[Kampuchea Thmey] - ការបើកបរយានយន្ត ត្រូវប្រុងប្រយ័ត្នគ្រប់ពេលវេលា ទើបមិនជួបគ្រោះថ្នាក់
2019-02-23
Go to the website published Kampuchea Thmey
ភ្នំពេញ ៖ លោកជំទាវ មិន មាណវី រដ្ឋលេខាធិការ និងជាអគ្គលេខាធិការ គណៈកម្មាធិការជាតិសុវត្ថិភាពចរាចរណ៍ផ្លូវគោក បានលើកឡើងថា អ្នកបើកបរទាំងអស់ នៅពេលកំពុងបើកបរយានយន្ត មិនត្រូវ និយាយទូរស័ព្ទ នៅពេលបើកវ៉ាជែង ត្រូវប្រុងប្រយ័ត្នជានិច្ច ទើបមិនជួបគ្រោះថ្នាក់ចរាចរណ៍។
នេះគឺជាប្រសាសន៍របស់ លោកជំទាវ មិន មាណ ថ្លែងការផ្ដាំផ្ញើទៅដល់ប្រជាពលរដ្ឋ ជាអ្នកបើកបរយានយន្តទាំងអស់ ក្នុងកម្មវិធីដាក់តាំងបង្ហាញប្រព័ន្ធបច្ចេកវិទ្យា របស់ក្រសួងសាធារណការ និងដឹកជញ្ជូន នៅក្នុងបរិវេណមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) កាលពីថ្ងៃសុក្រ ទី២២ ខែកុម្ភៈ ឆ្នាំ២០១៩។
ពិធីនេះមានការផ្សព្វផ្សាយអំពីសុវត្ថិភាពចរាចរណ៍ផ្លូវគោក និងចែកមួកសុវត្ថិភាព ប្រមាណជាង ២០០មួក ទៅដល់អ្នកសារព័ត៌មាន និងសិស្ស-និស្សិត ដែលបានចូលរួមក្នុងកម្មវិធីដាក់តាំងបង្ហាញនេះផងដែរ។
សូមបញ្ជាក់ឲ្យដឹងថា ក្រសួងសាធារណការ និងដឹកជញ្ជូន បានដាក់តាំងបង្ហាញប្រព័ន្ធបច្ចេកវិទ្យាក្នុងវិស័យសាធារណការ និងដឹកជញ្ជូន ដែលមាន ដូចជា ប្រព័ន្ធស្វ័យប្រវត្តិកម្មចុះបញ្ជីយានជំនិះ ត្រួតពិនិត្យលក្ខណៈបច្ចេកទេសយានជំនិះ ប្រឡងយកប័ណ្ណបើកបរ កម្មវិធីយល់ដឹងអំពីទ្រឹស្ដី នៃការបើកបរ (Cambodia Driving Rules) កម្មវិធីព័ត៌មានសាធារណការ និងដឹកជញ្ជូន (MPWT News) និងកម្មវិធីថែទាំផ្លូវ (ROAD CARE mobile app) ក្នុងគោលដៅផ្សព្វផ្សាយអំពីសមិទ្ធផល និងសេវាសាធារណៈរបស់ក្រសួង នៅក្នុងកម្មវិធីមហោស្រពគីហ្សូណា ជប៉ុន-កម្ពុជា ឆ្នាំ២០១៩ នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដែលប្រព្រឹត្តទៅមានរយៈពេល៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែកុម្ភៈ ឆ្នាំ២០១៩៕
