“តួនាទីបច្ចេកវិទ្យាគមនាគមន៍ និងព័ត៌មានសម្រាប់ការអភិវឌ្ឍប្រកបដោយចីរភាពកម្ពុជា” ថ្ងៃព្រហស្បតិ៍ ១រោច ខែផល្គុន ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២១ ខែមីនា ឆ្នាំ២០១៩ ក្រសួងសាធារណការ និងដឹកជញ្ជូន ដែលតំណាងដោយប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ បានអញ្ជើញចូលរួមសិក្ខាសាលាបច្ចេកវិទ្យាគមនាគមន៍ និងព័ត៌មានថ្នាក់ជាតិ នៅសាកលវិទ្យាល័យភូមិន្ទភ្នំពេញ ក្រោមប្រធានបទ៖ “តួនាទីបច្ចេកវិទ្យាគមនាគមន៍ និងព័ត៌មានសម្រាប់ការអភិវឌ្ឍប្រកបដោយចីរភាពកម្ពុជា” ។ សិក្ខាសាលាថ្នាក់ជាតិ បច្ចេកវិទ្យាគមនាគមន៍ និងព័ត៌មាន ត្រូវបានរៀបចំឡើងដើម្បីលើកកម្ពស់ការពិភាក្សា និងការយល់ដឹងស្តីពីគោលដៅអភិវឌ្ឍន៍ប្រកបដោយចីរភាព និងតួនាទីបច្ចេកវិទ្យាគមនាគមន៍ និងព័ត៌មាន ថាតើគមនាគមន៍ និងព័ត៌មានចូលរួមអ្វីខ្លះក្នុងការតាមដានការអនុវត្តគោលដៅអភិវឌ្ឍន៍ប្រកបដោយចីរភាព? សិក្ខាសាលានេះជាការចាប់ផ្តើមដើម្បីបង្កើតឱកាសនៃការចូលរួម និងការពិភាក្សា និងកិច្ចសហប្រតិបត្តិការនាពេលអនាគត រវាងស្ថាប័នរដ្ឋាភិបាល និងតួអង្គមិនមែនរដ្ឋាភិបាលផ្សេងទៀត ។ សិក្ខាសាលានេះកាន់តែរឹតចំណងសហប្រតិបត្តិការ និងការអភិវឌ្ឃបច្ចេកវិទ្យាគមនាគមន៍ និងព័ត៌មានជូនដល់មន្ត្រីរាជការតាមបណ្តាក្រសួង-ស្ថាប័ន ព្រមទាំងបុគ្គលិកក្រុមហ៊ុនឯកជន និងប្រតិបត្តិករទូរគមនាគមន៍នានា ដើម្បីជាប្រយោជន៍ដល់បណ្តាក្រសួង-ស្ថាប័ន និងក្រុមហ៊ុនរបស់ខ្លួនឲ្យមានប្រសិទ្ធភាពខ្ពស់ និងមានសន្តិសុខល្អប្រសើរឡើង។ ក្នុងឱកាសនោះដែរ ក្រសួងសាធារណការ និងដឹកជញ្ជូន បានធ្វើបទបង្ហាញទាក់ទងនឹងការចុះបញ្ជីយានយន្តតាមប្រព័ន្ធ Online ការត្រួតពិនិត្យលក្ខណៈបច្ចេកទេសយានយន្ត កម្មវិធីថែទាំផ្លូវ (Road Care) ប្រព័ន្ធលក់លេខពិសេសផ្ទាល់ខ្លួន ដែលទាំងនេះជាបច្ចេកវិទ្យាព័ត៌មានជួយឲ្យប្រជាពលរដ្ឋកាន់តែមានភាពងាយស្រួលជាងមុន ឆាប់រហ័ស និងបានជាប្រយោជន៍ដល់ប្រជាពលរដ្ឋ ក្រសួង និងប្រទេសជាតិទាំងមូល ។