[TV Srok Srae] - ក្រសួងសេដ្ឋកិច្ច៖ ២ទសវត្សន៍ចុងក្រោយ កម្ពុជាក្លាយជាខ្លាសេដ្ឋកិច្ចថ្មីនៅអាស៊ី
2019-01-15
Go to the website published TV Srok Srae
អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ មានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាពិសេសការដាក់ចេញនូវ នយោបាយ ឈ្នះ ឈ្នះ នៅឆ្នាំ១៩៩៨ កម្ពុជាសម្រេចបាននូវសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គមពេញលេញ ព្រមទាំងការអភិវឌ្ឍសង្គម សេដ្ឋកិច្ច លើគ្រប់វិស័យ ទាំងនៅទីក្រុង និងជនបទ។
ក្នុងរយៈពេល២ទសវត្សន៍ចុងក្រោយនេះ កម្ពុជារក្សាបាននូវស្ថានភាពម៉ាក្រូ សេដ្ឋកិច្ចល្អប្រសើរ និងសម្រេចបាននូវកំណើនប្រចាំឆ្នាំជាមធ្យម ក្នុងរង្វង់៧.៧% ហើយបានចាកចេញពីឋានៈជាប្រទេសមានចំណូលទាប ទៅជាប្រទេសមានចំណូលមធ្យមកម្រិតទាប ក្នុងឆ្នាំ២០១៥ ព្រមទាំងត្រូវបានចាត់ទុកថាជា ខ្លាសេដ្ឋាកិច្ចថ្មី នៅអាស៊ី ក្នុងឆ្នាំ២០១៦ផងដែរ។
អគ្គបណ្ឌិតសភាចារ្យ អូន ព័ន្ធមុនីរ័ត្ន តំណាងដ៏ខ្ពងខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងនៅក្នុងពិធីបិទសន្និបាតបូកសរុបការងារសាធារណការ និងដឹកជញ្ជូនឆ្នាំ២០១៨ និងទិសដៅការងារឆ្នាំ២០១៩ នៅរសៀលថ្ងៃទី១០ ខែមករា ឆ្នាំ២០១៩ នៅសាលសន្និសីទ្ធចតុមុខ។
អគ្គបណ្ឌិតសភាចារ្យ មានប្រសាសន៍បន្តថា វិស័យហេដ្ឋារចនាសម្ព័ន្ធដឹកជញ្ជូនរួមមាន៖ ផ្លូវ, ស្ពាន, ផ្លូវដែក, ផ្លូវអាកាស, ផ្លូវទឹក, កំពង់ផែ និងប្រព័ន្ធគ្រប់គ្រងមធ្យោបាយដឹកជញ្ជូន ដែលជាវិស័យមួយដ៏សំខាន់ និងជាសរសៃឈាមជំរុញលំហូរពាណិជ្ជកម្ម និងទ្រទ្រង់សេដ្ឋកិច្ច បានចូលរួមចំណែកយ៉ាងសំខាន់ ក្នុងការជំរុញកំណើតសេដ្ឋកិច្ចជាតិ ការកាត់បន្ថយភាពក្រីក្រ និងការលើកកម្ពស់ជីវភាពរស់នៅរបស់ប្រជាពលរដ្ឋគ្រប់ស្រទាប់វណ្ណៈ ពីមួយថ្ងៃទៅមួយថ្ងៃ។
ទន្ទឹមនេះ កម្ពុជាក៏បាននិងកំពុងពង្រឹងការតភ្ជាប់ ជាមួយប្រទេសនៅក្នុងតំបន់ ទៅគ្រប់ប៉ូល និងរបៀងសេដ្ឋកិច្ចសំខាន់ៗ នៅក្នុងប្រទេស និងការចាប់ផ្តើបរៀបចំនូវប្រព័ន្ធឡូជីស្ទីកក្នុងស្រុក ដែលនឹងរួមចំណែកកាន់តែច្រើនឡើងៗ ក្នុងការលើកកម្ពស់សមត្ថភាពប្រកួតប្រជែង និងជំរុញពិពីធកម្មមូលដ្ឋានគាំទ្រកំណើនសេដ្ឋកិច្ចរបស់កម្ពុជាបន្ថែម។
ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់អំពីសមិទ្ធផលធំៗដែលសម្រេចបានមួយចំនួនពាក់ព័ន្ធនឹង កំណែទម្រង់របស់ក្រសួងសាធារណការ និងដឹកជញ្ជូន ដែលក្នុងនោះរួមមាន៖ ការដាក់ឱ្យដំណើរការកម្ម វិធីថែទាំផ្លូវ(ROAD CARE mobile app) ដែលអាចអនុញ្ញាតឱ្យអ្នកប្រើប្រាស់ផ្លូវទាំងអស់ចូលរួមជាមួយ រាជរដ្ឋាភិបាលក្នុងការថែទាំផ្លូវ យុទ្ធនាការជិះកង់ត្រួតពិនិត្យផ្លូវ ការបើកឱ្យប្រើប្រាស់កំពង់ផែពហុបំណង នៅក្រុងព្រះសីហនុ ការបើកឱ្យដំណើរការសាលាបង្រៀនបើកបរយានយន្តធុនធ្ងន់ ការបើកឱ្យប្រើប្រាស់ជាផ្លូវការបណ្តាញផ្លូវថ្នល់មួយចំនួន យុទ្ធនាការចែកមួកសុវត្ថិភាពជូនប្រជាពលរដ្ឋបានចំនួនប្រាំម៉ឺនមួកដើម្បីកាត់បន្ថយគ្រោះថ្នាក់ចរាចរណ៍ និងយុទ្ធនាការយល់ដឹងអំពីគ្រោះថ្នាក់ចរាចរណ៍។
ជាមួយគ្នានេះ ឯកឧត្តមទេសរដ្ឋមន្ត្រី ក៏បានលើកឡើងផងដែរអំពីគម្រោងបង្កើតអង្គភាពតាមដានយានយន្ត ដឹកជញ្ជូនលើសទម្ងន់កម្រិតកំណត់ដែលដឹកជញ្ជូនទំនិញចេញពីកំពង់ផែ គម្រោងបិទក្រុមហ៊ុនកែច្នៃយានយន្តខុសលក្ខណៈបច្ចេកទេសគ្មានច្បាប់អនុញ្ញាត គម្រោងរៀបចំវគ្គបណ្តុះបណ្តាលភាពជាអ្នក ដឹកនាំសម្រាប់អ្នកជំនាន់ក្រោយដើម្បីបន្តវេនការដឹកនាំក្រសួងសាធារណការ និងដឹកជញ្ជូនបន្ត និង គម្រោងរៀបចំប្រព័ន្ធស្វ័យប្រវត្តិកម្មសម្រួលបែបបទនាវានិងនាវិកចេញចូលនៅកំពង់ផែ (Port EDI)។
ឯកឧត្តមទេសរដ្ឋមន្ត្រី ក៏បានណែនាំឱ្យអង្គភាពក្រោមឱវាទទាំងអស់ រៀបចំបែបបទនីតិវិធីដើម្បីសម្រួលដល់ការកសាង ផ្លូវថ្នល់ឱ្យបានរឹងមាំ និងស្នើឱ្យរៀបចំផែនការ តាមដាន វាយតម្លៃសកម្មភាព របស់ខ្លួនដើម្បីបំពេញការងារ ឱ្យមានប្រសិទ្ធភាព។
ឆ្លៀតក្នុងឱកាសនោះដែរ ឯកឧត្តមទេសរដ្ឋមន្ត្រី បានសម្តែងនូវការកោតសរសើរចំពោះថ្នាក់ដឹកនាំ ក៏ដូចជាមន្ត្រីក្រោមឱវាទទាំងអស់ ដែលបានខិតខំប្រឹងប្រែងបំពេញការងារ និងសម្រេចបានសមិទ្ធផលជាទីមោទនៈ និងបានធ្វើការក្រើនរំលឹកផងដែរថាក្នុងនាមមហាគ្រួសារតែមួយនៃក្រសួងសាធារណការ និង ដឹកជញ្ជូន ត្រូវរួបរួមសាមគ្គីគ្នាក្នុងការបំពេញការងារ និងមិនត្រូវមានការបែងចែកបក្សពួកអ្វីឡើយ៕
