លោក ស៊ូ ស៊ុន្ធរ៉ា ប្រធានមន្ទីរសាធារណការ និងដឹកជញ្ជូនខេត្តកែប បានបង្ហាញនូវរបាយការណ៍វឌ្ឍនភាពការងារ ក្នុងឆ្នាំ២០២៥កន្លងទៅ ដោយក្នុងនោះមន្ទីរសម្រេចបាននូវសមិទ្ធផលសំខាន់ៗជាច្រើន ទាំងលើវិស័យហេដ្ឋារចនាសម្ព័ន្ធផ្លូវថ្នល់ និងវិស័យសេវាដឹកជញ្ជូន ដើម្បីបម្រើផលប្រយោជន៍ជូនប្រជាពលរដ្ឋ និងជំរុញសេដ្ឋកិច្ចក្នុងខេត្តទេសចរណ៍មួយនេះឱ្យកាន់តែមានកំណើន។ លោក ស៊ូ ស៊ុន្ធរ៉ា ប្រធានមន្ទីរសាធារណការ និងដឹកជញ្ជូនខេត្តកែប បានឱ្យដឹងថា ក្នុងឆ្នាំ២០២៥ មន្ទីរបានអនុវត្តគម្រោងស្ថាបនា និងជួសជុលផ្លូវសំខាន់ៗជាច្រើនខ្សែ រួមមាន ផ្លូវខេត្តលេខ ១៣៣៣ (ស្រុកដំណាក់ចង្អើរ) ស្ថាបនាផ្លូវក្រាលកៅស៊ូប្រភេទ DBST ប្រវែង ១ ៥០០ម៉ែត្រ ទទឹង ៧ម៉ែត្រ ព្រមទាំងបំពាក់លូទទឹងផ្លូវ ៤កន្លែង គូសគំនូសចរាចរណ៍ ៥៥៦ម៉ែត្រការ៉េ និងផ្លាកសញ្ញាចរាចរណ៍។ ផ្លូវជាតិលេខ ៣៣អា (ក្រុងកែប) ជួសជុលខួបដោយក្រាលបេតុងកៅស៊ូ AC ប្រវែង ១ ៣០០ម៉ែត្រ ទទឹង ១៣,៨០ម៉ែត្រ (ផ្នែកខាងស្តាំដៃ) ចាប់ពីមុខសាលាខេត្ត រហូតដល់ផ្លូវចូលកំពង់ផែកែប-កោះទន្សាយ។ ផ្លូវខេត្តលេខ ១៣៣២ (ស្រុកដំណាក់ចង្អើរ)៖ ជួសជុលខួបក្រាលកៅស៊ូ DBST ប្រវែង ៣ ៥០០ម៉ែត្រ ទទឹង ៧ម៉ែត្រ ព្រមទាំងដាំបង្គោលបង្ហាញផ្លូវចំនួន ១៤២ដើម។ លោកប្រធានបន្តថា ចំពោះការងារថែទាំជាប្រចាំ មន្ទីរបានអនុវត្តការថែទាំផ្លូវជាតិ និងផ្លូវខេត្តក្រាលកៅស៊ូគ្រប់ប្រភេទ ចំនួន ៨ខ្សែ ដែលមានប្រវែងសរុប ៤៨,៥១គីឡូម៉ែត្រ ដើម្បីធានានូវភាពជាប់លាប់ និងសុវត្ថិភាពក្នុងការធ្វើដំណើរ។ ទន្ទឹមនឹងការកែលម្អផ្លូវថ្នល់ មន្ទីរក៏សម្រេចបាននូវលទ្ធផលល្អប្រសើរលើការផ្តល់សេវារដ្ឋបាល និងការរឹតបន្តឹងច្បាប់ចរាចរណ៍ ក្នុងនោះសេវាយានយន្តបានចុះបញ្ជីយានយន្តថ្មីបាន ១៦៦គ្រឿង និងត្រួតពិនិត្យលក្ខណៈបច្ចេកទេស (ឆៀក) បានចំនួន ៥៩២គ្រឿង។ បណ្ណបើកបរ បានរៀបចំការប្រឡង និងផ្តល់បណ្ណបើកបរជូនប្រជាពលរដ្ឋបានចំនួន ៨៨បណ្ណ។ រីឯការត្រួតពិនិត្យទម្ងន់ នៅស្ថានីយជញ្ជីងអចល័តថ្លឹងយានយន្ត ដំណាក់ចង្អើរ មន្ត្រីជំនាញបានធ្វើការត្រួតពិនិត្យរថយន្តដឹកជញ្ជូនសរុបចំនួន ៤៧,៣២៥គ្រឿង