(ភ្នំពេញ)៖ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានបង្ហាញពីសមិទ្ធផលជាច្រើនជូនប្រទេសជាតិ និងរាជរដ្ឋាភិបាល ដែលក្រសួងសារធារណការ សម្រេចបានក្នុងឆ្នាំ២០២៥ ដែលមានដូចជា៖ ការលើកកម្ពស់សេវាដឹកជញ្ជូនគ្រប់ប្រភេទ, ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្លឹក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន រួមទាំងសមិទ្ធជាច្រើនទៀត។ លោក ប៉េង ពោធិ៍នា បានថ្លែងបញ្ជាក់ពីសមិទ្ធផលដូចនេះ នាព្រឹកថ្ងៃទី០៥ ខែកុម្ភៈ ឆ្នាំ២០២៦នេះ នាឱកាសអញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ ក្រសួងសាធារណការ និងដឹកជញ្ជូន និងមានការចូលរួមពីលោក លោកស្រី ជាថ្នាក់ដឹកនាំ មន្ត្រីរាជការ និងបុគ្គលិករបស់ក្រសួងប្រមាណ ៥០០នាក់។ រដ្ឋមន្ត្រី ប៉េង ពោធិ៍នា បានបញ្ជាក់ដូចនេះថា ជារួមក្នុងឆ្នាំ២០២៥កន្លងទៅនេះ ក្រសួងសាធារណការ និងដឹកជញ្ជូន បានអនុវត្តការងារសម្រេចនូវសមិទ្ធផលជាច្រើនជូនប្រទេសជាតិ និងរាជរដ្ឋាភិបាល ដែលមានសមិទ្ធផលសំខាន់ៗ មួយចំនួនរួមមាន៖ *ទី១៖ ការលើកកម្ពស់សេវាដឹកជញ្ជូនគ្រប់ប្រភេទ ១៖ សេវាដឹកជញ្ជូនផ្លូវគោក៖ ក្រសួងសម្រេចបានការចុះបញ្ជីយានយន្ត, ការចេញបណ្ណបើកបរ, ការចុះបញ្ជីរថយន្តបំពាក់ផ្លាកលេខពិសេស និងយានយន្តបំពាក់ផ្លាកលេខពិសេសផ្ទាល់ខ្លួន, និងការចេញលិខិតអនុញ្ញាតឱ្យយានយន្តធ្វើអាជីវកម្មដឹកជញ្ជូនទំនិញក្នុងប្រទេស មានការកើនឡើងធៀបនឹងឆ្នាំ២០២៤។ ទន្ទឹមនេះការត្រួតពិនិត្យលក្ខណៈបច្ចេកទេសយានយន្ត, ការត្រួតពិនិត្យយានយន្តកែច្នៃខុសលក្ខណៈបច្ចេកទេស និងការត្រួតពិនិត្យ រថយន្តដឹកជញ្ជូនលើសទម្ងន់កម្រិតកំណត់ រកឃើញបទល្មើសមានការថយចុះធៀបនឹង ឆ្នាំ២០២៤។ ជាមួយគ្នានេះក្រសួងក៏បានសម្ពោធបើកឱ្យប្រើប្រាស់ជាផ្លូវការមណ្ឌលផ្តល់សេវាសាធារណៈ និងការដាក់ឱ្យអនុវត្តសាកល្បងលើការកែលម្អរថយន្តដឹកជញ្ជូនកម្មករ និយោជិតនៅខេត្តស្វាយរៀង ដើម្បីលើកកម្ពស់សុវត្ថិភាពចរាចរណ៍ផ្លូវគោក