ភ្នំពេញ ៖សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានស្នើនាយករដ្ឋមន្រ្តីថៃ លោក ប្រាយុទ្ធ ចន្ទអូចា បើកច្រកទ្វារព្រំដែន អន្តរជាតិ ៤កន្លែងបន្ថែមទៀត ដើម្បីជំរុញទំហំពាណិជ្ជកម្ម រវាងប្រទេសទាំងពីរ ខណៈសព្វថ្ងៃនេះ កម្ពុជា-ថៃ មានច្រកទ្វារព្រំដែន អន្ដរជាតិ មានចំនួន៦ច្រក ។ ក្នុងពិធី បើកការដ្ឋាន សាងសង់អគារច្រកទ្វារព្រំដែន អន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ នៅថ្ងៃទី២២ ខែមេសា ឆ្នាំ២០១៩ នេះ សម្ដេចតេជោ ហ៊ុន សែន មានប្រសាសន៍ថា “ខ្ញុំបានស្នើបើកនូវច្រកព្រំដែន៤កន្លែងផ្សេងទៀត ដែលរួមមាន ៖ ច្រកអានសេះ រវាងខេត្តព្រះវិហារ ជាមួយនឹងខេត្តអូប៊ុនរាជធានី និងច្រកជប់គគី ម្ខាងឧត្តរមានជ័យ ជាមួយខេត្តបូរីរ៉ាំ ឯមួយទៀតនៅច្រកភ្នំដីក្នុងខេត្តបាត់ដំបង មួយទៀត ច្រកថ្មដារ ខេត្តពោធិ៍សាត់”។ សម្ដេចបន្ដថា នៅពេលច្រកទាំង៤នេះបើកដំណើរការ នឹងសម្រួលដល់ការធ្វើពាណិជ្ជកម្ម រវាងប្រទេសទាំងពីរផងដែរ។ ប៉ុន្ដែយ៉ាងណាមិញ ការស្នើសុំរបស់ នាយករដ្ឋមន្ដ្រីកម្ពុជា ក្នុងការបើកច្រកអន្ដរជាតិ ទាំង៤នេះ មិនទាន់មានការឆ្លើយ តបបែបណាពី នាយករដ្ឋមន្ត្រីថៃនៅឡើយទេ។ សូមបញ្ជាក់ថា បច្ចុប្បន្ននេះកម្ពុជា មានច្រកទ្វារព្រំដែនអន្ដរជាតិចំនួន២៤ច្រក ក្នុងនោះមានច្រកទ្វារអាកាសយាន្ដដ្ឋានអន្ដរជាតិចំនួន៣ច្រកទ្វារ ,កំពង់ផែអន្ដរជាតិចំនួន៤ច្រកទ្វារ ព្រំដែនអន្ដរជាតិមានចំនួន១៧ ដោយក្នុងនោះ ច្រកទ្វារព្រំដែន កម្ពុជា-វៀតណាម មានចំនួន១០ច្រក ,កម្ពុជា-ថៃ មានចំនួន៦ច្រក និងកម្ពុជា-ឡាវ មានចំនួន១ច្រក ៕ដោយ ៖ អេង ប៊ូឆេង