ពិធីបិទបញ្ចប់គម្រោងអភិវឌ្ឍន៍សញ្ញាជំនួយនាវាចរណ៍នៅតាមផ្លូវទឹក នៅក្នុងព្រះរាជាណាចក្រកម្ពុជា ភ្នំពេញ៖ នៅថ្ងៃទី១៧ ខែមិថុនា ឆ្នាំ២០២៦ ឯកឧត្តម អៀង វ៉េងស៊ុន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីពិធីបិទបញ្ចប់គម្រោងអភិវឌ្ឍន៍សញ្ញាជំនួយនាវាចរណ៍នៅតាមផ្លូវទឹក នៅក្នុងព្រះរាជាណាចក្រកម្ពុជា ដោយមានការចូលរួមពីថ្នាក់ដឹកនាំក្រសួង ថ្នាក់ដឹកនាំនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ តំណាងមកពីកំពង់ផែស្វយ័តភ្នំពេញ មន្រ្តីបច្ចេកទេសពាក់ព័ន្ធ និងក្រុមអ្នកជំនាញការ នៃវិទ្យាស្ថានសញ្ញាជំនួយនាវាចរណ៍កូរ៉េ ផងដែរ។ សូមបញ្ជាក់ផងដែរថា គម្រោងអភិវឌ្ឍន៍សញ្ញាជំនួយនាវាចរណ៍នៅតាមផ្លូវទឹកនៅក្នុងព្រះរាជាណាចក្រកម្ពុជានេះស្ថិតក្រោមកិច្ចសហប្រតិបត្តិការ និងជំនួយហិរញ្ញប្បទានពីរដ្ឋាភិបាលនៃសាធារណរដ្ឋកូរ៉េ តាមរយៈវិទ្យាស្ថានសញ្ញាជំនួយនាវាចរណ៍កូរ៉េ ក្នុងគោលបំណងធានាឱ្យបាននូវសុវត្ថិភាពក្នុងការធ្វើនាវាចរណ៍តាមផ្លូវទឹកនៅកម្ពុជា។ នៅក្នុងឆ្នាំ២០២៦នេះ គម្រោងបានរៀបចំដំឡើងពោងសញ្ញាជំនួយនាវាចរណ៍នៅតាមបណ្តោយទន្លេមគង្គក្រោម ចាប់ពីទន្លេចតុមុខរហូតដល់ព្រំដែនកម្ពុជា-វៀតណាម ផ្តល់រថយន្តសម្រាប់ប្រើប្រាស់ក្នុងការអនុវត្តគម្រោង ព្រមទាំងបណ្តុះបណ្តាលសមត្ថភាពបន្ថែមដល់មន្រ្តីជំនាញរបស់អគ្គនាយកដ្ឋាន និងកំពង់ផែស្វយ័តភ្នំពេញ និងបានរៀបចំសិក្ខាសាលាស្តីពីការលើកកម្ពស់ប្រព័ន្ធនាវាចរណ៍នៅតាមផ្លូវទឹក នៅក្រសួងសាធារណការ និងដឹកជញ្ជូនផងដែរ។ ជាមួយគ្នានេះដែរ ជំហានបន្ទាប់ អគ្គនាយកដ្ឋាននឹងរៀបចំឯកសារគាំទ្រនានា ដើម្បីស្នើសុំថវិកាសម្រាប់គម្រោងបន្តឆ្នាំ២០២៨៕