លោក វ៉ី សំណាង អភិបាលខេត្តតាកែវ បានប្ដេជ្ញាចិត្តនៅចំពោះមុខប្រជាពលរដ្ឋថា រដ្ឋបាលខេត្ត នឹងបន្តនីតិវិធីដោះស្រាយសំណងជូនប្រជាពលរដ្ឋឱ្យបានត្រឹមត្រូវ និងយុត្តិធម៌បំផុត នៅពេលដែលក្រុមការងារចុះអនុវត្តការវាស់វែងជាក់ស្តែងនៅនឹងកន្លែង។ អភិបាលខេត្តតាកែវ ថ្លែងដូច្នេះ ក្នុងជំនួបសំណេះសំណាល និងដោះស្រាយបញ្ហាប្រឈមដោយផ្ទាល់ជូនប្រជាពលរដ្ឋចំនួន ១២៣គ្រួសារ ដែលរងផលប៉ះពាល់ពីគម្រោង «ព្រែកជីកហ្វូណនតេជោ» នៅស្រុកទ្រាំង កាលពីថ្ងៃទី៨ មេសា។ ប្រជាពលរដ្ឋចំនួន ១២៣គ្រួសារ រស់នៅភូមិស្វាយ ភូមិគ្រាំងធំ និងភូមិរវៀង ស្រុកទ្រាំង ខេត្តតាកែវ ដែលរងផលប៉ះពាល់ពីគម្រោង «ព្រែកជីកហ្វូណនតេជោ» បានជួបជាមួយលោក វ៉ី សំណាង អភិបាលខេត្តតាកែវ ដើម្បីដោះស្រាយលើបញ្ហាដីធ្លី។ ក្នុងជំនួបជាមួយអភិបាលខេត្តតាកែវ ប្រជាពលរដ្ឋ បានលើកនូវសំណូមពរ ការទាមទារសំណង រួមទាំងបញ្ហាប្រឈមនានា ពាក់ព័ន្ធនឹងការស្នើសុំវាស់វែងចេញប័ណ្ណកម្មសិទ្ធិដីធ្លី ផលប៉ះពាល់ដីនៅចំគម្រោងព្រែកជីកហ្វូណនតេជោលើផ្ទៃដីប្រមាណជាង ១៣,៣៦៥,៧១០ ម៉ែត្រការ៉េ។ ក្រោយស្ដាប់ទុក្ខកង្វល់ និងបញ្ហារបស់ប្រជាពលរដ្ឋ លោក វ៉ី សំណាង បានប្រាប់ឱ្យប្រជាពលរដ្ឋ ចាំជួបជាមួយមន្ត្រីបច្ចេកទេសជំនាញ ដើម្បីចុះផ្ទៀងផ្ទាត់ និងវាស់វែងដីធ្លីជូនឱ្យបានច្បាស់លាស់។ ចំពោះផលប៉ះពាល់ដីធ្លីដែលស្ថិតក្នុងគម្រោងព្រែកជីកហ្វូណនតេជោ អភិបាលខេត្តតាកែវ បញ្ជាក់ដូច្នេះ៖« រដ្ឋបាលខេត្ត នឹងបន្តនីតិវិធីដោះស្រាយសំណងជូនប្រជាពលរដ្ឋឱ្យបានត្រឹមត្រូវ និងយុត្តិធម៌បំផុត នៅពេលដែលក្រុមការងារចុះអនុវត្តការវាស់វែងជាក់ស្តែងនៅនឹងកន្លែង»។