កិច្ចប្រជុំពិភាក្សាលើការងារប្រមូលទិន្នន័យបឋមសម្រាប់ការសិក្សាផលប៉ះពាល់ផ្នែកបរិស្ថាន និងសង្គម នៃគម្រោងមជ្ឈមណ្ឌលភស្តុភារកម្មក្រុងព្រះសីហនុ (SHV-LC) ក្រុងព្រះសីហនុ៖ នាថ្ងៃពុធ ទី២៥ ខែកុម្ភៈ ឆ្នាំ២០២៦ លោកជំទាវ សន សុភាវត្តី អគ្គនាយក នៃអគ្គនាយកដ្ឋានភស្តុភារកម្ម បានអញ្ជើញជាអធិបតីក្នុងកិច្ចប្រជុំពិភាក្សាជាមួយភាគីពាក់ព័ន្ធ លើការងារប្រមូលទិន្នន័យបឋមសម្រាប់ការសិក្សាផលប៉ះពាល់ផ្នែកបរិស្ថាន និងសង្គម នៃគម្រោងមជ្ឈមណ្ឌលភស្តុភារកម្មក្រុងព្រះសីហនុ (SHV-LC)។ កិច្ចប្រជុំនេះ មានការអញ្ជើញចូលរួមពី ឯកឧត្តម ឡុង ឌីម៉ង់ អភិបាលរងនៃគណៈអភិបាលខេត្តព្រះសីហនុ ព្រមទាំងតំណាងមកពីក្រសួងសេដ្ឋកិច្ច និងហិរញ្ញវត្ថុ កំពង់ផែស្វយ័តក្រុងព្រះសីហនុ សាជីវកម្មហិរញ្ញវត្ថុអន្តរជាតិ (IFC) និងមន្ទីរ-អង្គភាពពាក់ព័ន្ធក្នុងខេត្ត ដើម្បីចូលរួមផ្តល់ធាតុចូលសំខាន់ៗលើការសិក្សាឱ្យបានគ្រប់ជ្រុងជ្រោយ។ គោលបំណងចម្បងនៃកិច្ចប្រជុំនេះ គឺដើម្បីធានាថាការអភិវឌ្ឍគម្រោង SHV-LC នឹងត្រូវអនុវត្តទៅតាមបទដ្ឋានបច្ចេកទេស និងបទប្បញ្ញត្តិជាតិ ប្រកបដោយចីរភាព និងការទទួលខុសត្រូវខ្ពស់ ដោយគិតគូរយ៉ាងពេញលេញដល់បរិស្ថាន និងសហគមន៍មូលដ្ឋាន។ ការប្រមូលទិន្នន័យបឋមនេះ គឺជាជំហានយុទ្ធសាស្ត្រក្នុងការរៀបចំរបាយការណ៍សិក្សាសមិទ្ធិលទ្ធភាព ដោយ កាត់បន្ថយរាល់ផលប៉ះពាល់ជាអវិជ្ជមាននានា ខណៈដែលគម្រោងនេះកំពុងឈានទៅមុខតាមកាលវិភាគដែលបានកំណត់។ សូមបញ្ជាក់ផងដែរថា គម្រោងមជ្ឈមណ្ឌលភស្តុភារកម្មក្រុងព្រះសីហនុ គឺជាគម្រោងអាទិភាពដ៏សំខាន់មួយក្នុងការលើកកម្ពស់ប្រព័ន្ធភស្តុភារកម្មកម្ពុជា ឱ្យកាន់តែមានប្រសិទ្ធភាព និងបង្កើនសមត្ថភាពប្រកួតប្រជែងសេដ្ឋកិច្ចក្នុងតំបន់។ តាមរយៈកិច្ចសហការយ៉ាងជិតស្និទ្ធិរវាងស្ថាប័នរដ្ឋ និងដៃគូអភិវឌ្ឍន៍អន្តរជាតិ SHV-LC នឹងក្លាយជាកាតាលីករដ៏សំខាន់ក្នុងការជំរុញទំហំពាណិជ្ជកម្ម និងការតភ្ជាប់ខ្សែច្រវាក់ផ្គត់ផ្គង់របស់កម្ពុជាទៅកាន់ទីផ្សារសកលលោក៕