ភ្នំពេញ ៖ ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានជូនដំណឹងពីការបន្តបញ្ចុះតម្លៃសម្រាប់រថយន្តដឹកទំនិញប្រភេទ D និង E និងការផ្ដល់ជូនសេវាកម្មអូសសណ្ដោងដោយឥតគិតថ្លៃ ដល់រថយន្តដឹកទំនិញទាំងពីរប្រភេទនេះ ។ នេះបើតាមសេចក្ដីជូនដំណឹងរបស់ក្រុមហ៊ុនផ្លូវល្បឿនលឿនកាលពីថ្ងៃទី ២៨ មេសា ២០២៦ ។យោងតាមសេចក្ដីជូនដំណឹងនេះឱ្យដឹងថា ក្នុងកាលៈទេសៈដែលប្រេងឥន្ធនៈលើទីផ្សារអន្តរជាតិមានតម្លៃខ្ពស់ បាននិងកំពុងបង្កជាបញ្ហាប្រឈមយ៉ាងធ្ងន់ធ្ងរដល់ថ្លៃចំណាយប្រតិបត្តិការលើវិស័យភស្តុភារកម្ម និងសហគ្រាសដឹកជញ្ជូន នៅកម្ពុជា ។ ក្នុងគ្រាដ៏លំបាកនេះ រាជរដ្ឋាភិបាលតាមរយៈថ្នាក់ដឹកនាំក្រសួងសាធារណការនិងដឹកជញ្ជូន ក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ បានឯកភាពបន្តផ្ដល់ការបញ្ចុះតម្លៃពិសេសសម្រាប់រថយន្តដឹកជញញជូនទំនិញ ។ បើតាមសេចក្ដីជូនដំណឹង ក្រុមហ៊ុនផ្លូវល្បឿនលឿនបានបន្តបញ្ចុះតម្លៃ ៤០ភាគរយទៅ ៦០ភាគរយសម្រាប់រថយន្តដឹកទំនិញប្រភេទ D និង E រយៈពេល៦ខែ បន្ថែមទៀតចាប់ពីថ្ងៃទី១ ខែឧសភា ២០២៦ ដល់ ថ្ងៃទី៣១ ខែតុលា ឆ្នាំ ២០២៦ និងផ្ដល់សេវាអូសសណ្ដោងឥតគិតថ្លៃចាប់ពីថ្ងៃទី០១ ខែឧសភា ឆ្នាំ ២០២៦ រហូតដល់ថ្ងៃទី ៣០ខែមេសា ឆ្នាំ ២០២៧ សម្រាប់រថយន្តដឹកទំនិញប្រភេទ D និង E ដែលមានបញ្ហាបច្ចេកទេសនៅលើផ្លូវល្បឿនលឿន ទៅកាន់ច្រកចេញ ឬតំបន់សេវាកម្មដែលនៅជិតបំផុត ៕