ពិធីបើកសិក្ខាសាលាផ្សព្វផ្សាយ “សារាចរស្តីពីការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ និងផែនការលទ្ធកម្មប្រចាំឆ្នាំ២០២៦” ដល់អង្គភាពថវិកាក្រោមឱវាទក្រសួងសាធារណការ និងដឹកជញ្ជូន រាជធានីភ្នំពេញ៖ នាថ្ងៃចន្ទ ទី២៣ ខែកុម្ភៈ ឆ្នាំ២០២៦ ឯកឧត្តម វ៉ាស៊ឹម សុរិយា អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុង ពិធីបើកសិក្ខាសាលាផ្សព្វផ្សាយ “សារាចរស្តីពីការអនុវត្តច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ និងផែនការលទ្ធកម្មប្រចាំឆ្នាំ២០២៦” ដល់អង្គភាពថវិកាក្រោមឱវាទក្រសួងសាធារណការ និងដឹកជញ្ជូន។ កម្មវិធីនេះរៀបចំឡើងដោយក្រុមការងារ នាយកដ្ឋានហិរញ្ញវត្ថុ នៃអគ្គនាយកដ្ឋានរដ្ឋបាល និងហិរញ្ញវត្ថុ របស់ក្រសួងសាធារណការ និងដឹកជញ្ជូន ព្រមទាំងមានការអញ្ជើញចូលរួមពីថ្នាក់ដឹកនាំក្រសួង មន្ត្រីជំនាញទទួលបន្ទុកការងារហិរញ្ញវត្ថុ និងលទ្ធកម្ម មកពីអង្គភាពថវិការដ្ឋបាលកណ្តាល និងអង្គភាពថវិកាថ្នាក់មូលដ្ឋាន គឺមន្ទីរសាធារណការ និងដឹកជញ្ជូនរាជធានីខេត្ត ជាច្រើនរូបផងដែរ។ គោលបំណងរបស់សិក្ខាសាលានេះផ្ដោតសំខាន់លើការបង្កើនការយល់ដឹងអំពីការរៀបចំ និងអនុវត្តថវិកាកម្មវិធី ការគ្រប់គ្រងចំណូល-ចំណាយ, ផែនការលទ្ធកម្មប្រចាំឆ្នាំ, ការត្រួតពិនិត្យ តាមដានការអនុវត្តថវិកា និងការធ្វើរបាយការណ៍, ការពង្រឹងការគ្រប់គ្រងទ្រព្យសម្បត្តិរដ្ឋ និងកិច្ចការផ្សេងៗទៀតដែលពាក់ព័ន្ធនឹងថវិកា។ ឯកឧត្តមអនុរដ្ឋលេខាធិការ បានមានប្រសាសន៍ថា អង្គភាពថវិកាក្រោមឱវាទក្រសួងទាំងអស់ បាននឹងកំពុងចូលរួមអនុវត្តយ៉ាងសកម្មនៅក្នុងក្របខណ្ឌនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរបស់រាជរដ្ឋាភិបាល រហូតសម្រេចបានលទ្ធផលជាច្រើនគួរជាទីមោទនៈ ជាពិសេសការសម្របសម្រួល និងផ្ដល់ការគាំទ្រជាមួយគ្នាទៅវិញទៅមកនៅក្នុងការគ្រប់គ្រង ចាត់ចែង និងអនុវត្តថវិកា ក៏ដូចជាការបូកសរុបរបាយការណ៍ចំណូល-ចំណាយថវិកា របស់ក្រសួងស្របតាមគោលការណ៍ហិរញ្ញវត្ថុជាធរមាន និងការរៀបចំផែនការថវិកាស្របតាមរចនាសម្ព័ន្ធថវិកាកម្មវិធីរបស់ក្រសួង ដើម្បីត្រៀមលក្ខណៈឱ្យបានគ្រប់ជ្រុងជ្រោយក្នុងការចរចាថវិកាជាមួយក្រសួងសេដ្ឋកិច្ច និងហិរញ្ញវត្ថុ ទាំងកម្រិតបច្ចេកទេស និងកម្រិតថ្នាក់ដឹកនាំ។ ឯកឧត្តមអនុរដ្ឋលេខាធិការ បានបន្ថែមថា តាមរយៈសិក្ខាសាលាផ្សព្វផ្សាយនាថ្ងៃនេះនឹងផ្តល់ជាដើមទុនផ្នែកបច្ចេកទេសក្នុងការពង្រឹង ការអនុវត្តការងារប្រកបដោយប្រសិទ្ធិភាពខ្ពស់ ដើម្បីរួមចំណែកសម្រេចគោលដៅកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ របស់រាជរដ្ឋាភិបាល ប្រកបដោយប្រសិទ្ធភាព ស័ក្ដិសិទ្ធិភាព គណនេយ្យភាព និងតម្លាភាព៕