១៨៩គីឡូម៉ែត្រ ក្នុងមួយម៉ោង! គឺជាល្បឿនរបស់រថយន្តមួយគ្រឿង ដែលបើកបរលើផ្លូវជាតិលេខ៥ ចន្លោះគីឡូម៉ែត្រលេខ ១០៩-១១០ ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង នៅម៉ោងប្រមាណ១០កន្លះព្រឹក ថ្ងៃសៅរ៍ ទី២១ ខែកុម្ភៈ ឆ្នាំ២០២៦។រូបភាពរថយន្តដែលបើកបរដូចហោះមួយគ្រឿងនេះ ត្រូវបានការិយាល័យនគរបាលចរាចរណ៍ផ្លូវគោក ខេត្តកំពង់ឆ្នាំង បង្ហោះនៅទំព័រហ្វេសប៊ុក រួមជាមួយនឹងរថយន្ត៥គ្រឿង ផ្សេងទៀត ដែលបើកលើសល្បឿនកំណត់៩០គីឡូម៉ែត្រ ក្នុងមួយម៉ោង ដែលត្រូវបានដាក់បង្ហាញនៅស្លាកសញ្ញាចរាចរណ៍នៅចន្លោះផ្លូវដែលរថយន្តទាំងនោះបរឆ្លងកាត់។ រថយន្ត៥គ្រឿងទៀត គឺបើកបរក្នុងល្បឿន ១២៩ Km/h , ១៣២Km/h, ១៣៤ Km/h, ១៣៩ Km/h និង១៤៥ Km/h។ រថយន្តដែលបើកបរលើសល្បឿនកំណត់(៩០គីឡូម៉ែត្រក្នុងមួយម៉ោង) នៅលើផ្លូវជាតិលេខ៥ ចន្លោះគីឡូម៉ែត្រលេខ ១០៩-១១០ ស្ថិតនៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង។ រូបភាព៖ ហ្វេសប៊ុកការិយាល័យនគរបាលចរាចរណ៍ផ្លូវគោក ខេត្តកំពង់ឆ្នាំង ការបង្ហោះរូបភាពរថយន្តដែលល្មើសច្បាប់ទាំងនេះ របស់នគរបាលចរាចរណ៍ខេត្តកំពង់ឆ្នាំង គឺដើម្បីបំភ្លឺការបង្ហោះវីដេអូនៅលើបណ្តាញសង្គម Facebook និង Tik Tok ករណីបើកបររថយន្តលើសល្បឿនកំណត់ ហើយត្រូវបានកម្លាំងសមត្ថកិច្ចពិន័យអស់ទឹកប្រាក់ ១៨០ ០០០រៀល។ អ្នកប្រើប្រាស់បណ្តាញសង្គមជាច្រើន ភាន់ច្រឡំនឹងការផាកពិន័យនេះ។ បើតាមនគរបាលចរាចរណ៍ខេត្តកំពង់ឆ្នាំង នៅថ្ងៃទី២៣ ខែកុម្ភៈ ឆ្នាំ២០២៦ កម្លាំង ការិ យាល័យនគរបាលចរាចរណ៍ផ្លូវគោកខេត្តកំពង់ឆ្នាំង បានចុះអនុវត្តច្បាប់ ស្តីពីចរាចរណ៍ ផ្លូវគោក (គោលដៅត្រួតពិនិត្យល្បឿន) នៅលើផ្លូវជាតិលេខ៥ ចចន្លោះគីឡូម៉ែត្រលេខ ១០៩-១១០ ស្ថិត នៅភូមិថ្មី ឃុំផ្សារ ស្រុកបរិបូណ៌ ខេត្តកំពង់ឆ្នាំង។ ក្នុងការអនុវត្តច្បាប់ស្តីពីចរាចរណ៍ផ្លូវគោកនេះ មន្ត្រីចរាចរណ៍បានត្រួតពិនិត្យល្បឿនទៅតាមស្លាកចរាចរណ៍ (៩០Km/h) ហើយចំពោះរថយន្តដែលបើកបរលើសល្បឿនត្រឹម១០០Km/h (លើស១០Km/h) គឺមិនត្រូវពិន័យនោះទេ គឺគ្រាន់តែឃាត់រថយន្ត ដើម្បីអប់រំ និងណែនាំអ្នកបើកបរប៉ុណ្ណោះ។ «ដោយឡែករថយន្តដែលបើកលើសល្បឿនចាប់ពី ១០១Km/h គឺពិន័យតាមច្បាប់។»។ នគរបាលចរាចរណ៍ខេត្តកំពង់ឆ្នាំង ពន្យល់ដូច្នេះ ដោយបន្តលើកអនុក្រឹត្យ ស្តីពីការពិន័យ អន្តរកាណ៍ ចំពោះអំពើល្មើសនឹងច្បាប់ស្តីពីចរាចរណ៍ ផ្លូវគោកមកបង្ហាញដូចខាងក្រោម៖ ១.លើសល្បឿន ចាប់ពី ១ ដល់ ១៩ Km/h ពិន័យចំពោះយានយន្តធុនស្រាល ១២០.០០០៛ ចំពោះយានយន្តធុនធ្ងន់ ២២៥.០០០៛ ២.លើសល្បឿន ចាប់ពី ២០ ដល់ ២៩ Km/h ពិន័យចំពោះយានយន្តធុនស្រាល ១៥០.០០០៛ ចំពោះយានយន្តធុនធ្ងន់ ៣០០.០០០៛ ៣.លើសល្បឿន ចាប់ពី ៣០ ដល់ ៣៩ Km/h ពិន័យចំពោះយានយន្តធុនស្រាល ១៨០.០០០៛ ចំពោះយានយន្តធុនធ្ងន់ ៣៧៥.០០០៛ ៤.លើសល្បឿន ចាប់ពី ៤០ Km/h ឡើងទៅ ពិន័យចំពោះយានយន្តធុនស្រាល ៣០០.000៛ ចំពោះយានយន្តធុនធ្ងន់ ៦២៥.០០០៛ បើតាមនគរបាលចរាចរណ៍ខេត្តកំពង់ឆ្នាំង ករណីយានយន្តដែលល្មើសនោះ គឺបើកបរក្នុងល្បឿន ១២៩ Km/h មានន័យថា យានយន្តល្មើសនោះលើសល្បឿន ៣៩Km/h ដែលត្រូវនឹងចំណុចទី៣ ត្រូវនឹងពិន័យទឹកប្រាក់ ១៨០ ០០០រៀល ចំពោះយានយន្តធុនស្រាល និងឋ៣៧៥ ០០០រៀល ចំពោះយានយន្តធុនធ្ងន់ ស្របតាមច្បាប់ចរាចរណ៍ផ្លូវគោក៕