កិច្ចប្រជុំពិភាក្សាស្ដីពី វឌ្ឍនភាពការងារទីប្រឹក្សាផ្នែកប្រតិបត្តិការ និងការរចនាប្លង់លម្អិតសម្រាប់ការសាងសង់ទីលានទុកដាក់សំរាម ខេត្តកំពង់ស្ពឺ កំពង់ស្ពឺ៖ ថ្ងៃទី១៩ ខែមិថុនា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានអញ្ជើញដឹកនាំក្រុមការងារអនុវត្តគម្រោង ចូលរួមក្នុងកិច្ចប្រជុំពិភាក្សាស្ដីអំពី វឌ្ឍនភាពការងារទីប្រឹក្សាផ្នែកប្រតិបត្តិការ និងការរចនាប្លង់លម្អិតសម្រាប់ការសាងសង់ទីលានទុកដាក់សំរាម និងទីតាំងកែច្នៃកាកសំណល់ សម្រាប់គម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងប្លាស្ទិក នៅប្រទេសកម្ពុជា។ កិច្ចប្រជុំនេះ មានការអញ្ជើញចូលរួមពី តំណាងក្រសួងមហាផ្ទៃ តំណាងក្រសួងបរិស្ថាន រដ្ឋបាលខេត្តកំពង់ស្ពឺ និងក្រុមការងារបេសកកម្មរបស់ធនាគារពិភពលោក ដឹកនាំដោយលោកស្រី Katelijn van den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារបេសកកម្មរបស់ធនាគារពិភពលោក (WB) ក្រុមការងារទីប្រឹក្សាប្រតិបត្តិការ Crisil ក្រុមហ៊ុនទីប្រឹក្សាបច្ចេកទេស DOHWA Engineering ក្រុមហ៊ុន Es International Consultants និងមន្ត្រីដែលពាក់ព័ន្ធផងដែរ។ គោលបំណងនៃកិច្ចប្រជុំនេះគឺដើម្បីពិភាក្សាអំពីវឌ្ឍនភាពការងាររបស់ទីប្រឹក្សាប្រតិបត្តិការក្នុងការវិភាគកាកសំណល់ (upstream waste analysis) សម្រាប់ខេត្តកំពង់ស្ពឺ និងការពិនិត្យពិភាក្សាលើការរចនាប្លង់លម្អិតសម្រាប់ការសាងសង់ទីលានទុកដាក់សំរាម និងទីតាំងកែច្នៃកាកសំណល់ របស់ក្រុមហ៊ុនទីប្រឹក្សាបច្ចេកទេស DOHWA Engineering ដើម្បីទទួលបានទីលានទុកដាក់សំរាមមួយប្រកបដោយគុណភាព និងតាមលក្ខណៈស្ដង់ផងដែរ៕