនដី បានអញ្ជើញចុះពិនិត្យមើលការកសាងសមិទ្ធផលនានា ក្នុងវត្តទ្រីសុធារ៉ាម និងបន្តទៅពិនិត្យការសាងសង់ ស្ពានបេតុង មួយកន្លែង ស្ថិតក្នុងភូមិឆែបមួយ ឃុំឆែបមួយ ស្រុកឆែប ខេត្តព្រះវិហារ ។ ជាមួយគ្នានេះដែរ ឯកឧត្តម ប្រាក់ សុវណ្ណ បានបន្ដណែនាំដល់ ក្រុមកម្មករ ត្រូវមានការប្រុងប្រយ័ត្ន រាល់ការបំពេញការងារ ខ្លាចមានគ្រោះថ្នាក់ជាយថាហេតុណាមួយកើតឡើង។
ឯកឧត្តម អភិបាលខេត្តព្រះវិហារ មានប្រសាសន៍ថា ក្រោមការដឹកនាំរបស់សម្តេចតេជោ ហ៊ុន សែន ជានាយករដ្ឋមន្ត្រី នៃកម្ពុជា បានធ្វើឲ្យប្រទេសជាតិ ទទួលបានសុខសន្តិភាព និងការអភិវឌ្ឍរីកចម្រើនគ្រប់វិស័យ។ ក្នុងនោះ ឯកឧត្តម ប្រាក់ សុវណ្ណ បានអំពាវនាវឲ្យប្រជាពលរដ្ឋ ត្រូវចូលរួមគាំទ្ររាជរដ្ឋាភិបាល គាំទ្រសម្តេចតេជោ ហ៊ុន សែន ធ្វើជានាយករដ្ឋមន្ត្រី នៅអាណត្តិក្រោយៗទៀត ដើម្បីឲ្យប្រទេសជាតិ កាន់តែមានការអភិវឌ្ឍរីកចម្រើនជាងនេះ។
ឯកឧត្តម ប្រាក់ សុវណ្ណ បានសំដែងនូវមនោសញ្ចេតនាសប្បាយរីករាយ ដែលថ្ងៃនេះរូបលោក បានមកជួបសំណេះសំណាល ជាមួយប្រជាពលរដ្ឋ មន្ត្រីរាជការ កងកម្លាំងប្រដាប់អាវុធក្នុងខេត្តព្រះវិហារ បន្ទាប់ពីរូបលោកត្រូវបានថ្នាក់ដឹកនាំ ផ្តល់សេចក្តីទុកចិត្តតែងតាំង ជាអភិបាលខេត្តព្រះវិហារ ជំនួស ឯកឧត្តម អ៊ុន ចាន់ដា ដែលត្រូវផ្ទេរភារកិច្ច ទៅកាន់តំណែងជាអភិបាលខេត្តកំពង់ចាម។
សម្រាប់ លោក សំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានថ្លែងថា ស្ពានបេតុងថ្មី ដែលកំពុងសាងសង់នេះ មានទទឹង១២ម៉ែត្រ និងបណ្តោយ៤៥ម៉ែត្រ ស្ពាននេះជំនួសឲ្យស្ពានឈើចាស់ ដែលមានសភាពទ្រុឌទ្រោម។ លោក សំ លាងទ្រី ប្រធានមន្ទីរ បានបន្តថា ស្ពាននេះ ចាប់ផ្តើមសាងសង់ នៅខែមេសា ឆ្នាំ២០១៨ គ្រោងនឹងបញ្ចប់នៅខែមេសា ឆ្នាំ២០២០ ពោលគឺធ្វើឲ្យរួចរាល់ មុនរដូវបុណ្យចូលឆ្នាំថ្មីប្រពៃណីជាតិ៕
