ភ្នំពេញ: ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានណែនាំឱ្យក្រុមហ៊ុន រោងចក្រ និងសហគ្រាសផលិត នាំចូល និងចរាចរលក់យានយន្តអគ្គិសនីទាំងអស់ ពង្រឹងការផ្សព្វផ្សាយ និងបណ្តុះបណ្តាលអំពីសុវត្ថិភាពដល់អ្នកប្រើប្រាស់ ដោយព្រមានថា ការយល់ដឹងនៅមានកម្រិតអាចបង្កហានិភ័យដល់សុវត្ថិភាពសាធារណៈ ទ្រព្យសម្បត្តិ បរិស្ថាន និងសង្គម ខណៈការប្រើប្រាស់យានយន្តអគ្គិសនីនៅកម្ពុជាកំពុងកើនឡើង។នៅក្នុងសេចក្តីណែនាំចុះថ្ងៃទី១២ ខែឧសភា ក្រសួងបានឱ្យដឹងថា បច្ចុប្បន្នអ្នកប្រើប្រាស់យានយន្តអគ្គិសនីមួយចំនួន “មានការយល់ដឹងពីស្តង់ដារសុវត្ថិភាពនៃការប្រើប្រាស់នៅមានកម្រិត” ដែលអាចបង្កហានិភ័យដល់អ្នកបើកបរ អ្នករួមដំណើរ អ្នកដំណើរតាមផ្លូវសាធារណៈ និងប៉ះពាល់ដល់ទ្រព្យសម្បត្តិ បរិស្ថាន និងសង្គម។ សេចក្តីណែនាំនេះ ត្រូវបានមើលឃើញថា ជាជំហានថ្មីមួយរបស់រាជរដ្ឋាភិបាលក្នុងការពង្រឹងការគ្រប់គ្រងសុវត្ថិភាពនៃវិស័យយានយន្តអគ្គិសនី ខណៈរថយន្តអគ្គិសនីនាំចូល ជាពិសេសពីប្រទេសចិន កំពុងមានវត្តមានកាន់តែច្រើននៅលើដងផ្លូវក្នុងរាជធានីភ្នំពេញ និងបណ្តាខេត្តនានា។តាមការណែនាំ ក្រុមហ៊ុន និងសហគ្រាសពាក់ព័ន្ធ ត្រូវរៀបចំគោលការណ៍ណែនាំអំពីសុវត្ថិភាពបឋមជាភាសាខ្មែរ ដោយភ្ជាប់រូបភាព សម្រាប់ការប្រើប្រាស់យានយន្តអគ្គិសនីគ្រប់ប្រភេទ មុននឹងចរាចរលក់នៅលើទីផ្សារ។ ក្រសួងបានលើកឡើងថា: “ការណែនាំទាំងនោះ ត្រូវរួមបញ្ចូលការដោះស្រាយករណីដូចជា ការគាំងប្រព័ន្ធយានយន្តដែលមិនអាចបើកទ្វារ ឬបង្អួចបាន ការឆេះ ឬផ្ទុះអាគុយនៅពេលប៉ះទង្គិច ការឡើងកំដៅអាគុយពេលបញ្ចូលចរន្តអគ្គិសនី ការប្រើប្រាស់ដុំសាកនៅពេលកំពុងមានភ្លៀង និងការឆ្លងប្រព័ន្ធអគ្គិសនីនៅពេលបើកបរក្នុងរដូវវស្សា ឬឆ្លងកាត់ផ្លូវទឹកលិចជាដើម”។ បន្ថែមពីនេះ ក្រសួងក៏បានណែនាំឱ្យផលិតវីដេអូខ្លីៗ ដើម្បីផ្សព្វផ្សាយអំពីគោលការណ៍សុវត្ថិភាពបឋម និងត្រូវបង្រៀនណែនាំដល់អ្នកប្រើប្រាស់អំពីហានិភ័យដែលអាចកើតមាន មុននឹងប្រគល់យានយន្តជូនអតិថិជន។ សេចក្តីណែនាំក៏បានតម្រូវឱ្យយានយន្តអគ្គិសនីគ្រប់ប្រភេទ ត្រូវចុះបញ្ជីបញ្ជាក់ពីសុវត្ថិភាពស្របតាមស្តង់ដារកម្ពុជា និងបទប្បញ្ញត្តិបច្ចេកទេសរបស់ក្រសួង ខណៈក្រុមហ៊ុនត្រូវផ្តល់កិច្ចសហការដល់មន្ត្រីអធិការកិច្ចស្តង់ដារកម្ពុជា។ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជាបានជំរុញការប្រើប្រាស់ថាមពលស្អាត និងការប្រើប្រាស់យានយន្តអគ្គិសនី តាមរយៈគោលនយោបាយលើកទឹកចិត្តផ្សេងៗ។ ទោះយ៉ាងណា ប្រព័ន្ធហេដ្ឋារចនាសម្ព័ន្ធសម្រាប់យានយន្តអគ្គិសនីនៅកម្ពុជា រួមទាំងស្ថានីយសាកភ្លើង សេវាបច្ចេកទេស និងការយល់ដឹងរបស់សាធារណជន នៅស្ថិតក្នុងដំណាក់កាលអភិវឌ្ឍន៍នៅឡើយ។ ក្រសួងបានបញ្ជាក់ថា ខ្លួនសង្ឃឹមថា ក្រុមហ៊ុន រោងចក្រ និងសហគ្រាសពាក់ព័ន្ធទាំងអស់ នឹង “ចូលរួមសហការអនុវត្តឱ្យមានប្រសិទ្ធភាព” ដើម្បីកាត់បន្ថយហានិភ័យ និងលើកកម្ពស់សុវត្ថិភាពសាធារណៈ។