កិច្ចប្រជុំជំនាញបច្ចេកទេសដើម្បីពិនិត្យ និងពិភាក្សាលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ ទីស្ដីការគណៈរដ្ឋមន្រ្តី៖ នាថ្ងៃពុធ ទី១ ខែមេសាឆ្នាំ២០២៦ ឯកឧត្តម ប៉ាល់ ចន្ទតារា រដ្ឋលេខាធិការ ក្រសួងសាធារណការនិងដឹកជញ្ជូន និងជាប្រធានក្រុមការងារ បានបន្តដឹកនាំគណៈប្រតិភូ និងមន្ត្រីជំនាញនៃក្រសួង ចូលរួមកិច្ចប្រជុំជំនាញបច្ចេកទេសដើម្បីពិនិត្យ និងពិភាក្សាលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ ក្រោមអធិបតីភាពសហប្រធាន ឯកឧត្តម អ៊ឹង សេរីវិសុទ្ធ អនុប្រធាន និងជាក្រុមការងារទី១នៃក្រុមប្រឹក្សាអ្នកច្បាប់ និង ឯកឧត្ដម នៅ បោនន័រ អនុប្រធាន និងជាប្រធានក្រុមការងារទី១ នៃក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ដោយមានការអញ្ជើញចូលរួមពីសំណាក់ ឯកឧត្តម លោកជំទាវដែលជាសមាជិកក្រុមប្រឹក្សាអ្នកច្បាប់ ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ គណកម្មការភាសាវិទ្យាខ្មែរ និង ឯកឧត្តម លោកជំទាវដែលជាតំណាងក្រសួងអភិវឌ្ឍន៍ជនបទ ក្រសួងមហាផ្ទៃ ព្រមទាំងឯកឧត្តម លោកជំទាវជាថ្នាក់ដឹកនាំនិងមន្ត្រីជំនាញនៃទីស្តីការគណៈរដ្ឋមន្ត្រី។ កិច្ចប្រជុំរៀបចំឡើងក្នុងគោលបំណងដើម្បីបន្តពិនិត្យ ពិភាក្សា និងកែសម្រួលលើសេចក្តីព្រាងអនុក្រឹត្យស្តីពី ការគ្រប់គ្រងលើការប្រើប្រាស់ដីចំណីផ្លូវនៅតាមបណ្ដាញផ្លូវថ្នល់ សំដៅធ្វើឱ្យសេចក្តីព្រាងអនុក្រឹត្យនេះមានខ្លឹមសារគ្រប់ជ្រុងជ្រោយនិងមានសង្គតិភាពទៅនឹងច្បាប់ និងលិខិតបទដ្ឋានគតិយុត្តពាក់ព័ន្ធ ដើម្បីកំណត់យន្តការ និងវិធានការលើការប្រើប្រាស់ដីចំណីផ្លូវ និងរក្សាបាននូវសុវត្ថិភាពចរាចរណ៍ សណ្តាប់ធ្នាប់សាធារណៈ ព្រមទាំងកាត់បន្ថយឧបសគ្គដែលរាំងស្ទះដល់ការអភិវឌ្ឍ និងការថែទាំងផ្លូវ។ អង្គប្រជុំបានសម្រេចលទ្ធផល រួមមាន៖ (១.) ឯកភាពកែសម្រួលលើទម្រង់ ខ្លឹមសារ ពាក្យពេចន៍ និងអក្ខរាវិរុទ្ធមួយចំនួននៃសេចក្តីព្រាងអនុក្រឹត្យ (២.) ឯកភាពប្រគល់ជូនសាមីក្រសួង ដើម្បីពិនិត្យនិងកែសម្រួលតាមស្មារតីនៃអង្គប្រជុំ (៣.) នីតិវិធីបន្ត បន្ទាប់ពីកែសម្រួល និងសម្អាតរួចរាល់ សេចក្តីព្រាងអនុក្រឹត្យខាងលើនឹងត្រៀមដាក់ឆ្លងកិច្ចប្រជុំអន្តរក្រសួងចង្អៀត ដោយមានការអញ្ជើញចូលរួមពីក្រសួង ស្ថាប័ននិងតំណាងរាជធានី ខេត្តពាក់ព័ន្ធមួយចំនួន ដែលនឹងត្រូវជូនដំណឹងនាពេលក្រោយ៕