ពលរដ្ឋរស់នៅក្រុងសែនមនោរម្យ ខេត្តមណ្ឌលគិរី បានស្នើសុំឱ្យអាជ្ញាធរ និងមន្ត្រីជំនាញពាក់ព័ន្ធ ជួយពន្លឿនការជួសជុល និងស្ថាបនាផ្លូវក្រាលកៅស៊ូមួយខ្សែ ដែលរងការខូចខាតជាយូរឆ្នាំមកហើយ ដើម្បីសម្រួលការធ្វើដំណើប្រចាំថ្ងៃ និងធានាសុវត្ថិភាពដល់ប្រជាពលរដ្ឋ ជាពិសេសសិស្សានុសិស្ស។ផ្លូវដែលរងការខូចខាតនេះ មានប្រវែងប្រមាណជិត ១,០០០ ម៉ែត្រ ចាប់ពីមុខមន្ទីរវប្បធម៌ និងវិចិត្រសិល្បៈ ឆ្ពោះទៅផ្លូវបំបែករមណីយដ្ឋានដំណាក់ស្តេច។ ប្រជាពលរដ្ឋបានលើកឡើងថា ផ្លូវនេះមានសភាពខូចខ្លាំង ជង្ហុក និងពិបាកធ្វើដំណើរ បង្កការរំខានយ៉ាងខ្លាំងដល់អ្នកប្រើប្រាស់ផ្លូវនេះជារៀងរាល់ថ្ងៃ។អ្នកស្រី ចំរើន អាយុ ៥១ ឆ្នាំ រស់នៅភូមិពូត្រុំ សង្កាត់រមនា ក្រុងសែនមនោរម្យ មានកូន៣នាក់ក្នុងបន្ទុកប្រកបរបរលក់បន្លែ បានរៀបរាប់ថា រៀងរាល់ព្រឹកព្រលឹម អ្នកស្រីតែងធ្វើដំណើរឆ្លងកាត់ផ្លូវខូចនេះទៅលក់បន្លែ ប៉ុន្តែពិបាកធ្វើដំណើរ និងប្រឈមគ្រោះថ្នាក់។ ដោយសារបញ្ហាពិបាកធ្វើដំណើរ អ្នកស្រីស្នើឱ្យអាជ្ញាធរជួយស្ថាបនាជួសជុលផ្លូវមួយខ្សែនេះឱ្យបានឆាប់រហ័ស ដើម្បីលើកកម្ពស់សុវត្ថិភាព និងសម្រួលការធ្វើដំណើររបស់ប្រជាពលរដ្ឋ និងសិស្សានុសិស្សទៅសាលារៀន។ពលរដ្ឋម្នាក់ទៀត លោក សុខ កុសល ដែលរស់នៅជាប់ផ្លូវខូចខាតខាងលើ បានលើកឡើងថា ផ្លូវកៅស៊ូមួយខ្សែនេះ បានរងការខូចខាតជាច្រើនឆ្នាំមកហើយ ដោយមានចង្ហុកធំៗ បង្កការលំបាកយ៉ាងខ្លាំងដល់ប្រជាពលរដ្ឋដែលធ្វើដំណើរឆ្លងកាត់ជារៀងរាល់ថ្ងៃ។ បើតាមលោក កុសល ជាសាក្សីរស់នៅទីនោះ សង្កេតឃើញថា មានករណីគ្រោះថ្នាក់ចរាចរណ៍កើតឡើងជាញឹកញាប់ ដោយអ្នកបើកបរម៉ូតូជិះបុកចង្ហុក ឬកិនដុំថ្មនៅតាមផ្លូវនេះបណ្ដាលឱ្យដួលរងរបួស។ជាការឆ្លើយតប លោក រស់ គីមធន់ ប្រធានមន្ទីរសាធារណការ និងដឹកជញ្ជូនខេត្តមណ្ឌលគិរី ប្រាប់កម្ពុជាថ្មីថា មន្រ្តីជំនាញមន្ទីរតែងតែចុះជួសជុលផ្លូវនេះជាបន្តបន្ទាប់ ដើម្បីសម្រួលការធ្វើចរាចរណ៍ជូនប្រជាពលរដ្ឋ។ ទោះជាយ៉ាងណា ការជួសជុលកន្លងមក គឺធ្វើឡើងក្នុងលក្ខណៈបណ្ដោះអាសន្នប៉ុណ្ណោះ ដោយសារផ្លូវមានសភាពខូចខាតខ្លាំង មានចង្ហុក និងសំបុកមាន់ច្រើនកន្លែង។ លោកបានបញ្ជាក់បន្ថែមថា បច្ចុប្បន្ន មិនទាន់មានការកំណត់ច្បាស់លាស់ថា កំណាត់ផ្លូវនេះស្ថិតក្រោមការគ្រប់គ្រងរបស់មន្ទីរអភិវឌ្ឍន៍ជនបទ ឬមន្ទីរសាធារណការ និងដឹកជញ្ជូននៅឡើយទេ។ ប៉ុន្តែក្នុងនាមជាមន្ត្រីជំនាញ នៅតែបន្តចុះថែទាំ និងជួសជុលបណ្ដោះអាសន្ន ដើម្បីធានាឱ្យប្រជាពលរដ្ឋអាចធ្វើដំណើរបានស្រួលជាងមុន។ លោក រស់ គីមធន់ ក៏បានអះអាងថា បន្ទាប់ពីក្រុមការងារចុះពិនិត្យស្ថានភាពផ្លូវជាក់ស្ដែងរួច នៅពេលឆាប់ៗខាងមុខ មន្ទីរនឹងរៀបចំកម្លាំងមន្ត្រីជំនាញ ចុះស្ថាបនា និងជួសជុលផ្លូវដែលមានចង្ហុក និងសំបុកមាន់ជាច្រើនកន្លែងនេះឡើងវិញ ដើម្បីសម្រួលការធ្វើដំណើររបស់ប្រជាពលរដ្ឋ ដែលប្រើប្រាស់ផ្លូវនេះសម្រាប់ចេញចូលក្នុងទីរួមខេត្ត៕