ដើម្បីទប់ស្កាត់ការដឹកលើសទម្ងន់កម្រិតកំណត់ ដែលជាមូលហេតុធ្វើឱ្យផ្លូវឆាប់ខូច។ លោកប្រធានមន្ទីរសាធារណការខេត្តកែបបានបញ្ជាក់ថា ដើម្បីលើកកម្ពស់សោភណភាពខេត្ត និងសម្រួលដល់ការធ្វើដំណើររបស់ភ្ញៀវទេសចរ ក៏ដូចជាការដឹកជញ្ជូនកសិផលរបស់បងប្អូនប្រជាពលរដ្ឋឱ្យកាន់តែមានភាពងាយស្រួល ដូច្នេះនៅក្នុងឆ្នាំ២០២៦នេះ មន្ទីរសាធារណការ និងដឹកជញ្ជូនខេត្តកែប មានផែនការជាក់លាក់ ក្នុងការងារសាងសង់ផ្លូវខេត្តលេខ១៣៣៣ (គម្រោងបន្តនិងបញ្ចប់)ដោយក្រាលកៅស៊ូ DBST ប្រវែង ១ ៤៥០ម៉ែត្រ ទទឹង ៧ម៉ែត្រ សំណង់សិល្បការ្យនិងបរិក្ខារផ្លូវថ្នល់ ស្ថិតនៅស្រុកដំណាក់ចង្អើរ ខេត្ត កែប (តំបន់ភ្នំវល្លិ៍)។ ការងារជួសជុលខួបផ្លូវខេត្តលេខ១៣៣២ (គម្រោងបន្ត) ដោយក្រាលកៅស៊ូ DBST ប្រវែង ៣ ២៥០ម៉ែត្រ ទទឹង ៧ម៉ែត្រ និងបរិក្ខារផ្លូវថ្នល់ ស្ថិតនៅស្រុកដំណាក់ចង្អើរ ខេត្តកែប។ ការងារជួសជុលខួបផ្លូវជាតិលេខ៣៣អា ដោយក្រាលបេតុងកៅស៊ូ AC ប្រវែង ៧៧៧ម៉ែត្រ ទទឹង ១១ម៉ែត្រ (ឆ្វេងដៃ) និងបរិក្ខារផ្លូវថ្នល់មួយចំនួន ស្ថិតនៅក្រុងកែប ខេត្តកែប។ ការងារថែទាំថ្នល់-ស្ពាន ជាប្រចាំលើផ្លូវជាតិ ផ្លូវខេត្ត ក្រាលកៅស៊ូគ្រប់ប្រភេទមានប្រវែង ៧៩,៩៦ គីឡូម៉ែត្រ ចំនួន៨កំណាត់ខ្សែផ្លូវ និងក្រាលដីល្បាយថ្ម មានប្រវែង ៣,៨០គីឡូម៉ែត្រ ចំនួន១កំណាត់ ខ្សែផ្លូវ។ ការងារដំឡើងបង្គោលអគ្គិសនី ចំនួន៥៥០បង្គោលនៅលើផ្លូវជាតិលេខ៣៣ ចំនួន៤០៨បង្គោល និងផ្លូវក្នុងបង្គោល)។ ចូលរួមសម្របសម្រួលជាមួយរដ្ឋបាលខេត្ត ក្នុង ការងារសាងសង់ផ្លូវថ្មើជើង លើផ្លូវជាតិលេខ៣៣អា ពីមុខសាលាខេត្តទៅស្នាក់ការគណបក្សប្រជាជនកម្ពុជា។ ចូលរួមសម្របសម្រួលជាមួយគណៈកម្មាធិការអភិវឌ្ឍនឆ្នេរសមុទ្រកម្ពុជា ក្នុងការងារសាងសង់ឆ្នេរ កម្សាន្តប្រណិតកម្រិតខ្ពស់ “វិថីសន្តិភាពកែប” ប្រវែង ២ ៧០០ម៉ែត្រ។ រៀបចំកំពង់ផែកែប កោះទន្សាយឱ្យមានលក្ខណៈល្អប្រសើរ ភ្ញៀវជាតិ អន្តរជាតិ ធ្វើដំណើរ ប្រកបដោយសុខសុវត្ថិភាព។ រៀបចំស្នើសុំរដ្ឋបាលខេត្តទីតាំងដីសម្រាប់ធ្វើអាងប្រព្រឹត្តកម្មទឹកកខ្វក់ និងថែទាំសួនច្បារ និងការកាត់លះមែកឈើរបស់រដ្ឋបាលខេត្ត៕