មន្ត្រីជំនាញ របស់ក្រសួងសាធារណការ និងដឹកជញ្ជូន ចូលរួមវគ្គបណ្តុះបណ្តាលនៅសាធារណរដ្ឋកូរ៉េ ដើម្បីពង្រឹងសមត្ថភាពលើការអភិវឌ្ឍប្រព័ន្ធដឹកជញ្ជូនឆ្លាតវៃ (ITS) សាធារណរដ្ឋកូរ៉េ៖ ចាប់ពីថ្ងៃទី២២ ដល់ថ្ងៃទី២៦ ខែមិថុនា ឆ្នាំ២០២៦ មន្ត្រីជំនាញចំនួន ៦រូប នៃក្រសួងសាធារណការ និងដឹកជញ្ជូន បានចូលរួមវគ្គបណ្តុះបណ្តាល ដើម្បីសិក្សាស្វែងយល់ និងផ្លាស់ប្តូរបទពិសោធន៍លើការអភិវឌ្ឍប្រព័ន្ធដឹកជញ្ជូនឆ្លាតវៃ (Intelligent Transport Systems: ITS) ក្រោមជំនួយអភិវឌ្ឍន៍ផ្លូវការ (Official Development Assistance: ODA) ដែលផ្តល់ដោយក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ។ វគ្គបណ្តុះបណ្តាលនេះ ត្រូវបានរៀបចំក្នុងក្របខណ្ឌគម្រោង «សាកល្បងប្រព័ន្ធដឹកជញ្ជូនឆ្លាតវៃ ផ្អែកលើ Big Data នៅកម្ពុជា»។ ក្នុងក្របខណ្ឌគម្រោងនេះ ក្រុមការងារបច្ចេកទេសកូរ៉េ និងក្រុមការងារបច្ចេកទេសនៃអគ្គនាយកដ្ឋានដឹកជញ្ជូនផ្លូវគោក បានសហការរៀបចំ និងបញ្ចប់ការតាក់តែងឯកសារ «ផែនការមេសម្រាប់ការអភិវឌ្ឍប្រព័ន្ធដឹកជញ្ជូនឆ្លាតវៃនៅកម្ពុជា» ដែលគ្រោងនឹងប្រកាសដាក់ឱ្យប្រើប្រាស់ជាផ្លូវការ នៅថ្ងៃទី១៤ ខែកក្កដា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម រដ្ឋមន្ត្រីក្រសួងសាធារណការ និងដឹកជញ្ជូន និងតំណាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ។ បន្ថែមពីនេះ គម្រោង ITS កំពុងអនុវត្តសាកល្បងនៅតាមខ្សែផ្លូវមេសំខាន់ៗមួយចំនួន ក្នុងតំបន់ស្នូលនៃរាជធានីភ្នំពេញ ដោយមានគោលបំណងលើកកម្ពស់ប្រសិទ្ធភាពនៃការគ្រប់គ្រងចរាចរណ៍ បង្កើនចល័តភាព និងសុវត្ថិភាពក្នុងទីក្រុង ព្រមទាំងបង្កើតប្រព័ន្ធផ្តល់ព័ត៌មានចរាចរណ៍ឆ្លាតវៃ ដែលអាចផ្តល់ទិន្នន័យបានត្រឹមត្រូវ និងទាន់ពេលវេលា ជូនអ្នកប្រើប្រាស់ផ្លូវ និងស្ថាប័នពាក់ព័ន្ធ ដើម្បីសម្រួលដល់ការធ្វើដំណើរ កាត់បន្ថយការកកស្ទះ និងរួមចំណែកកាត់បន្ថយគ្រោះថ្នាក់ចរាចរណ៍។ ការចូលរួមវគ្គបណ្តុះបណ្តាលរបស់មន្ត្រីជំនាញក្រសួងសាធារណការ និងដឹកជញ្ជូន នាពេលនេះ គឺជាផ្នែកមួយនៃការពង្រឹងសមត្ថភាពធនធានមនុស្ស និងការផ្ទេរចំណេះដឹងបច្ចេកទេសពីសាធារណរដ្ឋកូរ៉េ ដើម្បីគាំទ្រដល់ការអភិវឌ្ឍ និងការអនុវត្តប្រព័ន្ធដឹកជញ្ជូនឆ្លាតវៃនៅកម្ពុជា ស្របតាមទិសដៅនៃការកសាងប្រព័ន្ធដឹកជញ្ជូនទំនើប ប្រកបដោយប្រសិទ្ធភាព សុវត្ថិភាព និងនិរន្តរភាព សម្រាប់បម្រើដល់ការអភិវឌ្ឍសេដ្ឋកិច្ច និងលើកកម្ពស់គុណភាពជីវិតរបស់ប្រជាពលរដ្ឋ៕