ភ្នំពេញ៖ ព្រឹកថ្ងៃទី៣១ ខែមករា ឆ្នាំ២០១៩ លោក ឃួង ស្រេង អភិបាលរាជធានីភ្នំពេញ បានដឹកនាំកិច្ចប្រជុំពិភាក្សាលើបញ្ហាជួសជុលផ្លូវសំបុកមាន់ក្នុងមូលដ្ឋានរាជធានីភ្នំពេញ ដែលរៀបចំនៅសាលារាជធានីភ្នំពេញ ដោយមានការចូលរួមពីអាជ្ញាធរខណ្ឌទាំង១២ និងមន្ទីរជំនាញចំណុះឲ្យរដ្ឋបាលរាជធានីភ្នំពេញ ។ ក្នុងឱកាសនោះលោកអភិបាលរាជធានីភ្នំពេញ បានជំរុញឲ្យអភិបាលខណ្ឌទាំង១២ និងមន្ទីរសាធារណការ និងដឹកជញ្ជូន រាជធានីភ្នំពេញ បន្តចុះពិនិត្យមើលផ្លូវជង្ហុក សំបុកមាន់ និងចុះជួសជុលជាបន្ទាន់ ខណៈខណ្ឌចំនួន៤ នៅកណ្តាលក្រុងជួសជុលលុបបំបាត់បានប្រមាណ៩០ភាគរយហើយនោះ ដើម្បីសម្រួលចរាចរដល់បងប្អូនប្រជាពលរដ្ឋ និងដើម្បីទប់ស្កាត់ ការខូចខាតធ្ងន់ធ្ងរ និងកាត់បន្ថយការចំណាយថវិកាជាតិ ។ បន្ថែមពីលើនេះលោក ឃួង ស្រេង បានណែនាំដល់អភិបាលខណ្ឌទាំង១២ ត្រូវចុះមើលផ្លូវជាប្រចាំ និងធ្វើការជួសជុលផ្លូវ បន្ទាប់ពីផ្លូវបានខូចខាត ក្រោយរដូវវស្សាកន្លងផុតទៅនេះ ពោលគឺបើផ្លូវ ណាដែលខណ្ឌមិនមានលទ្ធភាពជួសជុល ខណ្ឌត្រូវធ្វើរបាយការណ៍ឡើងមករដ្ឋបាលរាជធានីភ្នំពេញ ដើម្បីធ្វើការដោះស្រាយជាបន្ទាន់ ។ ដោយឡែក មន្ត្រីជំនាញមន្ទីរសាធារណការ និងដឹកជញ្ជូនរាជធានីភ្នំពេញ ត្រូវចូលរួមត្រូតពិនិត្យជាប្រចាំ ។ គោលបំណង ដើម្បីបង្កភាពងាយស្រួលជូនប្រជាពលរដ្ឋធ្វើដំណើរ និងចូលរួមកាត់បន្ថយការចំណាយការចំណាយ ថវិកាជាតិ និងជាការទប់ស្កាត់កុំអោយមានការខូចខាតដល់គ្រឹះខាងក្រោមផ្លូវ ។ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា ការជួសជុលផ្លូវខូច ជង្ហុកសំបុកមាន់ ខណ្ឌ៤ក្នុងក្រុង មានខណ្ឌ៧មករា ចំការមន ដូនពេញ និងខណ្ឌទួលគោក គឺជួសជុលបាន៩២%ហើយ រហូតមកដល់ចុងខែមករានេះ ចំណែកខណ្ឌ៨ផ្សេងទៀត គឺជួសជុលបានតែ៣០%ទេ ដោយសារផ្លូវភាគច្រើន ជាផ្លូវបេតុង ដែលត្រូវចំណាយពេល និងថវិកាទំហំធំ ។ រហូតដល់ចុងខែមករានេះនៅសល់ផ្លូវចំនួន១៤០ខែ្សទៀត មិនទាន់បានជួសជុល ប៉ុន្តែទោះបីជាយ៉ាងណាក្តី នឹងធ្វើឲ្យបានរួចរាល់ ក្នុងរយៈពេល៤សប្តាហ៍ក្រោយចូលឆ្នាំចិន ៕