សន្និសីទថ្នាក់នាយកប្រតិបត្តិផ្លូវដែកអាស៊ានលើកទី៤០ ដែលបានប្រព្រឹត្តទៅនៅទីក្រុងណៃពីដោ ប្រទេសមីយ៉ាន់ម៉ា --- ពីថ្ងៃ៤រោច ដល់៧រោជ ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ដល់ថ្ងៃទី២៩ ឆ្នាំ២០១៨ ប្រទេសមីយ៉ាន់ម៉ាបានធ្វើជាម្ចាស់ផ្ទះក្នុងការរៀបចំសន្និសីទថ្នាក់នាយកប្រតិបត្តិផ្លូវដែកអាស៊ានលើក ទី៤០ ដោយមានការចូលរួមពីបណ្តាប្រទេសជាសមាជិកអាស៊ានមួយចំនួន។ សន្និសីទនេះត្រូវបានរៀបចំឡើងរៀងរាល់មួយឆ្នាំម្ដងទៅតាមវេនរបស់ប្រទេសអាស៊ាននីមួយៗ ដោយ ឡែកប្រទេសកម្ពុជាធ្លាប់ធ្វើជាម្ចាស់ផ្ទះចំនួនពីរដងរួចមកហើយ ដែលលើកទីមួយនៅក្នុងអំឡុង ឆ្នាំ ២០០៥ ប្រព្រឹត្តទៅនៅទីក្រុងភ្នំពេញ និងខេត្តសៀមរាប និងលើកទីពីរ ក្នុងឆ្នាំ២០១៥​ នៅក្រុងព្រះសីហនុ​ នាពេលថ្មីៗកន្លងទៅនេះ ដែលក្រសួងសាធារណការ និងដឹកជញ្ជូនជាអ្នករៀបចំ ហើយប្រទេសដែលធ្លាប់រៀបចំ សន្និសីទនេះញឹកញាប់ជាងគេរួមមាន៖ ប្រទេសប្រទេសម៉ាឡេស៊ី ឥណ្ឌូនេស៊ី វៀតណាម និងថៃ។ សន្និសីទនេះដំណើរការទៅដោយមានសមាសភាពចូលរួមពីក្រុមការងារពិភាក្សាផ្លាស់ប្តូរយោបល់ចំនួន បួនក្នុងនោះមាន៖ ក្រុមការងារប្រធានផ្លូវដែក ក្រុមការងារបច្ចេកទេស ក្រុមការងារប្រតិបត្តិការទីផ្សារ និងក្រុមការងារឯកសារ ដើម្បីផ្លាស់ប្តូរបទពិសោធន៍ និងព័ត៌មានគ្នាទៅវិញទៅមកទាក់ទងនឹងការ អភិវឌ្ឍផ្លូវដែកនៅក្នុងតំបន់អាស៊ានទាំងមូល។ សូមជម្រាបជូនថា៖ តាមរយៈសន្និសីទនេះ ប្រទេសមីយ៉ាន់ម៉ាបានប្រគល់តួនាទីជាប្រធានប្តូរវេនទៅឲ្យប្រទេសថៃក្នុងការ ធ្វើជាម្ចាស់ផ្ទះរៀបចំសន្និសីទនៅឆ្នាំក្រោយ។ ស្របពេលជាមួយគ្នានេះ ក្រោមការដឹកនាំប្រកបដោយគតិបណ្ឌិត សន្តិភាពនិយម និងគោល នយោបាយឈ្នះៗ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណា ចក្រកម្ពុជា ហេដ្ឋារចនាសម្ព័ន្ធគ្រប់វិស័យត្រូវបានអភិវឌ្ឍ និងធ្វើទំនើបកម្មជាបន្តបន្ទាប់ លើសពីនេះទៀត រាជរដ្ឋាភិបាលបាននឹងកំពុងទាក់ទាញវិនិយោគិនឱ្យវិនិយោគលើវិស័យផ្លូវដែកឱ្យមានការរីកចម្រើន ផងដែរ។