ភ្នំពេញៈ រដ្ឋបាលរាជធានីភ្នំពេញ បានបន្តឲ្យកម្លាំងចុះធ្វើការផ្លាស់ប្ដូរប្រព័ន្ធលូ នៅតាមមហាវិថី និងវិថីតូចធំ នៅក្នុងមូលដ្ឋានរាជធានីភ្នំពេញ ដើម្បីបង្ហូរទឹកបានលឿនជាងមុន ព្រោះពេលភ្លៀងម្ដងៗ តែងតែលិចរហូតធ្វើអោយបងប្អូនប្រជាពលរដ្ឋ ពិបាកធ្វើដំណើរ និងដើម្បីសោភ័ណភាព នៅក្នុងទីក្រុងភ្នំពេញផងដែរ។ ជាក់ស្ដែង នៅតំបន់ផ្សារមាន់អាំង ផ្លូវលេខ៣១៥ សង្កាត់បឹងកក់២ ខណ្ឌទួលគោក រដ្ឋបាលរាជធានីភ្នំពេញ បន្តគម្រោងការពារទឹកជំនន់ និងកែលម្អប្រព័ន្ធប្រឡាយ លូ ក្នុងរាជរាធានីភ្នំពេញ ជំហានទី៤ ហិរញ្ញប្បទានឥតសំណងពីប្រជាជនជប៉ុនជាសក្ខីភាពនៃមិត្តភាព និងកិច្ចសហប្រតិបត្តិការរវាងប្រទេសជប៉ុន និងព្រះរាជាណាចក្រកម្ពុជា ដាក់បណ្តាញលូមេ ដើម្បីដោះស្រាយទឹកលិច ដូច្នេះតំបន់នោះ មានការប្រឈមនឹងការធ្វើដំណើរចរាចរចង្អៀត ព្រោះស្ថានភាពផ្លូវមួយចំហៀងជាការដ្ឋាន សូមគ្រប់អ្នកបញ្ជាយានយន្តយោគយល់ អព្យាស្រ័យគ្នា និងចូលរួមគោរព នគរបាលចរាចរណ៍ឈរជើងនៅទីតាំងនេះ បញ្ជៀសចរាចរណ៍។ លោក ឯក ឃុនឌឿន អភិបាលនៃគណៈអភិបាលខណ្ឌទួលគោក បានបញ្ជាក់ប្រាប់ កម្មវិធីតាមផ្លូវអោយដឹងបន្ថែមផងដែរថា គម្រោងការពារទឹកជំនន់និងកែលម្អប្រព័ន្ធប្រឡាយ លូ ក្នុងរាជរាធានីភ្នំពេញ ជំហានទី៤ នេះជាគម្រោងរបស់ក្រុម JICA ហិរញ្ញប្បទានឥតសំណងពីប្រជាជនជប៉ុន ជាសក្ខីភាពនៃមិត្តភាព និងកិច្ចសហប្រតិបត្តិការរវាងប្រទេសជប៉ុន និងព្រះរាជាណាចក្រកម្ពុជា ។ លោក អភិបាល បានបន្តទៀតថា នៅតាមបណ្ដោយផ្លូវលេខ៣១៥នេះ គឺមានប្រព័ន្ធពីមុនរួចហើយដែរមាន មុខកាត់លូទំហំ ១ម៉ែត្រកន្លះ តែដោយសារតែនៅតំបន់ផ្លូវលេខ៣១៥នេះ ជាតំបន់ទាបរំដោះប្រភពទឹកពុំទាន់ ដូច្នះ រដ្ឋបាលរាជធានីភ្នំពេញ បានសម្រេចដាក់បណ្តាញលូមេ១ខ្សែបន្ថែមទៀត ដើម្បីដោះស្រាយទឹកលិច ទាន់ពេវេលា។ បន្ថែមពីលើនោះផងដែររដ្ឋបាលរាជធានីភ្នំពេញក៏ដូចជាគណៈបញ្ជាការឯកភាពខណ្ឌទាំង ១៤ខណ្ឌនៅក្នុងរាជធានីភ្នំពេញក៏បានសំណូមពរដល់បងប្អូនប្រជាពលរដ្ឋដែលមានទីលំនៅនៅជាប់ដងផ្លូវជាពិសេសនៅចំណុចដែលមានការដ្ឋានផ្លាស់ប្ដូរប្រព័ន្ធលូនៅចំពីមុខផ្ទះរបស់បងប្អូនសូមបងប្អូនមេត្តាជួយយោគយល់នៅការកក់ស្ទះ និងជួយរៀបចំទុកដាក់សំរាមឱ្យមានរបៀបរៀបរយនិងពិនិត្យមើលគំរបលូនៅមុខផ្ទះរាល់ពេលដែលមានមេឃភ្លៀងធ្លាក់ខ្លាំងនិងសូមជួយសំអាត ដើម្បីកុំអោយមានសំរាមហូរចូលដល់មាត់លូនោះអាចបង្កឲ្យមានការកកស្ទះ៕