លោក សាយ វណ្ណៈ អភិបាលនៃគណៈអភិបាលស្រុកបាទី នៅថ្ងៃទី១៩ ខែឧសភា ឆ្នាំ២០២៦ បានបន្តដឹកនាំក្រុមការងារ អាជ្ញាធរមូលដ្ឋាន និងកម្លាំងពាក់ព័ន្ធ ចុះរៀបចំសណ្តាប់ធ្នាប់តាមបណ្តោយផ្លូវជាតិលេខ២ ក្នុងភូមិសាស្ត្រស្រុកបាទី ដោយផ្តោតលើការពង្រឹងរបៀបរៀបរយ សោភ័ណភាព បរិស្ថាន និងសុវត្ថិភាពសាធារណៈ ដើម្បីធ្វើឱ្យតំបន់អភិវឌ្ឍន៍ឧស្សាហកម្ម និងទីប្រជុំជនកាន់តែមានភាពស្អាតស្អំ និងមានរបៀបរៀបរយល្អប្រសើរ។ក្នុងប្រតិបត្តិការចុះត្រួតពិនិត្យ និងរៀបចំសណ្តាប់ធ្នាប់នេះ លោកអភិបាលស្រុក បានធ្វើការណែនាំដោយផ្ទាល់ដល់តំណាងរោងចក្រ សហគ្រាស អាជីវករ និងប្រជាពលរដ្ឋដែលប្រកបអាជីវកម្មតាមដងផ្លូវជាតិលេខ២ ឱ្យចូលរួមថែរក្សាអនាម័យ បរិស្ថាន និងមិនដាក់តាំងសម្ភារៈ ឬលក់ដូររំលោភលើចិញ្ចើមផ្លូវ និងទ្រូងផ្លូវសាធារណៈ ដែលអាចបង្កការកកស្ទះចរាចរណ៍ និងប៉ះពាល់ដល់សុវត្ថិភាពអ្នកធ្វើដំណើរ។លោក សាយ វណ្ណៈ បានលើកឡើងថា ការរៀបចំសណ្តាប់ធ្នាប់តាមដងផ្លូវ មិនត្រឹមតែជួយលើកកម្ពស់សោភ័ណភាពទីប្រជុំជនប៉ុណ្ណោះទេ ប៉ុន្តែថែមទាំងជួយកាត់បន្ថយបញ្ហាគ្រោះថ្នាក់ចរាចរណ៍ បង្កើនភាពងាយស្រួលក្នុងការធ្វើដំណើរ និងបង្ហាញពីវប្បធម៌រស់នៅមានរបៀបរៀបរយរបស់ប្រជាពលរដ្ឋក្នុងមូលដ្ឋានផងដែរ។ លោកក៏បានអំពាវនាវឱ្យគ្រប់ភាគីពាក់ព័ន្ធ បន្តសហការជាមួយអាជ្ញាធរ ក្នុងការរក្សាអនាម័យ ការគោរពច្បាប់ចរាចរណ៍ និងការប្រើប្រាស់ទីសាធារណៈឱ្យបានត្រឹមត្រូវ ដើម្បីរួមចំណែកធ្វើឱ្យស្រុកបាទីកាន់តែមានសោភ័ណភាព និងទាក់ទាញ។ជាមួយគ្នានេះ តំណាងរោងចក្រ ម្ចាស់សហគ្រាស និងអាជីវករ បានសម្តែងនូវការគាំទ្រ និងសាទរចំពោះការយកចិត្តទុកដាក់របស់អាជ្ញាធរស្រុក ដែលបានចុះដឹកនាំ និងណែនាំដោយផ្ទាល់។ ពួកគាត់បានប្តេជ្ញាចូលរួមសហការអនុវត្តតាមការណែនាំរបស់អាជ្ញាធរ ដើម្បីធានាបាននូវបរិស្ថានស្អាត សណ្តាប់ធ្នាប់ល្អ និងសោភ័ណភាពតាមដងផ្លូវកាន់តែប្រសើរ សមស្របនឹងការរីកចម្រើនរបស់មូលដ្ឋាន៕