ក្រសួងសាធារណការ និងដឹកជញ្ជូនរៀបចំសិក្ខាសាលាពង្រឹងសមត្ថភាព តម្លាភាព និងការទទួលខុសត្រូវដល់គ្រប់អង្គភាពក្រោមឱវាទទាក់ទងនឹងការ រៀបចំផែនការយុទ្ធសាស្ត្រ ផែនការថវិកា និងនីតិវិធីនៃការអនុវត្តកិច្ចលទ្ធកម្មសាធារណៈ ----- ថ្ងៃព្រហស្បតិ៍ ១៣រោច ខែចេត្រ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី០២ ខែឧសភា ឆ្នាំ២០១៩ ឯកឧត្តម ជួប សុភក្តិ អនុរដ្ឋលេខាធិការក្រសួងសាធារណការ និងដឹកជញ្ជូនបានអញ្ជើញជាអធិបតីក្នុង ពិធីបើកសិក្ខាសាលាផ្សព្វផ្សាយស្តីពី “វឌ្ឍនភាពនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុ សាធារណៈ ដំណាក់កាលទីបី ឆ្នាំ២០១៨” វគ្គបណ្តុះបណ្តាលស្តីពី “ការពង្រឹងភាពទទួលខុសត្រូវ និង សមត្ថភាព ក្នុងការរៀបចំផែនការយុទ្ធសាស្ត្រ និងផែនការថវិកាដល់សមាសភាពអង្គភាពថវិកា” និងវគ្គ បណ្តុះបណ្តាលស្តីពី “នីតិវិធីនៃការអនុវត្តកិច្ចលទ្ធកម្មសាធារណៈ ព្រមទាំងការរៀបចំរបាយការណ៍ លទ្ធកម្ម” ដោយមានការចូលរួមពីមន្ត្រីមកពីមន្ទីរសាធារណការ និងដឹកជញ្ជូនទាំង២៥រាជធានី-ខេត្ត កងវិស្វកម្ម គ្រូបង្គោល មន្ត្រីជំនាញពាក់ព័ន្ធ និងអង្គភាពថវិកាក្រោមឱវាទក្រសួងសរុបទាំងអស់ប្រមាណ១៥០នាក់ នៅខេត្តមណ្ឌលគិរី។ សិក្ខាសាលានេះរៀបចំឡើងដោយក្រសួងសាធារណការ និងដឹកជញ្ជូន សហការជាមួយក្រសួងសេដ្ឋកិច្ច និងហិរញ្ញវត្ថុ ក្នុងគោលបំណងផ្សព្វផ្សាយឱ្យបានទូលំទូលាយដើម្បីបង្កើនការយល់ដឹង ការគាំទ្រ និងការចូលរួមចំណែកយ៉ាងសកម្មពីគ្រប់អង្គភាពក្រោមឱវាទរបស់ក្រសួងដើម្បីទទួលបាននូវចំណេះដឹង ពាក់ព័ន្ធការពង្រឹងភាពទទួលខុសត្រូវ និងសមត្ថភាពរៀបចំផែនការយុទ្ធសាស្ត្រ និងផែនការថវិកាដល់ សមាសភាពអង្គភាពថវិកា និងនីតិវិធីនៃការអនុវត្តកិច្ចលទ្ធកម្ម ព្រមទាំងការរៀបចំរបាយការណ៍ លទ្ធកម្មផងដែរ។ សិក្ខាសាលានេះផ្តោតជាសំខាន់លើសារាចរណែនាំលេខ០៥ សរណន ចុះថ្ងៃទី១០ ខែមេសា ឆ្នាំ២០១៩ របស់ក្រសួងសេដ្ឋកិច្ច និងហិរញ្ញវត្ថុស្តីពីការរៀបចំផែនការយុទ្ធសាស្ត្រថវិកាឆ្នាំ២០២០-២០២២ រួមជាមួយ នឹងសំណួរចម្លើយ និងកិច្ចពិភាក្សាតាមបណ្តាអង្គភាពថវិកានីមួយៗទៅលើបញ្ហាផ្សេងៗដែលបានជួប ប្រទះក្នុងការអនុវត្តជាក់ស្តែង។ ថ្លែងក្នុងសន្ទរកថាបើក ឯកឧត្តមអនុរដ្ឋលេខាធិការ បានគូសបញ្ជាក់ថា៖ ថ្មីៗនេះក្រសួងទើបបាន បង្កើតអង្គភាពថវិការបស់រដ្ឋបាលកណ្តាលចំនួនប្រាំបី ដែលជាសមិទ្ធផលមួយដ៏មានសារសំខាន់ក្នុង ការធ្វើឱ្យប្រសើរឡើងនូវការប្រើប្រាស់ថវិកាជាតិប្រកបដោយប្រសិទ្ធភាព តម្លាភាព និងមានភាពត្រឹមត្រូវ បន្ថែមទៀត ក្រោយពីបានបង្កើតនូវអង្គភាពថវិកាចំនួន២៥រាជធានី-ខេត្ត នៅមន្ទីរសាធារណការ និងដឹកជញ្ជូនរួចមក។ ជាមួយគ្នានេះផងដែរ ឯកឧត្តមអនុរដ្ឋលេខាធិការ បានជំរុញឱ្យមន្ត្រីមកពីអង្គភាពថវិកាដែលត្រូវបាន បង្កើតឡើងទាំងអស់យកចិត្តទុកដាក់ស្វែងយល់ពីតួនាទីនិងភារកិច្ចរបស់ខ្លួន ជាពិសេស ភាពទទួលខុស ត្រូវនិងតម្លាភាពនៅក្នុងការបំពេញការងារ និងបង្កើនសមត្ថភាពរបស់ខ្លួនបន្ថែមទៀតក្នុងការរៀបចំ ផែនការយុទ្ធសាស្ត្រ និងផែនការថវិកាឱ្យបានច្បាស់លាស់ តាមរយៈបទបង្ហាញពីគ្រូបង្គោលមកពីក្រសួង សេដ្ឋកិច្ច និងហិរញ្ញវត្ថុ។ ថ្លែងក្នុងសន្ទរកថាបិទ ឯកឧត្តម ប៉េង ពោធិ៍នា អនុរដ្ឋលេខាធិការក្រសួងសាធារណការ និងដឹកជញ្ជូន បានលើកឡើងថា៖ ដើម្បីលើកកម្ពស់គុណភាព និងប្រសិទ្ធភាពនៃការរៀបចំផែនការយុទ្ធសាស្ត្រថវិកា ក្នុងក្របខណ្ឌនៃការអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ទាមទារនូវការចូលរួម ពីគ្រប់ភាគីពាក់ព័ន្ធទាំងអស់ ដើម្បីឱ្យការរៀបចំផែនការយុទ្ធសាស្ត្រថវិកានេះ ក្លាយជាវិធានការដ៏សំខាន់ មួយ។ ជាទីបញ្ចប់ ឯកឧត្តម ប៉េង ពោធិ៍នា បានលើកទឹកចិត្តឱ្យអង្គសិក្ខាកាមទាំងអស់យកចំណេះដឹងថ្មីៗ ព្រមទាំងបទពិសោធន៍ដែលទទួលបានពីសិក្ខាសាលានេះ ទៅអនុវត្តការងារក្នុងអង្គភាពរបស់ខ្លួន ឱ្យកាន់តែមានប្រសិទ្ធភាពខ្ពស់ ព្រមទាំងផ្សព្វផ្សាយទៅក្នុងអង្គភាពរបស់ខ្លួន ឱ្យកាន់តែទូលំទូលាយ បន្ថែមទៀត។