មន្ទីរសាធារណការនិងដឹកជញ្ជូនខេត្តកំពត បានពង្រឹងយន្តការជាច្រើនលើវិស័យដឹកជញ្ជូន ដើម្បីឱ្យដំណើរការអនុវត្តការងារកាន់តែមានប្រសិទ្ធភាព តម្លាភាព និងបង្ខិតកៀកប្រជាពលរដ្ឋ ដែលរួមមាន៖ ការចុះបញ្ជីយានយន្ត ការផ្តល់បណ្ណបើកបរយានយន្ត ត្រួតពិនិត្យលក្ខណៈបច្ចេកទេសយានយន្ត ការដឹកជញ្ជូនទំនិញលើសកម្រិតកំណត់ ជាដើម ។ លោក ពេជ រដ្ឋា អនុប្រធានមន្ទីរសាធារណការនិងដឹកជញ្ជូនខេត្តកំពត បានមានប្រសាសន៍ក្នុងកិច្ចសម្ភាសន៍ជាមួយអ្នកសារព័ត៌មាននៃវិទ្យុជាតិកម្ពុជាថា ក្នុងគោលដៅពង្រឹងសេវាសាធារណៈវិស័យដឹកជញ្ជូនផ្លូវគោកនិងផ្លូវទឹកឱ្យកាន់តែល្អប្រសើរ មានប្រសិទ្ធភាព គុណភាព រួមទាំងកាត់បន្ថយពេលវេលានិងការចំណាយថវិកាក្រៅផ្លូវការ មន្ទីរបានពង្រឹងនូវយន្តការសំខាន់ៗលើវិស័យដឹកជញ្ជូន ដោយបច្ចុប្បន្ននេះ មន្ទីរបានប្រើប្រាស់នូវប្រព័ន្ធស្វ័យប្រវត្តិកម្ម សម្រាប់ចុះបញ្ជីយានយន្ត ដែលបង្កឱ្យមានភាពងាយស្រួលដល់ប្រជាពលរដ្ឋយ៉ាងច្រើន ។ លោកបានបន្តថា សម្រាប់ការងារត្រួតពិនិត្យលក្ខណៈបច្ចេកទេសយានយន្ត មន្ទីរបានរៀបចំជាមណ្ឌលត្រួតពិនិត្យលក្ខណៈបច្ចេកទេសរថយន្ត(ឆៀក) ដើម្បីឱ្យប្រជាពលរដ្ឋងាយស្រួលមកទទួលសេវា ដោយចំណាយពេលវេលាយ៉ាងយូរត្រឹមតែ២ម៉ោងប៉ុណ្ណោះ។ ក្នុងនោះ ប្រជាពលរដ្ឋក៏អាចស្នើសុំចុះបញ្ជីត្រួតពិនិត្យលក្ខណៈបច្ចេកទេសរថយន្ត(ឆៀក) តាមប្រព័ន្ធស្វ័យប្រវត្តិកម្មដោយផ្ទាល់ផងដែរ ។ ចំពោះការដឹកជញ្ជូនទំនិញលើសកម្រិតកំណត់និងគ្មានសណ្ដាប់ធ្នាប់ គឺមន្ទីរបានសហការជាមួយនគរបាលចរាចរណ៍ កងរាជអាវុធហត្ថ និងអាជ្ញាធរដែនដី ដើម្បីចុះត្រួតពិនិត្យយានយន្តដែលកែច្នៃខុសលក្ខណៈបច្ចេកទេស និងដឹកជញ្ជូនគ្មានសណ្តាប់ធ្នាប់ ខណៈខេត្តកំពត មានស្ថានីយអចល័តថ្លឹងរថយន្តដឹកទំនិញចំនួន២ទីតាំង ។ « មន្ទីរបានសហការជាមួយនគរបាលចរាចណ៍ខេត្ត ចុះយុទ្ធនាការផ្សព្វផ្សាយច្បាប់ស្តីពីចរាចរណ៍ផ្លូវគោក និងសុវត្ថិភាពក្នុងការធ្វើដំណើរជាប្រចាំ តាមដងផ្លូវសាធារណៈសំខាន់ៗ បណ្តារោងចក្រ សាលារៀន តាមសហគមន៍ និងទីប្រជុំជន យើងបានធ្វើការផ្សព្វផ្សាយនេះជាញឹកញាប់ដើម្បីកាត់បន្ថយគ្រោះថ្នាក់ចរាចរណ៍ » ។ លោកបានបន្ថែមថា សម្រាប់ការងារដឹកជញ្ជូនផ្លូវទឹក គឺមន្ទីរបានសហការជាមួយនគរបាលចរាចរណ៍ជើងទឹកនិងអាជ្ញាធរដែនដី ចុះអប់រំ ត្រួតពិនិត្យ និងណែនាំដល់ម្ចាស់ទូក ឱ្យចុះបញ្ជីនិងត្រួតពិនិត្យលក្ខណៈបច្ចេកទេសឱ្យបានត្រឹមត្រូវ ពិសេសកុំផ្ទុកអ្នកដំណើរលើសចំណុះ និងពាក់អាវពោងសុវត្ថិភាពជាប់ជាប្រចាំដើម្បីសុវត្ថិភាពអ្នកដំណើរ ៕