ភ្នំពេញ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្ដ្រីក្រសួងសាធារណការ និងដឹកជញ្ជូន បានរំពឹងទុកថា បរិមាណទំនិញឆ្លងកាត់កំពង់ផែ ក្រុងព្រះសីហនុ នឹងកើនលើស ៧០០.០០០ទូ (TEUs) នៅឆ្នាំ២០២០ និងលើស ១.០០០.០០០ TEUs នៅឆ្នាំ២០២៣ ខាងមុខ ។ ក្នុងពិធី សំណេះសំណាល និងសាកសួរសុខទុក្ខកម្មករ កម្មការិនី បុគ្គលិកកំពង់ផែស្វយ័តក្រុងព្រះសីហនុ ក្នុងឱកាសលើកទី១៣៣ នៃទិវាពលកម្មអន្តរជាតិ នៅថ្ងៃទី១ ខែឧសភា ឆ្នាំ ២០១៩ លោក ស៊ុន ចាន់ថុល បានថ្លែងថា វាជាមោទនភាពយ៉ាងខ្លាំងរបស់កម្ពុជា ដោយបរិមាណទំនិញឆ្លងកាត់ បានកើនឡើងខ្ពស់ក្នុងឆ្នាំ២០១៨ ពោលគឺមានកំណើន ២២,០៨% ធៀបនឹងឆ្នាំ២០១៧។ រីឯចំណូលអាជីវកម្មសរុប សម្រេចបានប្រមាណ ៧២លានដុល្លារអាមេរិក។ លោក មានប្រសាសន៍ថា “ផ្អែកលើកំណើនសេដ្ឋកិច្ចដ៏រឹងមាំ និងកំណើនបរិមាណ ទំនិញឆ្លងកាត់កំពង់ផែ កំពង់ផែស្វយ័តក្រុងព្រះសីហនុ នឹងរំពឹងថាបរិមាណកុងតឺន័រ ដែលឆ្លងកាត់កំពង់ផែនឹងកើនលើស ៧០០.០០០ TEUs នៅឆ្នាំ ២០២០ និងលើស ១.០០០.០០០ TEUs នៅឆ្នាំ ២០២៣ ដែលនាំឱ្យតម្រូវការអភិវឌ្ឍ និងសាងសង់កំពង់ផែ ត្រូវសម្រេចឱ្យបានទាន់ពេលវេលា និងប្រើប្រាស់យុទ្ធសាស្ត្រគ្រប់ជ្រុងជ្រោយ ដោយបញ្ចុះតម្លៃលើកដាក់ទំនិញ បញ្ចុះតម្លៃសេវាឡូជិស្ទិក ពង្រឹងនូវប្រសិទ្ធភាពគ្រប់គ្រង និងប្រតិបត្តិការកំពង់ផែ និងកតា្តផ្សេងៗទៀត ដើម្បីពង្រឹងការប្រកួតប្រជែងក្នុងតំបន់ និងសកលលោក” ។ លើសពីនេះទៅទៀត រដ្ឋមន្ដ្រីក្រសួងសាធារណការ បានបញ្ជាក់ថា កំពង់ផែស្វយ័តក្រុងព្រះសីហនុ ក៏បានចូលរួមគាំទ្រដល់ កិច្ចសម្រួលពាណិជ្ជកម្ម និងធុរកិច្ចនៅកម្ពុជា សំដៅជំរុញភាពប្រកួតប្រជែង និងបង្កើនល្បឿននៃការធ្វើ ពិពិធកម្មសេដ្ឋកិច្ចជាតិ ដើម្បីធានាឱ្យបាននូវចីរភាព កំណើនសេដ្ឋកិច្ចសម្រាប់រយៈពេលខាងមុខ តាមរយៈ វិធានការបញ្ចុះថ្លៃលើកដាក់ Lo-Lo ចំនួន ១០% បញ្ចុះថ្លៃ Bonus ពី ៧,៥០ ដុល្លារ មក ៥ដុល្លារក្នុងមួយ Box និងកែសម្រួលមិនគិត ថ្លៃឈ្នួលបម្លាស់ទីនាវា (Shifting) ៕ ដោយ អេង ប៊ូឆេង