ឯកឧត្តមទេសរដ្ឋមន្ត្រី ស៊ុន ចាន់ថុល អញ្ជើញជាអធិបតី ក្នុងពិធីបើកវគ្គបណ្តុះបណ្តាលស្តីពីភាពជាអ្នកដឹកនាំ “Adaptive Leadership: Leading Change for Organizational Renewal” វគ្គទី២ នៅខេត្តព្រះសីហនុ --- ថ្ងៃព្រហស្បតិ៍ ១០កើត ខែមាឃ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី១៤ ខែកុម្ភៈ ឆ្នាំ២០១៩ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូន បានអញ្ជើញ ជាអធិបតី ក្នុង កម្មវិធីបើកវគ្គបណ្តុះបណ្តាលភាពជាអ្នកដឹកនាំ “Adaptive Leadership: Leading Change for Organizational Renewal” វគ្គទី២ ដល់មន្រ្តីរាជការជាថ្នាក់ដឹកនាំរបស់ក្រសួងនាំចំនួន ៥០រូប នៅខេត្តព្រះសីហនុ។ កម្មវិធីវគ្គបណ្តុះបណ្តាលនេះ សហការរៀបចំឡើងដោយក្រសួងសាធារណការ និងដឹកជញ្ជូនជាមួយនឹង មជ្ឈមណ្ឌល Center of Asia Leadership Initiatives (CALI) ដែលប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៤ ដល់ ថ្ងៃទី១៦ ខែកុម្ភៈ ឆ្នាំ២០១៩ នៅខេត្តព្រះសីហនុ ដោយមានការធ្វើបទបង្ហាញពីវាគ្មិនដែលបានបញ្ចប់ការសិក្សាមកពីសាកល វិទ្យាល័យHarvard សហរដ្ឋអាមេរិក។ វគ្គបណ្តុះបណ្តាលនេះ ត្រូវបានរៀបចំឡើងសម្រាប់មន្រ្តីរាជការជាថ្នាក់ដឹកនាំរបស់ក្រសួង ដើម្បីបង្កើននូវ ចំណេះដឹងផ្ទាល់ខ្លួន និងសម្រាប់អង្គភាពរបស់ខ្លួនលើជំនាញភាពជាអ្នកដឹកនាំ ក្នុងគោលដៅបង្កើតនូវ គំនិតផ្តួចផ្តើមថ្មីៗលើការបង្កើនប្រសិទ្ធភាពការងារនៅក្នុងអង្គភាពនិងសហគមន៍របស់ខ្លួន តាមរយៈការពិភាក្សាលើករណីសិក្សា សំខាន់ៗ ដែលបានសម្រិត សម្រាំងឡើងយ៉ាងពិសេសសម្រាប់ថ្នាក់ដឹកនាំជាន់ខ្ពស់ និងថ្នាក់កណ្តាល ដែលបម្រើការងារក្នុងវិស័យសាធារណៈ ស្របតាមក្របខ័ណ្ឌ និងវិធីសាស្រ្តបង្រៀននៅមហាវិទ្យាល័យ Harvard Kennedy School of Government និងមហាវិទ្យាល័យ Harvard Business School។ ជាមួយគ្នានេះផងដែរ ឯកឧត្តមទេសរដ្ឋមន្រ្តី គូសបញ្ជាក់ថា៖ វគ្គបណ្តុះបណ្តាលនេះ ជាឱកាសដ៏កម្រក្នុង ការពង្រីកចំណេះជំនាញវិជ្ជាជីវៈផ្ទាល់ខ្លួន ព្រមទាំងផ្តល់ឱកាសដល់មន្ត្រីរាជការជាអ្នកដឹកនាំរបស់យើង បានសិក្សាស្វែងយល់ពីជំនាញសំខាន់ៗចាំបាច់ក្នុងការចូលរួមចំណែកប្រកបដោយភាពវិជ្ជមាន ដើម្បី ដឹកនាំក្រសួង ក៏ដូចជាប្រទេសជាតិឆ្ពោះទៅកាន់ការរីកចម្រើនលូតលាស់បន្ថែមទៀត។