ភ្នំពេញ៖ មន្ត្រីក្រសួងសាធារណៈការនិងដឹកជញ្ជូនបានអះអាងថា គម្រោងផ្លូវល្បឿនលឿនភ្នំពេញ ខេត្តព្រះសីហនុដែលមា​នប្រវែងជា​ង១៩០​គីឡូម៉ែ​ត្រនឹង​ចាប់​ផ្តើមធ្វើពិធីបើកការដ្ឋានសាងសង់ពិតប្រាកដរបស់ខ្លួននៅចុងឆ្នាំ២០១៨ឬដើមឆ្នំា២០១៩នេះហើយ។ លោក នូ វឌ្ឍនៈ អគ្គនាយករងនៃអគ្គនាយកដ្ឋានសាធារណៈការនៃក្រសួងសាធារណៈការនិងដឹកជញ្ជូនមានប្រសាសន៍ឱ្យដឹងនៅថ្ងៃទី៨វិច្ឆិកាម្សិលមិញថា គ​ម្រោងផ្លូវល្បឿនលឿនពីភ្នំពេញទៅខេត្តព្រះសីហនុនឹងចាប់ផ្តើមបើកការដ្ឋានសាងសង់នៅចុងឆ្នំា២០១៨នេះហើយការដោះស្រាយពីផលប៉ះពាល់នៃគម្រោងធ្វើក្នុងពេលតែមួយ។អ្នកសាងសង់ចេះតែធ្វើការងាររបស់ខ្លួនទៅ ហើយក្រុមអ្នកដោះស្រាយប៉ះពាល់ដោះជាបណ្តើរៗ។ លោក វ៉ាស៊ឹម សុរិយា មន្ត្រីអ្នកនាំពាក្យក្រសួងសាធារណៈការនិងដឹកជញ្ជូនមានប្រសាសន៍ថា៖« យើងអត់ទាន់ប្រាកដថ្ងៃជាក់លាក់ទេ ប៉ុន្តែនៅឆ្នំាហ្នឹងយើ​ង​នឹង​រៀបចំពិធីបើកការដ្ឋានសាងសង់ផ្លូវល្បឿនលឿន។ ព្រោះនេះវាមិនមែនជាការសម្រេចរបស់ក្រសួងតែម្នាក់នោះទេ ត្រូវសុំទៅថ្នាក់ដឹកនាំរដ្ឋាភិបាល ដើម្បីស​ម្រេចនិងអញ្ចើញចូលរួមនៅក្នុងពិធី។ អីចឹងយើងត្រូវមានជាគោលការណ៍។ តែបើជាកាលវិភាគយើងកំណត់នៅចុងឆ្នំា២០១៨ឬដើមឆ្នំា២០១៩»។ លោកបញ្ជាក់ថា៖« គម្រោងសាងសង់ផ្លូវល្បឿនលឿនឱ្យកំណត់ថ្ងៃណាជាក់លាក់ យើងអត់អាចកំណត់ជូនបានទេ។ទី១-យើងមើលទៅលើលទ្ធភាពរ​បស់​ក្រុម​ហ៊ុននៅក្នុងការចល័តគ្រឿងចក្រ,ទី២-មើលទៅលើ កា រដោះស្រាយផលប៉ះពាល់និងទី៣- ផ្នែកទៅលើនីតិវិធីចុងក្រោយ ប៉ុន្តែនីតិវិធីខ្លះត្រូវ​កែសម្រួល​ឡើង​វិញ»។ តាមមន្ត្រីអ្នកនាំពាក្យ បើគម្រោងផ្លូវល្បឿនលឿនអាចនឹងចា​ប់ផ្តើមសាងសង់លិចជារូបរាង្គ​នៅចុងឆ្នំានេះឬដើមឆ្នំា២០១៩ពិតហើយនោះវានឹង​បានចូលរួមផ្តល់​ទំនុកចិត្តបន្ថែមទៀតទៅដល់វិនិយោគិនបរទេស មកលើការប្តេជ្ញាចិត្តក្នុងការអភិវឌ្ឍន៍ប្រទេសនិងការរក្សាសុខសន្តិភាព។ លោក វ៉ាស៊ឹម សុរិយា លើកឡើងថា៖ជាធម្មតាវិនិយោគិនគេនឹងមើលទៅលើការវិនិយោគរបស់រដ្ឋាភិបាលឬប្រទេសនីមួយៗកំពុងតែអនុវត្ត មានជាគម្រោង​ធំៗច្រើន ដូចជាផ្លូវល្បឿនលឿន ,ព្រលានយន្តហោះ, ស្ពានធំៗឬក៏កំពង់ផែធំៗនោះនឹង​ធ្វើឱ្យគេជំនឿចិត្តមកលើរាជរដ្ឋាភិបាល​ដែលមានការប្តេជ្ញា​ចិត្ត​អភិ​វឌ្ឍន៍ប្រទេសនិងរក្សាសន្តិភាព»។ បើតាមលោក នូ វឌ្ឍនៈ ធ្លាប់មានប្រសាសន៍ថា ផ្លូវល្បឿនលឿននេះ មាន៤គន្លង,ទទឹងផ្លូវប្រវែង២៤ម៉ែត្រក្រាដោយកៅស៊ូAC,មានសូនច្បារខណ្ឌកណ្តាល និងមានរបងសងខាងនេះ នឹងចាប់ផ្តើមនាពេលឆាប់ៗ ប្រើរយៈពេលសាងសង់ប្រហែល៥ឆ្នំា។តាមបណ្តោយផ្លូវល្បឿនលឿននេះ មានស្ពានវែងនិងម​ធ្យមមា​ន៥៦កន្លែង, ស្ពានខ្លី ៣៣កន្លែង,ស្ពានរម្លងឬផ្លោះផ្លូវ៣២១កន្លែង និងមានកន្លែងឈប់សម្រាកចំនួន៣កន្លែង៕