ភ្នំពេញ ៖ ប្រជាពលរដ្ឋ លោកគ្រូ អ្នកគ្រូ និងសិស្សានុសិស្ស ទូទាំងឃុំប្រាំបីមុំ នៃខេត្តតាកែវ បានសម្តែងក្តីត្រេកអរ និងថ្លែងអំណរគុណ ចំពោះសម្តេចតេជោនាយករដ្ឋមន្ត្រីហ៊ុនសែន និងសម្តេចកិត្តិព្រឹទ្ធបណ្ឌិត ដែលបានផ្ដល់អំណោយ ជាផ្លូវបេតុងមួយខ្សែ ប្រវែង១៨គីឡូម៉ែត្រទទឹង៨ម៉ែត្រ មានត​ម្លៃប្រមាណ៦លានដុល្លារអាមេរិក ភ្ជាប់ពីផ្លូវជាតិលេខ២ ត្រង់ចំណុចភូមិត្រពាំងលើក ឃុំ៨មុំ ស្រុកទ្រាំង ដល់កំពង់ផែទូកកំពង់អំពិល ស្រុកបូរីជលសារ (ផ្លូវលេខ១២៩បេ)ជាប់ព្រំដែនកម្ពុជា វៀតណាម ក្នុងខេត្តតាកែវ តាមរយៈក្រុមហ៊ុន ជីបម៉ុង និងត្រូវបាន​បើកការដ្ឋានសាងសង់ផ្លូវបេតុង​ ជាផ្លូវការ នាព្រឹកថ្ងៃទី២៦ខែវិច្ឆិកានេះ ក្រោ​មអធិបត្តីភាព លោកកិត្តិនីតិ កោសល្យ ប៊ិន ឈិន ឧបនាយករដ្ឋមន្ត្រី ប្រចាំការ និងជារដ្ឋមន្ត្រីទទួលបន្ទុកទីស្តីការគណរដ្ឋមន្ត្រី។ ​លោក​ លាងឃុន ប្រធានក្រុមអគ្គនាយកក្រុមហ៊ុនជីបម៉ុង បានថ្លែងថា ផ្លូវបេតុងប្រវែង១៨គីឡូម៉ែត្រ ដែលបើកការដ្ឋានស្ថាបនាជាផ្លូវការនេះ ជាអំណោយរបស់សម្តេចតេជោហ៊ុន សែន និងសម្ដេចកិត្តិព្រឹទ្ធបណ្ឌិត ហើយត្រូវបានស្ថាបនា និងរ៉ាប់រងទាំងស្រុង ដោយក្រុមហ៊ុនជីបម៉ុងគ្រុប ​ទំហំថវិកាប្រមាណ៦លានដុល្លារអាមេរិក។ ​លោកបានថ្លែងថា ​ការ​រួមចំណែក ជាមួយកិច្ចខិតខំប្រឹងប្រែងរបស់រាជរដ្ឋាភិបាល ដែលមានសម្តេចតេជោហ៊ុន សែន ជាប្រមុខ ក្នុងការអភិវឌ្ឍហេដ្ឋារចនាសម្ព័ន្ធក្នុងប្រទេស គឺជាកាតព្វកិច្ចដ៏ចាំបាច់ របស់យើងទាំងអស់គ្នាជាខ្មែរ ក្នុងការ​រួមគ្នា​ កសាងសេដ្ឋកិច្ចជាតិ។ ជាក់ស្ដែងការចូលរួមចំណែក អភិវឌ្ឍហេដ្ឋារចនាសម្ព័ន្ធនៅក្រុងខេត្តតាកែវ ​កាន់តែមានលក្ខណៈប្រសើរ កាន់តែខ្លាំង និងសម្រួលដល់ចរាចរណ៍ របស់ប្រជាពលរដ្ឋ ក្នុងនិងក្រៅខេត្តទាំងអស់។ លោក កិត្តិនីតិ កោសល្យ ប៊ិន ឈិន បានថ្លែងអំណរគុណយ៉ាងជ្រាលជ្រៅ ចំពោះលោក​ លាងឃុន ប្រធានក្រុមអគ្គនាយក ក្រុមហ៊ុន ជីបម៉ុងគ្រុប និងជាតំណាងសប្បុរសជន ក្នុងវិស័យឯកជន ដែលបានចំណាយថវិការសន្ធឹកសន្ធាប់ ជួយស្ថាបនាផ្លូវបេតុងអាមេរ១ខ្សែ ដែលជាអំណោយសម្តេចតេ ជោ ហ៊ុន សែន និងសម្តេចកិត្តិព្រឹទ្ធបណ្ឌិត ទុកជាចំណងដៃប្រើប្រាស់ ជូនប្រជាពលរដ្ឋក្នុងស្រុកទ្រាំង និងស្រុកបូរីជលសារ ដែលកន្លងមកមានការលលំបាក់ខ្លាំង ក្នុងការធ្វើដំណើរ ឆ្លងកាត់ភូមិសាស្ត្រនេះ មិនថា ខែប្រាំង ឬខែវស្សានោះឡើយ។ សកម្មភាពនេះបានចូលរួមចំណែក យ៉ាងសំខាន់ក្នុងគោលន យោបាយ របស់រាជរដ្ឋាភិបាល ក្នុងការកាត់បន្ថយភាពក្រីក្រ ជូនបងប្អូនប្រជាពលរដ្ឋក្នុងមូលដ្ឋាន។ លោកបានបន្តថា សព្វថ្ងៃនេះ ហេដ្ឋារចនាសម្ព័ន្ធសំខាន់ៗនានា ក្នុងប្រទេសត្រូវបានស្តា ឡើងវិញជា និងសាងសង់ថ្មីបន្ថែមជាបន្តបន្ទាប់ ដើម្បីបំរើនូវសេចក្តីត្រូវការ របស់ប្រជាពលរដ្ឋ ពិសេស គោលនយោបាយសេដ្ឋកិច្ច (ហ៊ុនសែនណូមិច) របស់សម្តេចតេជោ សែន បានធ្វើឱ្យកម្ពុជា ប្តូរពីប្រទេស ក្រីក្រ មកជាប្រទេស ដែលមានចំណូលមធ្យមកម្រិតទាប ហើយក៏កំពុងអភិវឌ្ឍន៍ ឈានទៅជាប្រទេស មាន ចំណូលមធ្យមកម្រិតខ្ពស់ នៅឆ្នាំ២០៣០ និងឈានទៅប្រទេសមានចំណូលខ្ពស់ នៅឆ្នាំ២០៥០៕