កិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្ដីព្រាងច្បាប់ស្ដីពីចរាចរណ៍ផ្លូវគោក ទីស្ដីការគណៈរដ្ឋមន្ត្រី៖ នាថ្ងៃអង្គារ ទី៩ ខែមិថុនា ឆ្នាំ២០២៦ លោកជំទាវ មឹន មាណវី និង ឯកឧត្ដម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន បានដឹកនាំប្រតិភូក្រសួង ចូលរួមកិច្ចប្រជុំអន្តរក្រសួង ដើម្បីពិនិត្យ និងពិភាក្សាលើសេចក្ដីព្រាងច្បាប់ស្ដីពីចរាចរណ៍ផ្លូវគោក ក្រោមអធិបតីភាព ឯកឧត្ដម ឆឺយ រឿន រដ្ឋលេខាធិការទីស្ដីការគណៈរដ្ឋមន្ត្រី ដោយមានការអញ្ជើញចូលរួមពីសំណាក់ ឯកឧត្ដម លោកជំទាវ លោក លោកស្រី តំណាងក្រសួង ស្ថាប័នពាក់ព័ន្ធ ទីស្ដីការគណៈរដ្ឋមន្ត្រី ក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ គណៈកម្មការភាសាវិទ្យាខ្មែរ និងមន្ត្រីជំនាញជាច្រើនរូបផ្សេងទៀត។ កិច្ចប្រជុំនេះត្រូវបានរៀបចំឡើងក្នុងគោលបំណងដើម្បីពិនិត្យ ពិភាក្សា និងផ្លាស់ប្តូរយោបល់លើសេចក្ដីព្រាងច្បាប់ថ្មីស្ដីពីចរាចរណ៍ផ្លូវគោក ដើម្បីឱ្យស្របទៅបរិបទជាក់ស្ដែងរបស់ប្រទេសជាតិដែលមានការរីកចម្រើនទាំងផ្នែកសេដ្ឋកិច្ច និងសង្គម ព្រមទាំងពង្រឹងការគ្រប់គ្រងសុវត្ថិភាពចរាចរណ៍ផ្លូវគោក ការទប់ស្កាត់ការប្រព្រឹត្តបទល្មើសដែលបណ្ដាលមកពីការប្រើប្រាស់ផ្លូវ និងការរក្សាសណ្ដាប់ធ្នាប់ចរាចរណ៍ផ្លូវគោក ធានាការពារសុខភាពនិងអាយុជីវិតមនុស្ស សត្វ ទ្រព្យសម្បត្តិ និងបរិស្ថាន។ បន្ទាប់ពីបានពិនិត្យ ពិភាក្សា និងផ្លាស់ប្តូរយោបល់លើទិដ្ឋភាពពាក់ព័ន្ធ ដោយយកចិត្តទុកដាក់រួចមក អង្គប្រជុំបានសម្រេចបានលទ្ធផលដូចខាងក្រោម៖ ១-កែសម្រួលពាក្យពេចន៍ និងខ្លឹមសារមួយចំនួន និងឯកភាពទទួលយកទាំងស្រុងលើខ្លឹមសារនៃសេចក្តីព្រាងច្បាប់ថ្មី ស្តីពីចរាចរណ៍ផ្លូវគោក។ ២-ឱ្យក្រសួងសាធារណការ និងដឹកជញ្ជូន ជួបប្រជុំចង្អៀតជាមួយក្រសួងយុត្តិធម៌ និងអង្គភាពប្រឆាំងអំពើពុករលួយ ដើម្បីពិនិត្យ និងពិភាក្សាលើមាត្រាដែលពាក់ព័ន្ធនឹងទោសប្បញ្ញត្តិ។ ៣-បន្តនីតិវិធីប្រជុំតាមយន្តការទីស្តីការគណៈរដ្ឋមន្ត្រី បន្ទាប់ពីកិច្ចប្រជុំចង្អៀតដើម្បីពិនិត្យ និងពិភាក្សាលើមាត្រាដែលពាក់ព័ន្ធនឹងទោសប្បញ្ញត្តិ៕