ក្រុមហ៊ុន GRAB ដែលជាក្រុមហ៊ុនផ្តល់សេវាដឹកជញ្ជូនឈានមុខគេមួយ កំពុងស្វែងរកឱកាសវិនិយោគនៅកម្ពុជា បន្ទាប់ពីមើលឃើញថា អាចទទួលភាពជោគជ័យក្នុងអាជីវកម្មមួយនេះ។ ក្នុងជំនួបជាមួយលោកទេសរដ្ឋមន្រ្តី ស៊ុន ចាន់ថុល រដ្ឋមន្រ្តីក្រសួងសារធាណការ និងដឹកជញ្ជូន កាលពីថ្មីៗនេះ លោក Yee Wee Tang ប្រធានក្រុមហ៊ុន GRAB ប្រចាំប្រទេសថៃ បានថ្លែងថា ក្រុមហ៊ុនរបស់លោកមានចំណាប់អារម្មណ៍យ៉ាងខ្លាំងទៅលើការអភិវឌ្ឍនៃសេវាដឹកជញ្ជូនតាមប្រព័ន្ធអ៊ីនធឺណិតនៅក្នុងប្រទេសកម្ពុជា និងមានបំណងស្នើសុំការគាំទ្រពីរាជរដ្ឋាភិបាលកម្ពុជា ដើម្បីចាប់ផ្ដើមដំណើរការក្រុមហ៊ុនរបស់ខ្លួននៅពេលឆាប់ៗនេះ។ លោកបញ្ជាក់ថា «យើង មានបំណងនាំយកមកនូវកម្មវិធីបច្ចេកវិទ្យា ដើម្បីគាំទ្រដល់ការអភិវឌ្ឍក្នុងប្រទេសកម្ពុជា និងជួយលើកកម្ពស់ជីវភាពរស់នៅរបស់ប្រជាជនកម្ពុជាផងដែរ។ ក្រុមហ៊ុនរបស់យើង នឹងបើកជាផ្លូវការនៅប្រទេសកម្ពុជា នៅពេលដែលទទួលបានអញ្ញាប័ត្រពីក្រសួងជំនាញរបស់រាជរដ្ឋាភិបាលកម្ពុជា»។ ក្រុមហ៊ុន GRAB គឺជាក្រុមហ៊ុនដែលផ្ដល់កម្មវិធីសេវាដឹកជញ្ជូន និងទូទាត់ប្រាក់ចល័តឈានមុខគេដ៏ល្បីមួយនៅអាស៊ីអាគ្នេយ៍។ ក្រុមហ៊ុនមានផ្ដល់នូវកម្មវិធីផលិតផលស្នូលដូចជាដំណោះស្រាយសេវាដឹកជញ្ជូនសម្រាប់អ្នកបើកបរ និងអ្នកដំណើរ ដោយផ្ដោតលើភាពងាយស្រួល សុវត្ថិភាព និងភាពជឿទុកចិត្ត។ បច្ចុប្បន្ន ក្រុមហ៊ុននេះបាននឹងកំពុងផ្ដល់សេវានៅក្នុងប្រទេសមួយចំនួនដូចជា៖ សិង្ហបុរី ឥណ្ឌូនេស៊ី ហ្វីលីពីន ម៉ាឡេស៊ី ថៃ វៀតណាម និងមីយ៉ាន់ម៉ា ជាមួយកម្មវិធីAPP សម្រាប់ឲ្យប្រជាជនទាញយកទៅប្រើប្រាស់(download) មើកកម្មវិធីផ្ដល់សេវាដឹកជញ្ជូន និងទូទាត់ប្រាក់ដោយស្វ័យប្រវត្តិ។ លោកទេសរដ្ឋមន្រ្តី ស៊ុន ចាន់ថុល បានគាំទ្រ និងបានជំរុញឲ្យក្រុមហ៊ុននេះ សហការជាមួយអ្នកជំនាញរបស់ក្រសួងទៅលើនីតិវិធីផ្ដល់អាជ្ញាបណ្ណ ព្រមទាំងការអនុវត្តយ៉ាងម៉ឺងម៉ាត់ទៅតាមច្បាប់នៃព្រះរាជាណាចក្រកម្ពុជា។ លោកមានប្រសាសន៍ថា «សេវារថយន្តតាកស៊ីតាមប្រព័ន្ធអនឡាញ នេះ នឹងជួយធ្វើឲ្យការដឹកជញ្ជូនសាធារណៈកាន់តែមានភាពងាយស្រួល»។ កាលពីឆ្នាំកន្លងទៅ ក្រុមហ៊ុន ក្រុមហ៊ុន GRAB បានក្លាយជាក្រុមហ៊ុនផ្ដល់កម្មវិធីសេវាដឹកជញ្ជូនទី១ ក្នុងការសហការជាមួយធនាគារពិភពលោក ដើម្បីបង្កើតកម្មវិធី OpenTraffic ដែលជាកម្មវិធីទិន្នន័យឆ្លាតវ័យ សម្រាប់ឲ្យប្រើប្រាស់បានដោយឥតគិតថ្លៃ ដើម្បីតាមដានស្ថានភាពចរាចរណ៍នៅម៉ោងជាក់ស្ដែង និងដើម្បីរៀបចំផែនការសម្រាប់ការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងដឹកជញ្ជូននៅថ្ងៃអនាគត ព្រមទាំងលើកកម្ពស់សុវត្ថិភាពចរាចរណ៍ផងដែរ៕