ពិធីបើកវគ្គបណ្តុះបណ្តាល និងសម្ពោធផ្លាក “មជ្ឈមណ្ឌលអប់រំ និងបណ្តុះបណ្តាលសុវត្ថិភាពចរាចរណ៍កម្ពុជា” នារសៀលថ្ងៃទី៨ ខែមិថុនា ឆ្នាំ២០២៦ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុបានរៀបចំកម្មវិធីបើកវគ្គបណ្តុះបណ្តាល និងសម្ពោធផ្លាក “មជ្ឈមណ្ឌលអប់រំ និងបណ្តុះបណ្តាលសុវត្ថិភាពចរាចរណ៍កម្ពុជា ”ដោយមានការអញ្ជើញចូលរួមពីសំណាក់ឯកឧត្តម ស៊ឹង សុគង់ អនុរដ្ឋលេខាធិការក្នុងនាមឯកឧត្តម សួង ហេង រដ្ឋលេខាធិការនៃក្រសួងសាធារណការ និងដឹកជញ្ជូន និងតំណាងអគ្គស្នងការដ្ឋាននគរបាលជាតិ ប្រចាំការផ្លូវល្បឿនលឿនភ្នំពេញ-ក្រុងព្រះសីហនុ។ ការសម្ភោធជាផ្លូវការនៃ “មជ្ឈមណ្ឌលអប់រំ និងបណ្តុះបណ្តាលសុវត្ថិភាពចរាចរណ៍កម្ពុជា” គឺជាលទ្ធផលនៃការរៀបចំឱ្យមានលក្ខណៈប្រព័ន្ធនៃបទពិសោធន៍អនុវត្តផ្នែកសុវត្ថិភាពរយៈពេលបួនឆ្នាំរបស់ផ្លូវល្បឿនលឿនភ្នំពេញ-ក្រុងព្រះសីហនុ ហើយក៏ជាវិធានការសំខាន់មួយក្នុងការបម្លែងសមត្ថភាព សុវត្ថិភាពរបស់សហគ្រាសឱ្យក្លាយជាធនធានសាធារណៈ។ មជ្ឈមណ្ឌលនេះនឹងផ្តល់ការគាំទ្រដ៏រឹងមាំ សម្រាប់ការលើកកម្ពស់កម្រិតគ្រប់គ្រងសុវត្ថិភាពចរាចរណ៍ និងការអភិវឌ្ឍធនធានមនុស្សផ្នែកនេះនៅកម្ពុជា។ យោងតាមទិន្នន័យនៃផេក នាយកដ្ឋានសុវត្ថិភាពចរាចរណ៍ផ្លូវគោក ក្នុងឆ្នាំ២០២៥ ប្រៀបធៀប ឆ្នាំ២០២៤ ចំនួនគ្រោះថ្នាក់ចរាចរណ៍ផ្លូវគោកមាន ២ ៣៤៥លើក ថយ ៤៩៩លើកស្មើនឹង ១៧,៥% អ្នកស្លាប់ ១ ៤៦៧នាក់ ថយ ៤២នាក់ ស្មើនឹង ២,៨% របួសធ្ងន់ ១ ៨៦៩នាក់ ថយ ៤០៤នាក់ ស្មើនឹង ១៧,៨% របួសស្រាល ១ ៣៤៤នាក់ ថយ ១០៣នាក់ ស្មើនឹង ៧,១%។ ក្នុងអង្គពិធីអគ្គនាយក ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុលោកFang Xisheng បានលើកឡើងចំនួន ៣ ចំណុចដូចខាងក្រោមពាក់ព័ន្ធកិច្ចការងារបណ្តុះបណ្តាលរបស់មជ្ឈមណ្ឌលបណ្តុះបណ្តាលនាពេលខាងមុខ៖ ទីមួយ៖ ពង្រីកវិសាលភាពអនុវត្តឱ្យគ្របដណ្តប់ទូលំទូលាយ និងកសាងមូលដ្ឋានសុវត្ថិភាពឱ្យរឹងមាំ តាមរយៈការចូលរួមយ៉ាងពេញលេញរបស់បុគ្គលិកគ្រប់ជាន់ថ្នាក់។ មជ្ឈមណ្ឌលបណ្តុះបណ្តាល ត្រូវតែបំពេញតួនាទីឱ្យបានពេញលេញក្នុងការដឹកនាំ និងជំរុញឥទ្ធិពលប្រព័ន្ធស្តង់ដានីយកម្ម ដោយប្រកាន់ខ្ជាប់គោលការណ៍ “ការបណ្តុះបណ្តាលគ្របដណ្តប់ទាំងស្រុង សុវត្ថិភាពគ្រប់ជ្រុងជ្រោយមិនមានចន្លោះប្រហោង”។ ទីពីរ៖ ត្រូវប្រកាន់ខ្ជាប់គោលការណ៍ដឹកនាំដោយការអនុវត្តជាក់ស្តែង និងពង្រឹងសមត្ថភាពឆ្លើយតបគ្រោះអាសន្នឱ្យកាន់តែខ្លាំងក្លា តាមរយៈការរួមបញ្ចូលរវាងចំណេះដឹង និងការអនុវត្ត។ មជ្ឈមណ្ឌលបណ្តុះបណ្តាល ត្រូវតែប្រកាន់ខ្ជាប់លើគោលការណ៍អនុវត្តជាក់ស្តែង និងផ្តោតលើប្រសិទ្ធភាពជាក់ស្តែង ដោយផ្សារភ្ជាប់យ៉ាងជិតស្និទ្ធទៅនឹងហានិភ័យជាក់ស្តែងក្នុងប្រតិបត្តិការ ដូចជាអាកាសធាតុមិនអំណោយផល គ្រោះថ្នាក់លើដងផ្លូវ និងគ្រោះថ្នាក់ជាយថាហេតុផ្សេងៗ ហើយរៀបចំអនុវត្តការបណ្តុះបណ្តាលជំនាញឆ្លើយតបអាសន្ន និងការហាត់សមពិសេស។ ទីបី៖ ត្រូវពង្រឹងកិច្ចសហការរវាងរដ្ឋ និងសហគ្រាស ដើម្បីជំរុញបរិយាកាសចរាចរណ៍លើផ្លូវល្បឿនលឿនឱ្យសម្រេចបានការគ្រប់គ្រងហានិភ័យបានកម្រិត១០០%ជាប្រចាំ និងមានប្រសិទ្ធភាពយូរអង្វែង។ មជ្ឈមណ្ឌលនេះមិនត្រឹមតែជាទីតាំងបណ្តុះបណ្តាលផ្ទៃក្នុងរបស់ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុប៉ុណ្ណោះទេ ប៉ុន្តែវាក៏ជាវេទិកាដ៏សំខាន់សម្រាប់ផ្សព្វផ្សាយចំណេះដឹងសុវត្ថិភាពជូនដល់សាធារណជនក្នុងប្រទេសកម្ពុជាផងដែរ។ តាមរយៈការផ្សព្វផ្សាយ និងការបណ្តុះបណ្តាលសុវត្ថិភាពជាប្រចាំ យើងនឹងផ្សព្វផ្សាយចំណេះដឹងសុវត្ថិភាពលើផ្លូវល្បឿនលឿនដល់សាធារណជនទូទៅ ជំរុញឱ្យមានការធ្វើដំណើរដោយគោរពច្បាប់ចរាចរណ៍ ហើយដោះស្រាយយ៉ាងម៉ឺងម៉ាត់នូវបញ្ហាផ្សេងៗដែលប៉ះពាល់ដល់បរិយាកាសចរាចរណ៍លើផ្លូវល្បឿនលឿនដើម្បីបន្តលើកកម្ពស់រូបភាពនៃកម្រិតសុវត្ថិភាពនៃប្រតិបត្តិការផ្លូវល្បឿនលឿនពេញ-ក្រុងព្រះសីហនុ ឱ្យកាន់តែរឹងមាំ និងមានទំនុកចិត្ត។