ថ្នាក់ដឹកនាំអគ្គនាយកដ្ឋាន នៃក្រសួងសាធារណការ និងដឹកជញ្ជូន ចូលរួមវគ្គបណ្តុះបណ្តាលភាពជាអ្នកដឹកនាំបរិវត្តកម្មឌីជីថល ស្តីពី «បច្ចេកវិទ្យាថ្មីៗ និងនវានុវត្តន៍សម្រាប់ថ្នាក់ដឹកនាំក្រសួង ស្ថាប័ន» រាជធានីភ្នំពេញ៖ នាថ្ងៃពុធ ទី១ ខែកក្កដា ឆ្នាំ២០២៦ ថ្នាក់ដឹកនាំអគ្គនាយកដ្ឋាន នៃក្រសួងសាធារណការ និងដឹកជញ្ជូន បានអញ្ជើញចូលរួមវគ្គបណ្តុះបណ្តាលភាពជាអ្នកដឹកនាំបរិវត្តកម្មឌីជីថល ស្តីពី «បច្ចេកវិទ្យាថ្មីៗ និងនវានុវត្តន៍សម្រាប់ថ្នាក់ដឹកនាំក្រសួង ស្ថាប័ន» និងទទួលបានវិញ្ញាបនបត្របញ្ជាក់ការបញ្ចប់វគ្គបណ្តុះបណ្តាលក្នុងពិធីបិទ ដែលប្រព្រឹត្តទៅក្រោមអធិបតីភាព ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ នៅមជ្ឈមណ្ឌលបណ្តុះបណ្តាល នៃសាកលវិទ្យាល័យអាម៉េរិកាំងភ្នំពេញ។ វគ្គបណ្តុះបណ្តាលនេះ ត្រូវបានរៀបចំឡើងសម្រាប់ថ្នាក់ដឹកនាំក្រសួង ស្ថាប័ន កម្រិតអគ្គលេខាធិការ អគ្គនាយក និងអគ្គាធិការ ដោយបែងចែកជាពីរក្រុម។ ក្រុមទី១ បានប្រព្រឹត្តទៅចាប់ពីថ្ងៃទី២៥ ដល់ថ្ងៃទី២៧ ខែមិថុនា ឆ្នាំ២០២៦ និងក្រុមទី២ ចាប់ពីថ្ងៃទី២៩ ខែមិថុនា ដល់ថ្ងៃទី១ ខែកក្កដា ឆ្នាំ២០២៦។ ក្នុងនោះ ក្រសួងសាធារណការ និងដឹកជញ្ជូន បានបញ្ជូនថ្នាក់ដឹកនាំអគ្គនាយកដ្ឋានចូលរួមពីអគ្គនាយកដ្ឋានសាធារណការ អគ្គនាយកដ្ឋានប្រព័ន្ធចម្រោះទឹកកខ្វក់ អគ្គនាយកដ្ឋានភស្តុភារកម្ម និងអគ្គនាយកដ្ឋានបច្ចេកវិទ្យា និងទំនាក់ទំនងសាធារណៈ។ កម្មវិធីបណ្តុះបណ្តាលនេះ ត្រូវបានរៀបចំឡើងដោយផ្តោតលើប្រធានបទសំខាន់ៗ ស្របតាមនិន្នាការវិវត្តយ៉ាងឆាប់រហ័សនៃបច្ចេកវិទ្យាឌីជីថល និងការជំរុញនវានុវត្តន៍ក្នុងវិស័យសាធារណៈ ព្រមទាំងមានសាស្រ្តាចារ្យអន្តរជាតិដ៏ល្បីឈ្មោះចំនួន ២រូប គឺ លោកសាស្រ្តាចារ្យ ហ្គីដូ ជីណាសូ (GUIDO GIANASSO) ដែលជាអ្នកជំនាញលើភាពជាអ្នកដឹកនាំ និង Cultural Intelligence និងលោកសាស្រ្តាចារ្យ ហ្សីរីស ស៊ី ស្រ៊ីវ៉ាស្តាវ៉ា (Shirish C. Srivastava) ជាអ្នកជំនាញបណ្តុះបណ្តាលមន្ត្រីជាន់ខ្ពស់រដ្ឋាភិបាល។ ការចូលរួមវគ្គបណ្តុះបណ្តាលនេះ គឺជាឱកាសដ៏មានសារៈសំខាន់ក្នុងការពង្រឹងសមត្ថភាពថ្នាក់ដឹកនាំអគ្គនាយកដ្ឋានរបស់ក្រសួងសាធារណការ និងដឹកជញ្ជូន ឱ្យទទួលបានចំណេះដឹង និងទស្សនវិស័យថ្មីៗពាក់ព័ន្ធនឹងការដឹកនាំបរិវត្តកម្មឌីជីថល និងនវានុវត្តន៍ ដើម្បីរួមចំណែកលើកកម្ពស់ប្រសិទ្ធភាពនៃការផ្តល់សេវាសាធារណៈ និងការអភិវឌ្ឍស្ថាប័នឱ្យកាន់តែទំនើប ស្របតាមបរិបទនៃការប្រែក្លាយឌីជីថលរបស់រាជរដ្ឋាភិបាលកម្ពុជា៕