ស្ពានមិត្តភាពកម្ពុជា-ចិន មេគង្គក្រចេះ សម្រេចការសាងសង់ ១០០% ត្រៀមបើកឱ្យប្រើប្រាស់ជាផ្លូវការ _____________ ខេត្តក្រចេះ៖ ស្ពានឆ្លងកាត់ទន្លេមេគង្គខេត្តក្រចេះដ៏ធំស្កឹមស្កៃ ត្រូវបានសាងសង់រួចរាល់ជាស្ថាពរ ១០០% ហើយនៅថ្ងៃទី១៦ ខែកក្កដា ឆ្នាំ២០២៦ នេះ។ យោងតាមឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន ក្រុមការងារបានចុះពិនិត្យ និងផ្ទៀងផ្ទាត់គម្រោង ដើម្បីត្រៀមពិធីប្រគល់-ទទួលជាផ្លូវការ។ ស្ពាននេះមានប្រវែង ១ ៧៦១ម៉ែត្រ តភ្ជាប់ស្រុកចិត្របុរី និងស្រុកព្រែកប្រសព្វ រួមជាមួយផ្លូវតភ្ជាប់ជាង ៣៣គីឡូម៉ែត្រ ចាប់ពីផ្លូវជាតិលេខ៧ (រង្វង់មូលខ្លាស្ទុះ) ទៅផ្លូវជាតិលេខ៦០B។ គម្រោងនេះនឹងក្លាយជាសរសៃឈាមសេដ្ឋកិច្ចដ៏សំខាន់ តភ្ជាប់ខេត្តក្រចេះទៅខេត្តកំពង់ធំ និងសម្រួលការធ្វើដំណើររបស់ប្រជាពលរដ្ឋក្នុងតំបន់ឱ្យកាន់តែងាយស្រួល។ គួរបញ្ជាក់ថា ស្ពាននេះប្រើប្រាស់ឥណទានសម្បទានពីរដ្ឋាភិបាលចិន ដែលបានបើកការដ្ឋានសាងសង់កាលពីដើមឆ្នាំ២០២៣៕