និងបង្កើន ផាសុកភាពក្នុងការធ្វើដំណើរ។ ករណីគ្រោះថ្នាក់ចរាចរណ៍ផ្លូវគោកក៏មានការថយចុះផង ដែរក្នុងឆ្នាំ២០២៥ធៀបនឹងឆ្នាំ២០២៤ ទាំងចំនួនអ្នកស្លាប់ និងអ្នករងរបួស។ ២៖ សេវាដឹកជញ្ជូនផ្លូវទឹក ផ្លូវសមុទ្រ និងកំពង់ផែ៖ ក្រសួងសម្រេចបានការចុះបញ្ជីនាវា ផ្លូវទឹកក្នុងប្រទេសគ្រប់ប្រភេទ និងនាវាសមុទ្រ, ការផ្តល់លិខិតអនុញ្ញាត និងបន្តសុពលភាព សេវាពាក់ព័ន្ធដឹកជញ្ជូនផ្លូវទឹក ហើយការដឹកជញ្ជូនទំនិញឆ្លងកាត់កំពង់ផែស្វយ័តក្រុង ព្រះសីហនុ និងកំពង់ផែស្វយ័តភ្នំពេញក៏មានការកើនឡើងធៀបនឹងឆ្នាំ២០២៤។ ៣៖ សេវាពិសោធន៍សំណង់សាធារណការ និងអាជ្ញាបណ្ណផ្លូវថ្នល់៖ ក្រសួងសម្រេចបានការផ្តល់សេវាពិសោធន៍សំណង់សាធារណការ និងការផ្តល់អាជ្ញាបណ្ណផ្លូវថ្នល់សម្រាប់ ប្រកបអាជីវកម្មលើវិស័យហេដ្ឋារចនាសម្ព័ន្ធផ្លូវថ្នល់ជូនអង្គភាពរដ្ឋ និងក្រុមហ៊ុនឯកជន និងបានចុះអនុស្សរណៈនៃការយោគយល់គ្នារវាងមន្ទីរពិសោធន៍សំណង់ និងសាធារណការជាមួយមន្ទីរពិសោធន៍ជាតិសំណង់នៃក្រសួងរៀបចំដែនដី នគរូបនីយកម្ម និងសំណង់ ដើម្បីលើកកម្ពស់កិច្ចសហប្រតិបត្តិការ និងធានានូវគុណភាពនៃសម្ភារៈសំណង់ និង ការផ្តល់សេវាពិសោធន៍សំណង់ឱ្យកាន់តែល្អប្រសើរ។ ៤៖ សេវាដឹកជញ្ជូនផ្លូវដែក៖ ការផ្តល់សេវាដឹកជញ្ជូនទំនិញ និងអ្នកដំណើរតាមផ្លូវដែក ទាំងពីរខ្សែ មានការកើនឡើងធៀបនឹងឆ្នាំ២០២៤។ ជាមួយគ្នានេះក្រសួងបានសហការ ជាមួយអន្តរក្រសួងក្នុងការចុះហត្ថលេខាលើកិច្ចព្រមព្រៀងប្រតិបត្តិការ និងថែទាំបណ្តោះ អាសន្ន (O&M) លើគម្រោងផ្លូវដែកកម្ពុជា រវាងក្រសួងសាធារណការ និងដឹកជញ្ជូន និងក្រុមហ៊ុនរ៉ូយ៉ាល់រេលវេ និងបានចុះកិច្ចព្រមព្រៀងក្របខ័ណ្ឌផ្លូវដែក រព្រៀងក្របខ័ណ្ឌផ្លូវដែក (Framework Agreement) ជាមួយក្រុមហ៊ុនរ៉ូយ៉ាល់រេលវេ ដើម្បីឈានឆ្ពោះទៅបង្កើតកិច្ចព្រមព្រៀង ភាពជាដៃគូរវាងរដ្ឋ និងឯកជនថ្មី (PPP) ក្រោមរូបមន្តសាងសង់ ធ្វើប្រតិបត្តិការ និងផ្ទេរ (BOT)។ ៥៖ សេវាបណ្តុះបណ្តាល៖ ក្រសួងសម្រេចបានការផ្តល់សេវាបណ្តុះបណ្តាលនិស្សិតទាំង ៦ជំនាន់ មានចំនួនសរុប ៥១៨នាក់ (ស្រី២៣២នាក់) លើឯកទេសចំនួន ៣ ដូចជា ឯកទេសសំណង់សាធារណការ, ឯកទេសគ្រប់គ្រងការដឹកជញ្ជូននិងភស្តុភារកម្ម និង ឯកទេសនាវាចរណ៍ ក្នុងនោះនិស្សិតបានបញ្ចប់ការសិក្សា មានចំនួន ១៣៩នាក់ (ស្រី ៣៧នាក់) ដែលក្នុងនោះនិស្សិតភាគច្រើន មានការងារធ្វើនៅតាមស្ថាប័នរដ្ឋនិងឯកជន, កំពុងបើកអាជីវកម្ម និងទៅបន្តការសិក្សានៅក្រៅប្រទេស។ *ទី២៖ ការលើកកម្ពស់ការតភ្ជាប់ប្រព័ន្ធដឹកជញ្ជូនអន្តរមធ្យោបាយ ឡូជីស្លឹក និងការអភិវឌ្ឍហេដ្ឋារចនាសម្ព័ន្ធដឹកជញ្ជូន ១៖ ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវថ្នល់៖ ក្រសួងបានជំរុញការកសាង ហេដ្ឋារចនាសម្ព័ន្ធផ្លូវថ្នល់ តភ្ជាប់ទៅកាន់ប៉ូលសេដ្ឋកិច្ចសំខាន់ៗ ជាពិសេសការស្តារ និង សាងសង់ផ្លូវជាតិ, ផ្លូវខេត្ត ផ្លូវល្បឿនលឿន និងស្ពានតូចធំគ្រប់ប្រភេទ សំដៅធ្វើយ៉ាងណាឱ្យ ការតភ្ជាប់មានភាពប្រទាក់ក្រឡាទាំងក្នុងក្របខ័ណ្ឌផ្ទៃក្នុងប្រទេស និងតំបន់។ បច្ចុប្បន្ននេះ ក្រសួងបាននិងកំពុងធ្វើការគ្រប់គ្រងផ្លូវជាតិ និងផ្លូវខេត្តសរុបចំនួន ៨៨៤ខ្សែ មានប្រវែង សរុប ២០ ៧៣៣,៩១គ.ម (កើន ៣០ខ្សែ មានប្រវែង ៤២៦,៣១គ.ម ធៀបឆ្នាំ២០២៤)។ ទន្ទឹមនេះក្រសួងបានបញ្ចប់និងរៀបចំពិធីសម្ពោធបើកឱ្យប្រើប្រាស់ជាផ្លូវការគម្រោងសាងសង់ ផ្លូវថ្នល់ ព្រមទាំងបាននិងកំពុងអនុវត្តគម្រោងសាងសង់ និងធ្វើការសិក្សាគម្រោងអភិវឌ្ឍន៍ ហេដ្ឋារចនាសម្ព័ន្ធផ្លូវថ្នល់ធំៗ ដោយប្រើប្រាស់ថវិកាជាតិ និងថវិកាហិរញ្ញប្បទានរបស់ដៃគូ អភិវឌ្ឍន៍។ ២៖ ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវទឹក ផ្លូវសមុទ្រ និងកំពង់ផែ៖ ក្រៅពីយុទ្ធសាស្ត្រនៃការតភ្ជាប់ផ្លូវថ្នល់ឱ្យមានភាពប្រទាក់ក្រឡា ក្រសួងបានដាក់ចេញនូវអាទិភាព គន្លឹះមួយចំនួនក្នុងគោលដៅធ្វើយ៉ាងណាឱ្យមធ្យោបាយដឹកជញ្ជូនតាមផ្លូវទឹក មានការតភ្ជាប់ ជាមួយផ្លូវគោក និងផ្លូវដែក