វគ្គបណ្តុះបណ្តាលតម្រង់ទិសក្នុងការពង្រឹងសមត្ថភាព លើការអនុវត្តកិច្ចលទ្ធកម្ម ដល់អង្គភាពថវិការបស់ក្រសួងសាធារណការ និងដឹកជញ្ជូន សាលសហសិក្សាតេជោសែន ៖ នាថ្ងៃព្រហស្បតិ៍ ទី២៦ ខែកុម្ភ: ឆ្នាំ២០២៦ លោកជំទាវ កុយ សុដានី រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន និងជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួងសាធារណការ និងដឹកជញ្ជូន បានអញ្ជើញជាអធិបតី ក្នុងពិធីបើកវគ្គបណ្តុះបណ្តាលតម្រង់ទិសក្នុងការពង្រឹងសមត្ថភាព លើការអនុវត្តកិច្ចលទ្ធកម្ម ដល់អង្គភាពថវិការបស់ក្រសួងសាធារណការ និងដឹកជញ្ជូន ជូនដល់មន្ត្រីបង្គោលនៅតាមអង្គភាពថវិកា ក្រោមឱវាទក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំក្រសួង គ្រូបង្គោលមកពីក្រសួងសេដ្ឋកិច្ច និងហិរញ្ញវត្ថុ ព្រមទាំងមន្ត្រីជំនាញគ្រប់គ្រងហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ អង្គភាពលទ្ធកម្ម និងសិក្ខាកាមមកពីអង្គភាពថវិកាក្រោមឱវាទក្រសួង សរុបប្រមាណ១៤០នាក់។ វគ្គបណ្តុះបណ្តាលនេះប្រព្រឹត្តទៅមានរយ:ពេល២ថ្ងៃ នាថ្ងៃព្រហស្បតិ៍-សុក្រ ទី២៦-២៧ ឆ្នាំ២០២៦ ត្រូវបានរៀបចំឡើង ក្នុងគោលបំណងដើម្បីផ្តល់ជាមូលដ្ឋានសំខាន់ៗដោយផ្តោតទៅលើកិច្ចលទ្ធកម្មដល់សិក្ខាកាមឱ្យបានយល់ដឹងកាន់តែស៊ីជម្រៅ និងជាពិសេសសិក្ខាកាមមកពីអង្គភាពថវិកាថ្នាក់កណ្តាល ដែលឋិតក្នុងអាណាប័ក្រក្រសួងសាធារណការ និងដឹកជញ្ជូន ហើយវគ្គបណ្តុះបណ្តាលនេះនឹងផ្តល់ជាពុទ្ធិក្នុងការជួយជ្រោមជ្រែងដល់មន្រ្តីបច្ចេកទេស ដែលទទួលបន្ទុកហិរញ្ញវត្ថុនៅអង្គភាពថវិកា សរុប ៣៨អង្គភាព ក្នុងនោះ នៅថ្នាក់កណ្តាល ចំនួន ១៣អង្គភាព និងនៅ ថ្នាក់មូលដ្ឋានចំនួន ២៥អង្គភាព គឺមន្ទីរសាធារណការ និងដឹកជញ្ជូនទាំង ២៥ រាជធានី-ខេត្ត។ ការរៀបចំវគ្គបណ្តុះបណ្តាលនេះក៏ជាផ្នែកមួយនៃការអនុវត្តសកម្មភាពនៅក្នុងការងារកែទម្រង់ការគ្រប់គ្រងហិរញ្ញវត្ថុសាធារណៈរបស់ក្រសួង ហើយកន្លងមក វគ្គបណ្តុះបណ្តាលបែបនេះត្រូវបានរៀបចំជាបន្តបន្ទាប់ ក្នុងទិសដៅពង្រឹងប្រសិទ្ធភាព គណនេយ្យភាព តម្លាភាពលើការអនុវត្តការងាររបស់ អង្គភាពថវិការបស់រដ្ឋបាលកណ្តាលរបស់ក្រសួង ដែលនឹងក្លាយទៅជាអង្គភាពថវិកាអាណាប័កផ្ទេរសិទ្ធិពេញលេញ ដែលនឹងមានសមត្ថភាពអនុវត្តតួនាទី ភារកិច្ចសិទ្ធិអំណាច និងការទទួលខុសត្រូវរបស់ខ្លួនឱ្យបានច្បាស់លាស់តាមបទបញ្ញតិជាធរមាន។ ថ្លែងទៅកាន់អង្គពិធី លោកជំទាវរដ្ឋលេខាធិការប្រចាំការ បានជំរុញ និងផ្ដល់អនុសាសន៍ណែនាំដល់អង្គភាពពាក់ព័ន្ធនឹងកិច្ចលទ្ធកម្ម ត្រូវចូលរួមជាបុរេសកម្មលើវិធានដែលបានដាក់ចេញនូវនីតិវិធីនៃការរៀបចំផែនការលើរបាយការណ៍នៃការរៀបចំផែនការសកម្មភាព អនុលោមទៅនឹងប្រព័ន្ធកែទម្រង់ហិរញ្ញវត្ថុសាធារណៈ ក្នុងក្របខណ្ឌវិធីសាស្ត្រ ដើម្បីធានាអោយបាននូវការអនុវត្តកិច្ចការងារលទ្ធកម្ម ទទួលបានប្រសិទ្ធភាព គណនេយ្យភាព និងតម្លាភាព៕