ប្រតិភូក្រសួងសាធារណការ និងដឹកជញ្ជូន ចូលរួមវគ្គបណ្តុះបណ្តាលស្តីពីការដឹកជញ្ជូនប្រកបដោយចីរភាព នៅប្រទេសសិង្ហបុរី សិង្ហបុរី៖ នៅថ្ងៃទី៦ ខែមេសា ឆ្នាំ២០២៦ ឯកឧត្តម ឈៀង ពេជ្រ អនុរដ្ឋលេខាធិការ នៃក្រសួងសាធារណការ និងដឹកជញ្ជូន បានដឹកនាំប្រតិភូក្រសួង ដែលរួមមានមន្រ្តីមកពីអគ្គនាយកដ្ឋានភស្តុភារកម្ម និងនាយកដ្ឋានផ្លូវដែក ចូលរួមវគ្គបណ្តុះបណ្តាលស្តីពី «ការដឹកជញ្ជូនប្រកបដោយចីរភាព» រយៈពេល៥ថ្ងៃ ចាប់ពីថ្ងៃទី៦ ដល់ថ្ងៃទី១០ ខែមេសា ឆ្នាំ២០២៦ នៅសាកលវិទ្យាល័យ Singapore Management University នៃប្រទេសសិង្ហបុរី។ វគ្គនេះមានការចូលរួមពីតំណាងក្រសួង ស្ថាប័នរដ្ឋ និងវិស័យឯកជន មកពីប្រទេសចំនួន៧ រួមមាន៖ កម្ពុជា បង់ក្លាដេស ឥណ្ឌា ឥណ្ឌូនេស៊ី នីហ្សេរីយ៉ា ហ្វីលីពីន និងវៀតណាម។ ក្នុងនោះ ប្រទេសកម្ពុជា មានអ្នកចូលរួមចំនួន៤រូប រួមមាន មន្រ្តីពីក្រសួងសាធារណការ និងដឹកជញ្ជូន ៣រូប និងមន្រ្តីពីក្រសួងសេដ្ឋកិច្ច និងហិរញ្ញវត្ថុ ១រូប។ វគ្គបណ្តុះបណ្តាលនេះ ត្រូវបានរៀបចំឡើងដោយសហការរវាង Infrastructure Asia, World Bank Group និងសាកលវិទ្យាល័យ Singapore Management University ដោយមានគោលបំណង៖ (១) ពង្រឹងចំណេះដឹង និងជំនាញក្នុងការដោះស្រាយបញ្ហាប្រឈមស្មុគស្មាញក្នុងវិស័យដឹកជញ្ជូន និង (២) ជំរុញការផ្លាស់ប្តូរឆ្ពោះទៅរកប្រព័ន្ធដឹកជញ្ជូនទំនើប ដែលមានប្រសិទ្ធភាព តម្លៃសមរម្យ សុវត្ថិភាព កាបូនទាប និងមានបរិយាប័ន្ន។ វគ្គបណ្តុះបណ្តាលសម្រាប់មន្រ្តីជាន់ខ្ពស់នេះ បានផ្តោតលើប្រធានបទសំខាន់ៗ រួមមាន៖ (១) ក្របខណ្ឌគោលនយោបាយសម្រាប់ការដឹកជញ្ជូនប្រកបដោយចីរភាព (២) ហិរញ្ញប្បទានប្រកបដោយចីរភាព និងការរៀបចំរចនាសម្ព័ន្ធគម្រោងសម្រាប់ការដឹកជញ្ជូនបៃតង (៣) ការរៀបចំគម្រោងដែលមានសក្តានុពលទាក់ទាញហិរញ្ញប្បទាន និងអាចអនុវត្តបាន សម្រាប់ប្រព័ន្ធផ្លូវដែក និងម៉េត្រូ (៤) ការសម្រេចចិត្តផ្អែកលើទិន្នន័យ និងភស្តុតាងជាក់ស្តែង (៥) ទិសដៅអនាគតនៃវិស័យដឹកជញ្ជូន ក្នុងឱកាសនេះ Infrastructure Asia ដែលជាស្ថាប័នឧបត្ថម្ភវគ្គបណ្តុះបណ្តាល បានលើកឡើងថា វគ្គនេះជាវេទិកាសំខាន់មួយសម្រាប់អ្នកចូលរួម ក្នុងការបង្កើនបណ្តាញទំនាក់ទំនង និងចែករំលែកបទពិសោធន៍ ក្នុងវិស័យដឹកជញ្ជូន និងភស្តុភារកម្ម៕