គណៈប្រតិភូដឹកនាំដោយឧបនាយករដ្ឋមន្រ្តី ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជានៅព្រឹកថ្ងៃទី១៦ ខែឧសភា ឆ្នាំ២០២៦ បានចុះពិនិត្យការដ្ឋានសាងសង់ព្រែកជីកហ្វូណនតេជោ ស្ថិតក្នុងភូមិសាស្ត្រខេត្តតាកែវ។ អមដំណើររួមមាន លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន, វ៉ី សំណាង អភិបាលខេត្តតាកែវ ព្រមទាំងតំណាងក្រុមហ៊ុនទទួលបន្ទុកសាងសង់គម្រោងប្រវត្តិសាស្ត្រមួយនេះ។ក្នុងឱកាសចុះពិនិត្យការដ្ឋាន លោក វ៉ី សំណាង បានបញ្ជាក់តាមបណ្ដាញសង្គមថា គិតត្រឹមពេលនេះ ការដ្ឋានកំពុងដំណើរការរៀបចំបច្ចេកទេស និងមិនទាន់អាចគណនាភាគរយសាងសង់បាននៅឡើយទេ ប៉ុន្តែក្រុមហ៊ុនសាងសង់បានអះអាងថា គម្រោងនឹងបញ្ចប់តាមផែនការដែលបានកំណត់។គម្រោងព្រែកជីហ្វូណនតេជោ គឺជាគម្រោងប្រវតិ្តសាស្រ្តរបស់កម្ពុជា ហើយត្រូវបានចាត់ទុកថាការបោះជំហានដ៏សំខាន់មួយក្នុងប្រវត្តិសាស្រ្តរបស់កម្ពុជាក្នុងការកែប្រែមុខមាត់កម្ពុជា នៅក្នុងវិស័យនាវាចរណ៍ និងការដឹកជញ្ជូនតាមផ្លូវទឹក និងផ្លូវសមុទ្ររបស់កម្ពុជាផងដែរ។ ផ្លូវទឹកប្រវត្តិសាស្រ្តមួយខ្សែនេះមានប្រវែងជាង ១៧៤ គ.ម ត្រូវឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប ហើយត្រូវបានរចនាឡើងសម្រាប់នាវាដែលមានទម្ងន់ផ្ទុករហូតដល់ ៣ ០០០ DWTទៅមក និងជៀស គ្នាបានដោយសុវត្ថិភាព។គម្រោងនេះនឹងបង្កើតបណ្តាញផ្លូវទឹកក្នុងស្រុកមួយដែលមានភាពប្រទាក់ក្រឡា និងអាចតភ្ជាប់បានគ្រប់ជ្រុងជ្រោយ ព្រមទាំងចូលរួមបំពេញបន្ថែមនូវចន្លោះប្រហោងមួយចំនួននៅក្នុងប្រព័ន្ធដឹកជញ្ជូនតាមផ្លូវទឹក និងសមុទ្ររបស់កម្ពុជានាពេលបច្ចុប្បន្ន និងបង្កើនប្រសិទ្ធភាព កាត់បន្ថយចម្ងាយ និងតម្លៃដឹកជញ្ជូន ធានាភាពប្រកួតប្រជែង ធានាឯករាជ្យភាព និងសុវត្ថិភាព នៃការដឹកជញ្ជូនតាមប្រព័ន្ធផ្លូវទឹក និងអាចតភ្ជាប់ត្រង់ពីបណ្តាញទន្លេមេគង្គទៅសមុទ្របានទៀតផង។កាលពីថ្ងៃទី១១ ខែមេសា ឆ្នាំ២០២៦ រាជរដ្ឋាភិបាលកម្ពុជា និងភាគីវិនិយោគចិន បានប្រកាសបើកការដ្ឋានសាងសង់ដំណាក់កាលទី២ នៃគម្រោងនេះ នៅខេត្តតាកែវ ក្រោមអធិបតីភាពរបស់នាយករដ្ឋមន្ត្រី សម្តេចធិបតី ហ៊ុន ម៉ាណែត។ សម្តេចធិបតីធ្លាប់បញ្ជាក់ថា គម្រោងនេះនឹងក្លាយជាច្រកផ្លូវទឹកយុទ្ធសាស្ត្រថ្មី សម្រាប់តភ្ជាប់រាជធានីភ្នំពេញទៅកាន់សមុទ្រកម្ពុជា និងកាត់បន្ថយការពឹងផ្អែកលើការដឹកជញ្ជូនឆ្លងកាត់ប្រទេសជិតខាង៕