កិច្ចប្រជុំលើកទី៥ គណៈកម្មការចម្រុះសម្របសម្រួលការអនុវត្តគម្រោង ស្តីពីការពង្រឹងសមត្ថភាពក្នុងការសម្របសម្រួលសម្រាប់ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ទីស្ដីការក្រសួង៖ នាព្រឹកថ្ងៃព្រហស្បតិ៍ ទី២ ខែមេសា ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជានាយកគម្រោង និងលោកស្រី MIURA Yoshiko តំណាងជាន់ខ្ពស់ នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ប្រចាំនៅកម្ពុជា បានអញ្ជើញជាសហប្រធានដឹកនាំកិច្ចប្រជុំលើកទី៥ នៃគណៈកម្មាការចម្រុះសម្រាប់ការសម្របសម្រួល (5th JCC Meeting) នៃគម្រោងស្ដីពីការពង្រឹងសមត្ថភាពក្នុងការសម្របសម្រួលសម្រាប់ការធ្វេីឱ្យប្រសើរឡើងនូវប្រព័ន្ធភស្តុភារកម្មកម្ពុជា ដោយមានការអញ្ជើញចូលរួមពី ឯកឧត្តម-លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក លោក-លោកស្រីតំណាងក្រសួង ស្ថាប័ន ជាសមាជិក-សមាជិកានៃគម្រោង ក្រុមការងារJICA ប្រចាំក្រសួង និងមន្រ្តីជំនាញពាក់ព័ន្ធជាច្រើនរូប។ កិច្ចប្រជុំនេះ ធ្វើឡើងក្នុងគោលបំណងចម្បង ដើម្បីពិនិត្យវឌ្ឍនភាពការងាររបស់ក្រុមប្រតិបត្តិការការងារ (Working Group) នីមួយៗ ដោយផ្អែកលេីលទ្ធផលសំខាន់ៗ មួយចំនួនដូចជា ១) ផែនការវិភាគទិន្នន័យ និងរបាយការណ៍ ២) ការធ្វើឱ្យប្រសើរឡើងនូវការគ្រប់គ្រងការដឹកជញ្ជូនទំនិញតាមផ្លូវថ្នល់ និងផ្លូវដែក ៣) ការសម្របសម្រួលចរាចរណ៍ឆ្លងកាត់ព្រំដែន (ផ្លូវគោក ផ្លូវដែក និងផ្លូវទឹក) និង ៤) ការសិក្សាស្ដីពីមជ្ឈមណ្ឌលភស្តុភារកម្មប្រចាំតំបន់ រួមទាំងការបណ្ដុះបណ្ដាលពង្រឹងសមត្ថភាពមួយចំនួនក្នុងក្របខណ្ឌនៃការអនុវត្តគម្រោងស្ដីពីការពង្រឹងសមត្ថភាពក្នុងការសម្របសម្រួលសម្រាប់ការធ្វើឱ្យប្រសើរឡើងនូវប្រព័ន្ធភស្តុភារកម្មកម្ពុជា ។ ជាចុងក្រោយ លោកជំទាវរដ្ឋលេខាធិការប្រចាំ បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ដល់ការខិតខំប្រឹងប្រែងរបស់ក្រុមប្រតិបត្តិការការងារទាំង៤ ចំពោះការសម្រេចបាននូវលទ្ធផលប្រកបដោយផ្លែផ្កា ព្រមទាំងលើកពីផែនការបន្ត និងដំណោះស្រាយសម្រាប់ការអនុវត្តជំហានបន្ទាប់ផងដែរ៕