តាមរយៈការអនុវត្តគម្រោងសាងសង់ហេដ្ឋារចនាសម្ព័ន្ធដឹក ជញ្ជូនផ្លូវទឹក ផ្លូវសមុទ្រ និងកំពង់ផែ ជាពិសេសការជំរុញអនុវត្តគម្រោងសាងសង់ព្រែកជីក ហ្វូណនតេជោ, គម្រោងអភិវឌ្ឍន៍ផែកុងតឺន័រទឹកជ្រៅថ្មី (ជំហាន១) នៅកំពង់ផែស្វយ័តក្រុង ព្រះសីហនុ និងគម្រោងអភិវឌ្ឍន៍ផែនការមេ ដើម្បីប្រែក្លាយ កំពង់ផែក្រុងព្រះសីហនុ ទៅជាកំពង់ផែ និងមជ្ឈមណ្ឌលឡូជីស្លឹកថ្នាក់តំបន់ ឱ្យសម្រេចជោគជ័យតាមផែនការកំណត់។ ទន្ទឹមនេះក្រសួងក៏បានរៀបចំពិធីសម្ពោធបើកឱ្យប្រើប្រាស់ជាផ្លូវការកំពង់ផែទេសចរណ៍ អន្តរជាតិខេត្តកំពត និងបើកការដ្ឋានសាងសង់កំពង់ផែទេសចរណ៍កំពង់ចាម ដើម្បីជំរុញការ ដឹកជញ្ជូនតាមផ្លូវទឹក ឱ្យកាន់តែល្អប្រសើរ, មានភាពប្រទាក់ក្រឡា និងចូលរួមលើកកម្ពស់ វិស័យទេសចរណ៍។ ៣៖ ការតភ្ជាប់ និងការអភិវឌ្ឍហេដ្ឋារចនាសម្ព័ន្ធផ្លូវដែក៖ ក្រសួងបានសម្រេចដោយជោគជ័យ លើការរៀបចំ និងដាក់ឱ្យអនុវត្តអនុក្រឹត្យស្តីពីការគ្រប់គ្រងផ្លូវឆ្លងកាត់ផ្លូវដែក និងដីចំណី ផ្លូវដែក និងបានបញ្ចប់ការអនុវត្តគម្រោងដំឡើងផ្លាកសញ្ញាចរាចរណ៍ នៅត្រង់ចំណុចឆ្លង កាត់ផ្លូវដែកទាំង២ខ្សែ ដើម្បីពង្រឹងការគ្រប់គ្រង និងលើកកម្ពស់សុវត្ថិភាពចរាចរណ៍។ ទន្ទឹមនេះ ក្រសួងក៏បានបន្តយកចិត្តទុកដាក់ក្នុងការពង្រឹងប្រសិទ្ធភាពក្នុងការដឹកជញ្ជូនផ្លូវដែក តាមរយៈបន្តសហការ ក្នុងការថែទាំ ស្តារ និង់ធ្វើទំនើបកម្មហេដ្ឋារចនាសម្ព័ន្ធផ្លូវដែក នឹងការ ជំរុញអភិវឌ្ឍក្របខ័ណ្ឌគតិយុត្តផ្លូវដែក ជាពិសេស ជំរុញការសិក្សាលើកកម្រិតផ្លូវរថភ្លើងដែល មានស្រាប់ ភាគខាងជើង (ភ្នំពេញ-ប៉ោយប៉ែត) ឱ្យបើកបរបានល្បឿន ៨០គីឡូម៉ែត្រ ក្នុង មួយម៉ោង, ការសិក្សាសមិទ្ធិលទ្ធភាពគម្រោងផ្លូវដែកធុនស្រាលតភ្ជាប់ពីរាជធានីភ្នំពេញទៅ អាកាសយានដ្ឋានអន្តរជាតិតេជោក្រុងតាខ្មៅ ព្រមទាំងការសិក្សាបឋមបណ្តាញរថភ្លើងក្រោម ដី (METRO) នៅរាជធានីភ្នំពេញ ដោយសហការជាមួយដៃគូអភិវឌ្ឍន៍។ ៤៖ ការអភិវឌ្ឍហេដ្ឋារចនាសម្ព័ន្ធប្រព័ន្ធទឹកកខ្វក់៖ ក្រសួងបានរៀបចំពិធីបើកការដ្ឋានសាងសង់ គម្រោងអភិវឌ្ឍន៍ប្រព័ន្ធចម្លោះទឹកកខ្វក់ ក្នុងក្រុងតាខ្មៅ ខេត្តកណ្តាល ព្រមទាំងបានបញ្ចប់ការសាងសង់ ហេដ្ឋារចនាសម្ព័ន្ធប្រព័ន្ធទឹកកខ្វក់នៅតាមបណ្តារាជធានី ខេត្តគោលដៅ ជា ពិសេសគម្រោងវិនិយោគបន្ទាន់លើហេដ្ឋារចនាសម្ព័ន្ធលូ និងប្រព័ន្ធរំដោះទឹកសម្រាប់បញ្ចៀស ការជន់លិចក្នុងភូមិសាស្រ្តរាជធានីភ្នំពេញ, ការបន្តជំរុញការសិក្សា និងការអភិវឌ្ឍន៍ហេដ្ឋា-រចនាសម្ព័ន្ធបណ្តាញលូគ្រប់ប្រភេទ, ការសាងសង់ គ្រប់គ្រង និងថែទាំស្ថានីយប្រព្រឹត្តកម្ម ទឹកកខ្វក់ចំនួន ២១កន្លែង និងទីលានទុកដាក់សំរាម ចំនួន ១៧កន្លែង នៅតាមបណ្តារាជធានី ខេត្តក្រុងគោលដៅសំខាន់ៗ ដើម្បីលើកកម្ពស់អនាម័យបរិស្ថាន និងសុខុមាលភាព សាធារណៈ។ ៥៖ ការអភិវឌ្ឍហេដ្ឋារចនាសម្ព័ន្ធភស្តុភារកម្ម៖ ក្រសួងបាននិងកំពុងខិតខំក្នុងការជំរុញ រៀបចំសេចក្តីព្រាងច្បាប់ស្តីពីភស្តុភារកម្ម, ការបន្តសហការយ៉ាងជិតស្និទ្ធជាមួយភាគីពាក់ព័ន្ធ ក្នុងការជំរុញបើកការដ្ឋានសាងសង់គម្រោងអភិវឌ្ឍន៍មជ្ឈមណ្ឌលភស្តុភារកម្មភ្នំពេញ (PP-LC), ការជំរុញសិក្សាសមិទ្ធិលទ្ធភាពគម្រោងអភិវឌ្ឍន៍មជ្ឈមណ្ឌលភស្តុភារកម្មក្រុង ព្រះសីហនុ (SHV-LC) និងការសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធច្រកទ្វារព្រំដែនចំនួន ៤ រួមមាន៖ ១)ច្រកទ្វារព្រំដែនភ្នំដិន-ខេត្តតាកែវ ២)ច្រកទ្វារព្រំដែនត្រពាំងផ្លុង-ខេត្តត្បូងឃ្មុំ ៣)ច្រកទ្វារព្រំដែនត្រពាំងស្រែ-ខេត្តក្រចេះ និង៤) ច្រកទ្វារព្រំដែនអូយ៉ាដាវ-ខេត្តរតនគិរី និងការត្រៀមរៀបចំសិក្សាគម្រោងអភិវឌ្ឍន៍ហេដ្ឋារចនាសម្ព័ន្ធសំខាន់ៗ ដើម្បីជំរុញការអនុវត្ត ផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ ២០២៣-២០៣៣ រួមទាំងការទាក់ទាញ និងភស្តុភារកម្មកម្ពុជា និងកៀរគរវិនិយោគិនឱ្យមកវិនិយោគលើគម្រោងថ្មីៗ ដើម្បីកាត់បន្ថយតម្លៃឡូជីស្លឹក និងលើកកម្ពស់សមត្ថភាពប្រកួតប្រជែងរបស់កម្ពុជា៕