(សៀមរាប)៖ រដ្ឋមន្ត្រីក្រសួងសាធារណការ និងដឹកជញ្ជូន ឯកឧត្តម ស៊ុន ចាន់ថុល លើកឡើងថា ប្រទេសកម្ពុជាបានខ្ចីថវិកាពីបរទេសនៅ​មានចំនួនតិចនៅឡើយ បើធៀបទៅនឹងបណ្តាប្រទេសដ៏ទៃ។ ឯកឧត្តមបន្តថា កម្ពុជាបានប្រើប្រាស់កម្ចីទាំងនោះ យ៉ាងត្រឹមត្រូវបំផុត ពោលគឺយកមកអភិវឌ្ឍសេដ្ឋកិច្ចជាតិ ជាក់ស្តែង ការដូចជាការសាងសង់ហេដ្ឋារចនាសម្ព័ន្ធផ្លូវថ្នល់។ ក្នុងនោះ ឯកឧត្តមបាមគូសបញ្ជាក់ថា ក្រសួងសាធារណការ​ មិនយកកម្ចីថវិកាទាំងនោះ ទៅសាងសង់ផ្លូវណា ដែលមិនផ្តល់ប្រយោជន៍ដល់សេដ្ឋកិច្ចជាតិ ឬធ្វើឲ្យប៉ះពាល់ដល់បរិស្ថានឡើយ។ ឯកឧត្តម ស៊ុន ចាន់ថុល បានឱ្យដឹងបែបនេះ ក្រោយបញ្ចប់កិច្ចប្រជុំលើកទី៧ នៃគណៈកម្មាធិការរួមការងារដឹកជញ្ជូនក្របខណ្ឌមហាអនុតំបន់មេគង្គ នៅថ្ងៃទី១៣ ខែមីនានេះ នៅខេត្តសៀមរាប។ រដ្ឋមន្ត្រីក្រសួងសាធារណការរូបនេះ ក៏បានប្ដេជ្ញាចិត្តខិតខំប្រឹងប្រែងបន្ត ក្នុងការកសាងហេដ្ឋារចនាសម្ព័ន្ធ (ផ្លូវ ស្ពាន) ឲ្យបានល្អបន្ថែមទៀត ដើម្បីធ្វើឲ្យប្រទេសកម្ពុជា កាន់តែមានភាពរីកចម្រើន ទៅមុខឥតឈប់ឈរ៕