[Kley Kley News] - កម្ពុជា ចុះកិច្ចព្រមព្រៀងដឹកជញ្ជូនផ្លូវដែក និងទទួលរថភ្លើងពីថៃជាផ្លូវការ
2019-04-22
Go to the website published Kley Kley News
រដ្ឋមន្រ្តីក្រសួងសាធារណការ និងដឹកជញ្ជូនកម្ពុជា និងរដ្ឋមន្រ្តីដឹកជញ្ជូនថៃ បានចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូនតាមផ្លូវដែកឆ្លងកាត់ព្រំដែនកម្ពុជា-ថៃ និងចូលរួមក្នុងពិធីប្រគល់-ទទួល ក្បាលរថភ្លើង (DMU) ដែលជាអំណោយរបស់រាជរដ្ឋាភិបាល នៃព្រះរាជាណាចក្រថៃ ជូនរាជរដ្ឋាភិបាលនៃព្រះរាជាណាចក្រកម្ពុជា។ ពិធីចុះហត្ថលេខានេះ ធ្វើឡើងក្រោមអធិបតីភាពសម្តេច ហ៊ុន សែន នាយករដ្ឋមន្ត្រីកម្ពុជា និងលោក ប្រាយុទ្ធ ចាន់អូចា នាយករដ្ឋមន្រ្តីថៃ នាថ្ងៃទី២២ ខែមេសា ឆ្នាំ២០១៩។
ថ្លែងនៅក្នុងពិធីនេះ សម្តេចតេជោនាយករដ្ឋមន្ត្រី បានមានប្រសាសន៍ថា នេះជាយុទ្ធសាស្រ្ត និងជាប្រវត្តិសាស្ត្រសម្រាប់ប្រទេសទាំងពីរ កម្ពុជា-ថៃ ក្នុងការតភ្ជាប់ផ្លូវដែកសារជាថ្មី ក្រោយពីបានកាត់ផ្តាច់នៅឆ្នាំ១៩៧៣ ដោយសារសង្គ្រាមនៅកម្ពុជា។ កិច្ចព្រមព្រៀងប្រតិបត្តិការរួមគ្នាលើការ ដឹកជញ្ជូនឆ្លងកាត់ព្រំដែន តាមផ្លូវដែក និងការតភ្ជាប់ផ្លូវដែកកម្ពុជា និង ថៃ គឺនឹងនាំមកនូវកាលានុវត្តភាពថ្មី សម្រាប់វិស័យដឹកជញ្ជូនតាមផ្លូវដែក ដែលជាមធ្យាបាយដឹកជញ្ជូនទំនិញ ដ៏មានប្រសិទ្ឋភាព មានតម្លៃថោក និងមានសុវត្ថិភាពខ្ពស់ ដើម្បីជំរុញការអភិវឌ្ឍខឿនសេដ្ឋកិច្ចជាតិរបស់ប្រទេសទាំងពីរ និងរួមចំណែកក្នុងការតភ្ជាប់ និងអភិវឌ្ឍតំបន់អាស៊ាន និងមហាអនុតំបន់មេគង្គផងដែរ។សម្តេច ហ៊ុន សែន បន្តថា ផ្លូវដែកពីភ្នំពេញ មកប៉ោយប៉ែតព្រំដែនកម្ពុជា-ថៃ ដែលមានប្រវែង ៣៨៦គីឡូម៉ែត្រ គឺត្រូវបានរាជរដ្ឋាភិបាលកម្ពុជាស្តារឡើងវិញរួចហើយ ថ្វីត្បិតតែមិនទាន់មានលក្ខណៈស្តង់ដារ និងទំនើបក៏ពិតមែន ប៉ុន្តែរាជរដ្ឋាភិបាលកម្ពុជា មានចក្ខុវិស័យយុទ្ធសាស្ត្រ និងផែនការ ច្បាស់លាស់ក្នុងការអភិវឌ្ឍវិស័យផ្លូវដែកដែលជាឆ្អឹងខ្នងនៃការដឹកជញ្ជូននៅកម្ពុជា។
ជាមួយគ្នានេះផងដែរ រាជរដ្ឋាភិបាលថៃ បានជួយសាងសង់ជាថ្មីនូវស្ពានផ្លូវដែក ព្រំដែនកម្ពុជា-ថៃ អូរជ្រៅប្រវែង ៤៣ម៉ែត្រ ដោយប្រើប្រាស់ថវិកាសាងសង់ប្រមាណ ១លានដុល្លារអាមេរិក និងស្ពានផ្លូវរថភ្លើងប៉ោយប៉ែត-អរញ្ញប្រាថេត ប្រវែង ៤៥ម៉ែត្រ ត្រូវបានស្ថាបនាឡើងវិញ ដោយ ជំនួយឥតសំណងពីរាជរដ្ឋាភិបាលថៃ និងបានធ្វើពិធីតភ្ជាប់ កាលពីថ្ងៃទី១៩ ខែកញ្ញា ឆ្នាំ២០១៦ ក្រោម អធិបតីភាពលោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន។
ចំពោះរថភ្លើងប្រភេទ DMU ដែលជាអំណោយរបស់រាជរដ្ឋាភិបាលនៃព្រះរាជាណាចក្រថៃនេះ រួមមាន៖ ក្បាល រថភ្លើងចំនួន១គ្រឿង និងទូដឹកអ្នកដំណើរចំនួន៤ ដែលអាចផ្ទុកអ្នកដំណើរបាន ៣២០នាក់ (៨០នាក់ ក្នុងទូនីមួយៗ)។ ជាមួយគ្នានេះ រាជរដ្ឋាភិបាលថៃ ក៏បានបណ្តុះបណ្ដាលពាក់ព័ន្ធនឹងបច្ចេកទេសក្នុងការប្រើប្រាស់ទូរថភ្លើងថ្មីនេះជាមុនដល់មន្រ្តីបច្ចេកទេសផ្លូវដែកកម្ពុជា ចំនួន ៩នាក់ផងដែរ។
បន្ទាប់មក នាយករដ្ឋមន្រ្តីទាំង២ ព្រមទាំងគណៈប្រតិភូ បានអញ្ជើញធ្វើដំណើររួមគ្នាតាមខ្សែរថភ្លើងពីស្ថានីយបានក្លងលឹកនៃប្រទេសថៃ ឆ្ពោះមកកាន់ស្ថានីយរថភ្លើងប៉ោយប៉ែតនៃប្រទេសកម្ពុជា៕
