គណៈប្រតិភូក្រសួងសាធារណការ និងដឹកជញ្ជូន ចូលរួមកិច្ចប្រជុំប្រចាំឆ្នាំលើកទី៨៨ របស់គណៈកម្មាធិការដឹកជញ្ជូនផ្លូវគោក នៃអង្គការសហប្រជាជាតិ ទីក្រុងហ្សឺណែវ ប្រទេសស្វីស៖ ចាប់ពីថ្ងៃទី១៧ ដល់ថ្ងៃទី ២០ ខែកុម្ភៈ ឆ្នាំ២០២៦ តបតាមការអញ្ជើញរបស់លោកស្រី Tatiana Molcean លេខាធិការប្រតិបត្តិ នៃគណៈកម្មាធិការសេដ្ឋកិច្ច អង្គការសហប្រជាជាតិសម្រាប់អឺរ៉ុប ក្រសួងសាធារណការ និងដឹកជញ្ជូនបានចាត់ ឯកឧត្តម នឹម សុធា អនុរដ្ឋលេខាធិការ ដឹកនាំគណៈប្រតិភូកម្ពុជាចូលរួមកិច្ចប្រជុំប្រចាំឆ្នាំលើកទី៨៨ របស់គណៈកម្មាធិការដឹកជញ្ជូនផ្លូវគោក នៃអង្គការសហប្រជាជាតិ “The 88th Annual Session of the Inland Transport Committee” នៅទីក្រុងហ្សឺណែវ ប្រទេសស្វីស។ កិច្ចប្រជុំលើកទី៨៨ នៃគណៈកម្មាធិការដឹកជញ្ជូនតាមផ្លូវគោក(ITC) បានប្រព្រឹត្តទៅក្រោមប្រធានបទ "ការជំរុញនវានុវត្តន៍សម្រាប់អនាគតនៃវិស័យដឹកជញ្ជូនតាមផ្លូវគោក" ដែលក្នុងនោះមានកិច្ចប្រជុំកម្រិតរដ្ឋាភិបាល កម្រិតមន្រ្តីជាន់ខ្ពស់ និងមានកិច្ចប្រជុំរួមជាមួយគ្រប់ស្ថាប័នពាក់ព័ន្ធ មានអង្គការអន្តរជាតិ សមាគម និងវិស័យឯកជន ដើម្បីត្រួតពិនិត្យវឌ្ឍនភាពការងារ លើកទិសដៅការងារបន្ត និងស្វែងរកដំណោះស្រាយសម្រាប់បញ្ហាប្រឈមនានា ដែលជួបប្រទះកន្លងមក។ កិច្ចប្រជុំ ក៏មានរៀបចំកិច្ចពិភាក្សា ស្វែងយល់ពីរបៀបដែលនវានុវត្តន៍អាចត្រូវបានទាញយក ដោយការទទួលខុសត្រូវតាមរយៈក្របខ័ណ្ឌបទប្បញ្ញត្តិដែលស៊ីសង្វាក់គ្នា ផ្អែកលើវិទ្យាសាស្ត្រ និងអាចធ្វើអន្តរកម្មបាន ដើម្បីធ្វើឱ្យការដឹកជញ្ជូនតាមផ្លូវគោកមានសុវត្ថិភាព បៃតង និងមានភាពធន់ជាងមុនសម្រាប់អនាគត។ កិច្ចប្រជុំនេះស្ថិតក្នុងបរិបទដ៏មានសារៈសំខាន់សម្រាប់កម្ពុជា ព្រោះរាជរដ្ឋាភិបាលកម្ពុជាទើបតែបានផ្តល់សច្ចាប័ន លើកិច្ចព្រមព្រៀងអង្គការសហប្រជាជាតិឆ្នាំ១៩៥៨ ស្តីពីការកំណត់បទដ្ឋានយានយន្ត និងគ្រឿងបង្គំយានយន្ត ដែលយើងនឹងក្លាយជាសមាជិកពេញលេញនៃកិច្ចព្រមព្រៀងនេះ ចាប់ពីខែមេសា ឆ្នាំ២០២៦នេះតទៅ។ ក្នុងអំឡុងពេលនៃកិច្ចប្រជុំនេះផងដែរ ថ្នាក់ដឹកនាំនៃលេខាធិការដ្ឋានគណៈកម្មាធិការដឹកជញ្ជូនតាមផ្លូវគោក អង្គការសហប្រជាជាតិ បានទទួលជួបជាទ្វេភាគីជាមួយគណៈប្រតិភូកម្ពុជា ចំនួនពីរលើក ដែលមួយលើកក្នុងកម្រិតគោលនយោបាយ និងមួយលើកទៀតក្នុងកម្រិតបច្ចេកទេស ដោយស្វាគមន៍យ៉ាងកក់ក្តៅដល់កម្ពុជា ក្នុងនាមជាសមាជិកថ្មី និងស្វែងយល់ពីគ្នាទោះវិញទៅមក ដើម្បីអនុវត្តការងារបន្តប្រកបដោយប្រសិទ្ធិភាព និងនិរន្តរភាព៕