ចរាចរណ៍ដឹកទំនិញតាមផ្លូវសមុទ្ររវាងប្រទេសកម្ពុជា និងប្រទេសដៃគូពាណិជ្ជកម្មអន្តរជាតិបានហក់ឡើងច្រើនកាលពីឆ្នាំ២០២៥ ដោយទូរកុងតឺន័រដែលឆ្លងកាត់តាមកំពង់ផែស្វយ័តក្រុងព្រះសីហនុ(កសស) មានចំនួនសរុបជាង ១,៣ លាន TEUs កើនឡើងជិត ១/៣ដងបើធៀបនឹងឆ្នាំ២០២៤ ខណៈទំនិញឆ្លងកាត់មានចំនួនជិត ១២ លានតោន។កសស ដែលជាក្រុមហ៊ុនចុះបញ្ជីនៅផ្សារមូលបត្រកម្ពុជា(CSX) ឱ្យដឹងថា ចន្លោះពីខែមករា-ខែធ្នូ ឆ្នាំ២០២៥ ទូរកុងតឺន័រដែលឆ្លងកាត់ កសស មានចំនួនសរុប ១ ៣៤៧ ៧២៦ TEU កើនឡើង ៣០,៥៧% បើធៀបនឹងឆ្នាំ២០២៤ ដែលមានចំនួន ១ ០៣២ ១៩១ TEU។ បើគិតចន្លោះពីឆ្នាំ២០១៥-២០២៥ អត្រាកំណើនស្ថិតនៅក្នុងរង្វង់ ១៤,៤៤%។ ដោយឡែកសម្រាប់បរិមាណទំនិញដែលដឹកឆ្លងកាត់ កសស ក្នុងឆ្នាំ២០២៥ មានចំនួន ១១ ៧៥៦ ៨៩៧តោន កើន ២៥,៧៨% បើធៀបឆ្នាំ២០២៤។ សម្រាប់អត្រាកំណើនមធ្យមចន្លោះពីឆ្នាំ២០១៥-២០២៥ គឺប្រមាណ ១៣,០៧%។ក្រុមហ៊ុនដឹកជញ្ជូនធំៗដែលធ្វើប្រតិបត្តិការជាមួយនឹង កសស រួមមាន MAERSK, SITC, RCL, SSL, WHL, CMA, COSCO, EVERGREEN, YML, NYS, TCLC, Hapag-Lloy-HMM & NBOS។ទិន្នន័យខាងលើនេះត្រូវបានថ្នាក់ដឹកនាំ កសស លើកយកមកបង្ហាញក្នុងដំណើរទស្សនកិច្ចរបស់ក្រុមការងារនៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន(JICA) ប្រចាំនៅកម្ពុជា និងតំណាងសារព័ត៌មាន នៅទីស្នាក់ការកំពង់ផែស្វយ័តក្រុងព្រះសីហនុ កាលពីរសៀលថ្ងៃទី២៣ ខែមីនា។ ជំនួបនេះក៏មានការចូលរួមពីសំណាក់លោកស្រី ផាណា វ៊ឺនីដា អគ្គលេខាធិការរងនៃគណៈកម្មការសហប្រតិបត្តិការអភិវឌ្ឍន៍កម្ពុជានៃក្រុមប្រឹក្សាអភិវឌ្ឍន៍កម្ពុជា(CDC) លោក MATSUDA Junsaku អ្នកប្រឹក្សានៃស្ថានទូតជប៉ុនប្រចាំកម្ពុជា និងលោក YAKO Yoshito អ្នកតំណាងជាន់ខ្ពស់នៃទីភ្នាក់ងារ JICA ប្រចាំកម្ពុជា។ជាកិច្ចចាប់ផ្តើមនៃកិច្ចសន្ទនា លោក លូ គឹមឈន់ ប្រធានអគ្គនាយកកំពង់ផែស្វយ័តក្រុងព្រះសីហនុ បានប្រាប់ថា ស្ថិរភាពនយោបាយ និងភាពរឹងមាំនៃកំណើនសេដ្ឋកិច្ចបានជួយធ្វើឱ្យការនាំចេញ នាំចូលទំនិញរវាងប្រទេសកម្ពុជា និងទីផ្សារអន្តរជាតិកើនឡើងជាបន្តបន្ទាប់ ជាពិសេសក្នុងរយៈពេល ២ ឆ្នាំចុងក្រោយនេះ។ លោកបន្តថា អ្វីដែលកំពង់ផែស្វយ័តក្រុងព្រះសីហនុសម្រេចបាននាពេលកន្លងមក និងទៅអនាគត គឺមិនអាចកាត់ផ្តាច់ពីការជួយជ្រោមជ្រែងយ៉ាងសកម្មពីសំណាក់រាជរដ្ឋាភិបាលជប៉ុនតាមរយៈទីភ្នាក់ងារ JICA ឡើយ។ ភាគីជប៉ុនតែងជួយគាំទ្រផ្នែកបច្ចេកទេសក្នុងការពង្រីកកំពង់ផែ ក៏ដូចជាផ្តល់ការគាំទ្រផ្នែកឥណទានសម្រាប់ការសាងសង់ ឬលើកកម្ពស់សមត្ថភាពកំពង់ផែផងដែរ។លោកបានថ្លែងថា៖«កំណើនសកម្មភាពដឹកជញ្ជូនទំនិញចេញ-ចូលតាមកំពង់ផែស្វយ័តក្រុងព្រះសីហនុ គឺបញ្ជាក់ថាសេដ្ឋកិច្ចកម្ពុជាកំពុងបោះជំហានទៅមុខល្អប្រសើរ។ បច្ចុប្បន្នសកម្មភាពលើកដាក់ទំនិញនៅកំពង់ផែរបស់យើង ត្រូវបានធ្វើឡើងស្ទើតែគ្មានពេលឈប់សម្រាក។ ភាពមមាញឹកនេះនឹងបន្តកើនឡើងខ្ពស់បន្ថែមទៀតក្នុងឆ្នាំ២០២៦ នេះ និងឆ្នាំបន្តបន្ទាប់»។ បើតាមលោក គឹមឈន់ គ្រាន់តែក្នុងរយៈពេលជិត ៣ខែដើមឆ្នាំ២០២៦ នេះចំនួនទូរកុងតឺន័រឆ្លងកាត់កំពង់ផែស្វយ័តក្រុងព្រះសីហនុបានកើនឡើងប្រហែល ៣៨% បើធៀបនឹងរយៈពេលដូចគ្នាក្នុងឆ្នាំ២០២៥៕